PROF MBARAWA ASEMA SERIKALI IMEJIPANGA KUMALIZA MGOGORO WA UWANJA WA NDEGE WA KIA

Waziri wa Ujenzi, Uchukuzi na Mawasiliano Profesa Makame Mbarawa amewataka 

wananchi wanaozunguka eneo la Uwanja wa Ndege wa Kimataifa wa Kilimanjaro (KIA), 

kuwa watulivu katika kipindi hiki ambacho Serikali inatafuta ufumbuzi wa kudumu wa

 mgogoro kati yao na mwendeshaji wa uwanja huo kampuni ya KADCO.

Prof Mbarawa amesema ufumbuzi utakaopatikana utakuwa na manufaa kwa 

pande zote na kujali maslahi ya Taifa.

"Msiwe na wasiwasi Serikali yenu ni sikivu, tutayakagua maeneo yote na kuangalia
maslahi ya pande zote na kutoa maamuzi yenye manufaa kwa wote", 

amesisitiza Prof. Mbarawa.

Mgogoro kati ya wananchi wanaozunguka uwanja wa ndege wa KIA na kampuni ya KADCO 

ambao umekuwako toka mwaka 1998 umesababisha misuguano na hisia kali kwa muda

 mrefu hali iliyosababisha Serikali kuamua kuupatia ufumbuzi wa kudumu.

Waziri Prof. Mbarawa ametuma timu ya wataalamu kupitia eneo lote la uwanja wa ndege
huo lenye kilomita za mraba 110 katika siku mbili kuanzia sasa ili kuangalia
wadau wote walioko ndani ya eneo hilo, athari zake kwa uwanja na 

wananchi kabla ya kutoa uamuzi wa mwisho.

Amezungumzia umuhimu wa Mamlaka ya Viwanja vya Ndege Tanzania (TAA),

 kuilinda mipaka ya viwanja vyake na wananchi kujiepusha kuvamia maeneo ya

 viwanja ili kuepuka migogoro ya aina hiyo siku zijazo.

Katika hatua nyingine Prof. Mbarawa ameitaka KADCO kuongeza mapato katika 

uwanja wa ndege wa KIA ambao ni wa pili kwa ukubwa hapa nchini ili kuendana 

na kasi ya Serikali ya Awamu ya Tano ya kuongeza mapato katika 

sekta zote za kiuchumi.

Amesema nia ya Serikali ni kuboresha viwanja vyote vya ndege nchini ili 

kuimarisha huduma ya usafiri wa anga.

Kwa upande wake Kaimu Mkurugenzi Mkuu wa KADCO Eng. Christopher Mukama

 amesema KADCO inajiendesha kwa faida na kuhakikisha inaendelea na uboreshaji wa

 huduma ili kuvutia ndege nyingi kutumia uwanja huo.

Waziri Prof. Mbarawa yuko mkoani Arusha kukagua ujenzi wa miundombinu

 unaoendelea mkoani humo.



Imetolewa na
Kitengo cha Mawasiliano Serikalini, 

Wizara ya Ujenzi, Uchukuzi na Mawasiliano

 Muonekano wa jengo la abiria katika Uwanja wa Ndege wa Kimataifa wa Kilimanjaro (KIA).

 Waziri wa Ujenzi, Uchukuzi na Mawasiliano Profesa Makame Mbarawa (wa pili kulia) mara
baada ya kuwasili katika Uwanja wa Ndege wa Kimataifa wa Kilimanjaro (KIA),kuanza ziara ya siku mbili ya kukagua ujenzi wa miundombinu unaoendelea mkoani Arusha. Kulia ni Mwenyekiti wa Bodi ya Kampuni ya KADCO Balozi Hassan Gumbo Kibelo.

  Kaimu Mkurugenzi Mkuu wa Kampuni ya KADCO Eng. Christopher Mukama akitoa taarifa ya
utendaji wa kampuni hiyo kwa Waziri wa Ujenzi, Uchukuzi na Mawasiliano Profesa Makame Mbarawa (wa tatu kushoto), mara baada ya kuwasili uwanjani hapo.

Waziri wa Ujenzi, Uchukuzi na Mawasiliano Profesa Makame Mbarawa (katikati), akisisitiza jambo kwa uongozi wa Kampuni ya KADCO na watendaji wa Wilaya ya Hai. Kushoto ni Mwenyekiti wa Bodi ya Kampuni ya KADCO Balozi Hassan Gumbo Kibelo na kulia ni Mkuu wa Wilaya ya Hai Bw. Gelasius Byakanwa.