ALIYOYASEMA EDWARD MORINGE SOKOINE

Ndugu Edward Moringe Sokoine (01/08/1938-12/04/1984) alikuwa 

Waziri Mkuu wa aina yake nchini Tanzania. Aliongoza katika kipindi ambacho 

nchi ilikuwa katika hali ngumu sana ya kiuchumi. Leo ni miaka 27 toka 

Taifa limpoteze shujaa huyu. Katika kuenzi fikra zake ambazo bado 

zinahitajika sana leo, Udadisi inakuletea nukuu zifuatazo kama ilivyozipata 

kutoka kwenye Kitabu cha Edward Moringe Sokoine: Kiongozi wa Watu Aliyejitolea kilichoandikwa na Luteni Kanali Albert N. Kigadye mnamo mwaka 1984:

"Ole wake kiongozi mzembe na asiye na nidhamu nitakayemkuta: 

Kiongozi wa siasa hana usalama wa aina yoyote. 

Usalama wake ni kudra ya Mungu na Wananchi peke yake. 

Viongozi wazembe na wabadhirifu wahesabu siku zao.

 Labda tusiwajue. Hawa hatuna sababu ya kuwapa imani,

 kuwa tutawalinda kama vitendo vyao viovu" 

- Edward Moringe Sokoine, 26 Machi 1983

"Juu ya suala hili la mapato kutolingana na matumizi ni kwamba tungependa

 kupunguza uongezaji wa wataalam wasiohitajika katika Serikali na katika

 mashirika ya umma mpaka hapo hali yetu ya uchumi itakapokuwa

 katika hali nzuri"

 - Edward Moringe Sokoine, 23 Oktoba 1982

"Serikali inasimamia bei, lakini Serikali yetu itakwenda mpaka itasimamia bei ya mhogo, dagaa na bei ya kila kitu? Haiwezekani, vitu vingine ni lazima vizalishwe 

kwa wingi ili bei yenyewe iweze kujirekebisha"

 - Edward Moringe Sokoine, 24 Septemba 1983

"Wajibu wa kila Mtanzania, kila familia na kila anayekula ni kujilisha mwenyewe. 

Si wajibu wa Taifa kumlisha mtu. Unaweza ukasaidiwa unapopatikana na janga. 

Lakini kama hakuna janga ni wajibu wa kila mtu aweze kujitosheleza

 kwa chakula na atoe ziada kwa Taifa" 

- Edward Moringe Sokoine, 4 Oktoba 1983

"Vijana leo wengi wana mali zaidi kuliko wazee waliofanya kazi miaka thelathini hadi arobaini. Lakini wanaitaka Serikali ndiyo iwaulize mali hiyo wameipata wapi. 

Hivi kwa nini mzazi asimuulize mwanae, 'mali hii umeipata wapi?'"

 - Edward Moringe Sokoine, 23 Oktoba 1983

"Katika nchi inayojali haki na usawa, majeshi hayana budi yawe ni chombo cha kulinda

 haki na maslahi ya walio wengi. Na kamwe hayaruhusiwi kuwa ni chombo

 cha wachache wenye kujali nafsi zao na kusahau maslahi ya walio wengi"

 - Edward Moringe Sokoine, 1Februari 1977

 HAYATI EDWARD SOKOINE VITA VYA KAGERA 1978

HAYATI EDWARD SOKOINE AKIWA KIONGOZI WA KWANZA WA MAPINDUZI FIDEL CASTRO

 HAYATI EDWARD MORINGE SOKOINE ALIPOIZURU URUSI

HAYATI EDWARD MORINGE SOKOINE AKIWA  NA SAMUEL DOE WA LIBERIA 

Hayati Edward Moringe Sokoine alizaliwa Agosti 1, 1938 kitongoji cha Kilasho Kijiji cha Emairete Monduli Juu. Kwa wazazi wake, Baba Sokoine Ole Severe na Mama Napelel Sinyati Noomayaki -  Sokoine. Katika Familia yao walikuwa watoto watano. Yeye alikuwa wa tatu kwenye familia.

Kuzaliwa:                           01/08/1938
Kitongoji cha Kilasho, Kijiji cha Emairete, Monduli Juu.
Wazazi:                                Baba Sokoine Ole Severe
                                                Mama Napelel Sinyati Noomoyaki-Sokoine
Elimu ya Msingi:                         1949-1953 Monduli Primary School
                                                1953-1956 Monduli Middle School
Elimu ya Sekondari:      1957-1958 Umbwe Secondary School

Elimu ya Juu:
1962-1963 Mafunzo ya Maofisa Watendaji, Mzumbe
1963-1964 Akiwa Executive Officer alihudhuria mafunzo ya watumishi wa serikali za mitaa nchini Ujerumani
1981-1982 Alijiunga na Chuo Kikuu cha Belgrade, kusomea Uchumi wa Kijamaa alifuzu na kutunukiwa Diploma ya Juu.
1983 Chuo Kiku cha Dar es Salaam (UDSM) kiliyatathmini masomo hayo aliyoyafanya na kuyatambua kuwa ni sawa na shahada ya Bachelor of Arts (BA)
1983-1984 Alijiunga na Chuo Kikuu cha Dar es  Salaam kuchukua masomo ya shahada ya juu ya sayansi ya siasa. Alifariki akiwa amebakiza sura moja kumaliza Thesis yake.

Siasa
Januari 1, 1961 Alijiunga na Chama cha TANU
Februari 5, 1977 Alikuwa mwanachama mwanzilishi wa CCM ilipoanzishwa
1977-1984 Mjumbe wa Kamati Kuu na Halmashauri Kuu ya CCM
1982 Katibu wa Tume ya Ulinzi na Usalama

Uongozi
1961-1962 Alijiunga na Serikali za Mitaa kama msaidizi wa Katibu  wa Halmashauri ya Shirikisho la Masai (Masai Federal Council), baada ya muda mfupi alipandishwa cheo kuwa Katibu wa Halmashauri ya Shirikisho la Masai.
1963 Baada ya masomo Mzumbe Training Centre, aliteuliwa kuwa Ofisa Mtendaji Daraja la nne.
1965-1970 Mbunge wa Jimbo la Maasai (lililojumuisha majimbo ya sasa ya Ngorongoro, Longido, Monduli, Simanjiro na Kiteto).
1967 Aliteuliwa kuwa Waziri Mdogo (Naibu Waziri) wa Mawasiliano, Uchukuzi na Kazi.
Novemba 1970 Aliteuliwa kuwa Waziri wa Nchi Ofisi ya Makamu wa Pili wa Rais na Waziri Mkuu.
1970-1980 Mbunge wa Jimbo la Monduli (lililojumuisha majimbo ya sasa Monduli, Longido na Ngorongoro).
Februari 1972 Aliteuliwa kuwa Waziri wa Ulinzi na Jeshi la Kujenga Taifa.
13/02/1977 -07/11/1980 Aliteuliwa kuwa Waziri Mkuu wa Jamhuri ya Muungano wa Tanzania.
Novemba 1980 Alijiuzulu wadhifa wa Waziri Mkuu, kwa sababu za kiafya.
1980-1984 Mbunge wa Jimbo la Monduli (Monduli na Longido ya sasa)
Februari 24, 1983 Aliteuliwa kwa mara ya pili kuwa Waziri Mkuu wa Jamhuri ya Muungano wa Tanzania, Nafasi aliyoishika hadi kifo chake Aprili 12, 1984

Marehemu Edward Moringe Sokoine alifariki dunia akiwa Waziri  Mkuu wa Jamhuri ya Muungano wa Tanzania, Mbunge wa Jimbo la Monduli, Katibu wa Baraza la Ulinzi na Usalama, Mjumbe wa Kamti Kuu na Mjumbe  wa Halmashauri Kuu ya Taifa ya CCM.

Hayati Edward Moringe Sokoine alifariki akiwa na umri wa miaka 46 na aliacha wajane wawili Mama Napono Sokoine na Mama Nekiteto Sokoine na watoto 11.

Imeandikwa na Jabir Johnson, PRO-HYAC