SMZ KUIMARISHA MFUMO WA KIDIGITALI KATIKA KUDHIBITI AJALI NA MAKOSA YA BARABARANI | RAIS MWINYI

Rais wa Zanzibar na Mwenyekiti wa Baraza la Mapinduzi, Mhe.Dkt. Hussein Ali Mwinyi, amesema Serikali inaendelea kujipanga kuimarisha matumizi ya mifumo ya kidigitali ili kudhibiti vifo vinavyotokana na ajali pamoja na makosa ya barabarani.


Rais Dkt. Mwinyi ametoa kauli hiyo leo tarehe 6 Januari, 2026 alipokutana na Waziri wa Mambo ya Ndani wa Jamhuri ya Muungano wa Tanzania, Mhe.George Simbachawene, aliyefika Ikulu Zanzibar kwa mazungumzo ya kikazi.


Amesema kukamilika kwa mfumo huo wa kidigitali pamoja na matumizi ya taa za usalama barabarani (Traffic Lights) na uwekaji wa rada za kudhibiti kasi, kutasaidia kwa kiasi kikubwa kudhibiti makosa yanayofanyika barabarani, kupunguza vifo vinavyotokana na ajali pamoja na kupunguza gharama za huduma za afya zinazobebwa na Serikali baada ya ajali kutokea.


Akizungumzia suala la unyanyasaji na ukatili wa kijinsia, ikiwemo vitendo vya ubakaji, Rais Dkt. Mwinyi amesema Serikali imechukua hatua madhubuti kudhibiti vitendo hivyo, ikiwemo kuondoa dhamana kwa watuhumiwa wa makosa hayo, pamoja na kuendelea kutoa elimu kwa umma dhidi ya udhalilishaji.


Halikadhalika, akizungumzia matukio ya uhalifu na makosa katika maeneo ya utalii, Rais Dkt. Mwinyi amesema Serikali inaendelea kuchukua juhudi kubwa za kuimarisha usalama katika maeneo hayo, ikiwemo kuwataka wamiliki wa hoteli kuweka kamera za CCTV ili kusaidia kukabiliana na vitendo vya uhalifu.


Rais Dkt. Mwinyi amepongeza ushirikiano uliopo kati ya Wizara ya Mambo ya Ndani na Serikali ya Mapinduzi ya Zanzibar, hususan katika kuimarisha utendaji wa pamoja wa sekta za Uhamiaji, Mamlaka ya Vitambulisho vya Taifa (NIDA) na Jeshi la Polisi, na kusisitiza kuendelezwa kwa ushirikiano huo.


Kwa upande wake, Waziri wa Mambo ya Ndani, Mhe.George Simbachawene, ameonesha kuridhishwa na mchango na ushirikiano unaotolewa na Serikali ya Mapinduzi ya Zanzibar katika kuimarisha utendaji wa taasisi zilizo chini ya Wizara ya Mambo ya Ndani, ikiwemo Uhamiaji, NIDA na Polisi.

RAIS MWINYI:SMZ KUENDELEA KUJENGA MASOKO YA KISASA KATIKA KUIMARISHA BIASHARA ZANZIBAR.

Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, amesema Serikali itaendelea na ujenzi wa masoko ya kisasa katika maeneo mbalimbali ya Zanzibar kwa lengo la kuwawezesha wafanyabiashara kufanya shughuli zao katika mazingira bora, salama na yenye hadhi.


Rais Dkt. Mwinyi ameyasema hayo leo tarehe 4 Januari 2026 alipolizindua Soko la Kisasa la Mbogamboga la Mombasa, lililopo Mkoa wa Mjini Magharibi.


Ameeleza kuwa Serikali inapowahamisha wafanyabiashara kutoka maeneo yao ya awali, hufanya hivyo kwa nia njema ya kujenga masoko yenye viwango na hadhi, pamoja na kuwaandalia mazingira mazuri yatakayochangia ukuaji wa biashara zao na ustawi wa maisha yao.


Rais Dkt. Mwinyi amewahakikishia wananchi kuwa Serikali ipo katika maandalizi ya kujenga soko kubwa na la kisasa katika eneo la Kibanda Maiti, pamoja na uanzishaji wa Bazaar katika Mtaa wa Kwa Hajitumbo, Wilaya ya Mjini, hatua itakayosaidia kudhibiti biashara holela, kuondoa mazingira duni katika masoko na kuzuia ufanyaji wa biashara pembezoni mwa barabara.


Aidha, amesema Serikali itaendelea kutoa mikopo isiyo na riba kwa wafanyabiashara ili kuwawezesha kukuza mitaji yao, huku akitoa wito kwa watakaopewa fursa ya kuliendesha soko hilo jipya kuhakikisha wanalinda miundombinu na kuimarisha usafi wakati wote.


Rais Dkt. Mwinyi ametoa maelekezo maalum kwamba wafanyabiashara wa mwanzo waliopisha ujenzi wa Soko la Mombasa wapewe kipaumbele wakati wa ugawaji wa vizimba vya kufanyia biashara sokoni hapo.


Vilevile, ameushauri Mfuko wa Hifadhi ya Jamii (ZSSF) kujikita zaidi katika uwekezaji wa miradi mikubwa yenye tija, ikiwemo nishati ya umeme, teksi za baharini na mabasi ya umeme, kufuatia mafanikio yaliyopatikana katika miradi ya nyumba za Makaazi na Masoko.


Kwa upande wake, Mkurugenzi Mtendaji wa Mfuko wa Hifadhi ya Jamii Zanzibar (ZSSF), Ndugu Nassor Shaaban, ameishukuru Serikali kwa kuendelea kuiamini taasisi hiyo katika utekelezaji wa miradi ya uwekezaji inayochangia ukuaji wa uchumi na maendeleo ya Zanzibar, ikiwemo ujenzi wa nyumba za Makaazi na Masoko ya kisasa.

Ujenzi wa Soko la Kisasa la Mbogamboga la Mombasa umegharimu jumla ya Shilingi Bilioni 16.6, na umetekelezwa na Kampuni ya RANS.

ZANZIBAR KUWA KITOVU CHA UTALII WA MICHEZO | RAIS MWINYI

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, amesema Serikali itaendelea kuwekeza katika ujenzi na uboreshaji wa miundombinu ya michezo kwa lengo la kuifanya Zanzibar kuwa kituo maalum cha utalii wa michezo kitaifa na kimataifa.


Rais Dkt. Mwinyi ameyasema hayo leo tarehe 01 Januari 2026, aliposhiriki Bonanza la 16 la Mazoezi ya Viungo lililoandaliwa na Chama cha Mazoezi ya Viungo Zanzibar (ZABESA), lililofanyika katika Uwanja wa New Amaan Complex, Mkoa wa Mjini Magharibi. Bonanza hilo limehusisha vikundi 165 vya mazoezi kutoka vilabu 25 vya Pemba, 100 vya Unguja na 40 kutoka Tanzania Bara, likiwa na washiriki zaidi ya 500.


Amesema mazoezi ya viungo ni nguzo muhimu ya afya ya mwili na akili, na husaidia kuongeza kinga dhidi ya magonjwa yasiyoambukiza ikiwemo kisukari, shinikizo la damu na magonjwa ya moyo.

 Aidha, amebainisha kuwa bonanza la kila mwaka ni jukwaa muhimu la kuwakumbusha wananchi umuhimu wa afya njema kwa maendeleo ya mtu mmoja mmoja na Taifa kwa ujumla.


Rais Dkt. Mwinyi amewahimiza wananchi kuendelea kushiriki michezo mbalimbali ikiwemo mpira wa miguu, volleyball, riadha pamoja na michezo ya asili ya kitamaduni ili kuimarisha afya zao. Ameeleza pia kuwa Serikali itaendelea kuhimiza mabonanza, matukio ya michezo, ligi na mashindano ya kitaifa na kimataifa ili kuongeza mvuto wa utalii wa michezo Zanzibar.


Amefafanua kuwa michezo ni sekta muhimu inayochangia maendeleo ya utalii na uchumi wa Taifa kwa kuvutia watalii na wawekezaji, kuongeza fursa za ajira kwa vijana na kukuza pato la Taifa. Serikali, kwa kushirikiana na wadau wa michezo, itaendelea kuimarisha miundombinu ili kufikia viwango vya kitaifa na kimataifa na kuendeleza vipaji kuanzia ngazi ya chini hadi ya juu.


Rais Dkt. Mwinyi amesema kupitia programu madhubuti za mafunzo, nidhamu na usimamizi bora, Zanzibar inaweza kuzalisha wanamichezo bora watakaoshindana kimataifa na kuinua hadhi ya Taifa pamoja na kuboresha maisha yao na familia zao. Ameongeza kuwa Serikali imeimarisha kwa kiwango kikubwa miundombinu ya michezo ikiwemo Uwanja wa Amaan Complex, Gombani na Mao Tse Tung, sambamba na ujenzi wa viwanja 17 unaoendelea katika mikoa yote, ambapo baadhi tayari vimekamilika.


Mapema, Rais Dkt. Mwinyi aliwaongoza mamia ya wana mazoezi katika matembezi maalum kutoka Michenzani kupitia Muembe Kisonge hadi Uwanja wa New Amaan Complex, kabla ya kushiriki mazoezi ya pamoja. Amewapongeza ZABESA na wadau wote kwa kufanikisha bonanza hilo na kuwakabidhi vyeti vya shukrani, huku akihimiza kuendelea kuliunga mkono. Aidha, alipata fursa ya kusalimiana na mwanariadha wa kimataifa wa Tanzania, mshindi wa medali ya dhahabu ya mbio za marathon, Alphonce Simbu, aliyeshiriki bonanza hilo.

RAIS MWINYI AFUNGUA NYUMBA ZA WAFANYAKAZI HOSPITALI YA KITOGANI

RAIS MWINYI AFUNGUA NYUMBA ZA WAFANYAKAZI HOSPITALI YA KITOGANI, AAGIZA ZHC KUSIMAMIA UJENZI WA MAKAAZI YA WATUMISHI


Rais wa Zanzibar na Mwenyekiti wa Baraza la Mapinduzi, Mheshimiwa Dkt. Hussein Ali Mwinyi, amesema lengo la Serikali ni kuimarisha na kuongeza ubora wa huduma za afya kwa wananchi katika maeneo yote ya Zanzibar, sambamba na kuwapunguzia wafanyakazi wa sekta ya afya masafa ya kusafiri kwa kuhakikisha wanakuwa karibu na jamii wanayoihudumia.


Rais Dkt. Mwinyi ameyasema hayo leo tarehe 31 Disemba 2025 alipofungua nyumba za makaazi ya wafanyakazi wa Hospitali ya Kitogani, Mkoa wa Kusini Unguja.

Aidha, Rais Dkt. Mwinyi ameagiza miradi yote ya ujenzi wa nyumba za makaazi ya wafanyakazi wa Serikali isimamiwe na Shirika la Nyumba la Zanzibar (ZHC), ili kuongeza ufanisi, kasi ya utekelezaji na kupunguza gharama za ujenzi. Ameielekeza Wizara ya Afya kujikita zaidi katika ujenzi wa hospitali na utoaji wa huduma za afya, badala ya kujenga nyumba za wafanyakazi, jukumu ambalo amesema ni mahsusi kwa Shirika la Nyumba la Zanzibar.


Ameeleza kuwa ZHC lina dhamana na uwezo wa kitaalamu wa kushughulikia masuala ya makaazi, kusimamia miradi ya ujenzi kwa ufanisi na kuhakikisha inatekelezwa kwa viwango vinavyotakiwa.

Rais Dkt. Mwinyi amebainisha kuwa baada ya Serikali kufanikisha ujenzi wa vituo vya afya na hospitali za wilaya katika wilaya zote 11 za Zanzibar, sasa inaelekeza nguvu katika kukamilisha ujenzi wa hospitali za mikoa katika mikoa yote mitano.


Vilevile, amefahamisha kuwa Serikali inaendelea na ujenzi wa hospitali tatu kubwa za rufaa, ambazo ni ujenzi mpya wa Hospitali ya Mnazi Mmoja, Hospitali ya Matibabu ya Saratani ya Binguni, pamoja na Hospitali ya Kujifunzia (Teaching Hospital) itakayojengwa Binguni. Amesisitiza kuwa hospitali hizo zote zitaambatana na nyumba za makaazi ya wafanyakazi.

Akizungumzia nyumba za makaazi za Kitogani alizozifungua, Rais Dkt. Mwinyi amesema ni utekelezaji wa ahadi ya Serikali ya kuwapatia wafanyakazi wa hospitali, hususan wataalamu wabobezi, makaazi bora yaliyo karibu na maeneo yao ya kazi. Amesema hatua hiyo itahamasisha watumishi, kuboresha utoaji wa huduma za afya, na kupunguza upungufu wa nyumba za makaazi kwa watumishi wa umma.
Rais amefafanua kuwa Serikali tayari imejenga nyumba za wafanyakazi katika hospitali nyingine za wilaya, ikiwemo Hospitali ya Abdalla Mzee, Mkoani Pemba, kupitia Wizara ya Afya.

Ameeleza kuwa hatua hiyo ni sehemu ya utekelezaji wa ahadi kwa wananchi wa Zanzibar iliyotolewa wakati wa kampeni za uchaguzi, kwa kushirikiana nao katika kutatua changamoto mbalimbali, ikiwemo sekta ya afya. Amesisitiza kuwa Serikali itaendelea kutekeleza miradi ya maendeleo ili kufikia maendeleo endelevu ifikapo mwaka 2030.

Rais Dkt. Mwinyi ameipongeza Wizara ya Afya kwa kufanikisha ujenzi wa nyumba hizo, na amemuagiza mkandarasi kukamilisha maeneo yote yaliyosalia kwa muda mfupi ujao.

Akitoa taarifa ya kitaalamu, Katibu Mkuu wa Wizara ya Afya, Ndg. Mngereza Miraji Mzee, amesema jengo hilo la ghorofa tatu limejengwa na Kampuni ya Quality Building Contractor kwa gharama ya Shilingi bilioni 5.5 kutoka Serikali ya Mapinduzi ya Zanzibar, na lina uwezo wa kuhudumia familia 16 za wafanyakazi wa Hospitali ya Kitogani.