Mkuu wa Mkoa
wa Arusha Mhe. Mrisho Mashaka Gambo (kushoto) akifuatiwa na Mkuu wa Wilaya ya
Arusha Mhe. Gabriel Daqarro kwenye Kikao na wafanyabiashara wakubwa kilichofanyika
katika Ukumbi wa Mkuu wa Mkoa, lengo ni kufahamu changamoto zinazowakabili
wafanyabishara hao.
Katibu Tawala Mkoa Mkoa wa Arusha Ndg. Richard Kwitega(kulia) akiwa na Mkuu wa Magereza Mkoa wakifuatilia kikao na wafanyabiashara wakubwa wa Mkoa wa Arusha
Mwenyekiti wa TATO Mkoa wa Arusha Bw. Wilbroad Chambulu akiwasilisha malalamiko kwa niaba ya wafanyabiashara wa Utalii Mkoa wa Arusha kwenye kikao kilichoitishwa na Mkuu wa Mkoa wa Arusha.
Baadhi ya wafanyabiashara na wadau mbalimbali walioshirki katika kikao hicho.
Mkurugenzi wa Jiji la Arusha Ndg. Athumani Kihamia(kulia) akifuatilia kikao.
Mfanyabiashara Atul Nittal (aliyesimama) na mmiliki wa Mount Meru Millers akiwasilisha malalamiko yake katika Kikao kati ya wafanyabiashara na Mkuu wa Mkoa wa Arusha.
Mkurugenzi wa Mamlaka ya Maji Safi na Maji Taka (AUWSA) Eng. Ruth Koya akitoa ufafanuzi wa hoja mbalimbali zilizowasilishwa na wafanyabishara zinazohusu Taasisi yake katika kikao hicho.
Nteghenjwa
Hosseah - Arusha
Mkuu wa Mkoa wa Arusha Mhe. Mrisho Mashaka Gambo amekutana na wafanya biashara wakubwa Mkoani hapa na wanaolipa kodi vizuri ili kuwatambua na kuwashukuru kwa mchango wao kwenye Uchumi wa Mkoa wa huu na Tanzania kwa ujumla. na amesisitiza kuwa biashara zao zimechangi kwa kiwango kikubwa kuongeza ajira, na utulivu Mkoani hapa.
Rc Gambo amewahakikishia wafanyabiashara hao kwamba Serikali ya Awamu ya Tano inawajali na iko tayari kushirikiana nao ili kuhakikisha Changamoto mbalimbali za kibiashara zinafanyiwa kazi na kuwatengenezea mazingira mazuri ya kufanya biashara zao.
Aidha aliwataka Mamlaka ya Mapato Mkoa wa Arusha kutokuwatisha wafanyabiashara na kuacha kuwatengenezea makadirio makubwa kwani masuala kama hayo yanachochea mazingira ya rushwa badala yake malengo hayo yaende sambamba na uhalisia wa biashara husika .
Wafanyabiashara wakubwa wa Mkoani Arusha wamesema kuwa katika kipindi cha mwaka mmoja cha uongozi wa Rais Dkt John Magufuli umeweza kufanya vizuri sana hususani katika kufanya kazi kwa uadilifu na kupiga vita matumizi mabaya ya fedha za umma hayo yalisemwa na wafanyabiashara hao walipokuwa katika kikao hicho ambacho kilifanyika katika ukumbi wa ofisi ya Mkuu wa Mkoa.
Mmoja wa wafanyabishara hao aliyejitambulisha kwa jina la Nicholaus Duhia alisema mwaka mmoja wa Rais Dkt Magufuli umeweza kufanya vema kusimamia ulipaji kodi, kurudisha heshima ya uadilifu serikalini na kupiga vita ufisadi na matumuzi mabaya ya fedha za umma zilizokuwa zikitumika kiholela bila ya kuwa na utaratibu maalumu.
Duhia ambaye wakili, mkaguzi wa mahesabu na ushauri wa kodi wa kampuni ya Tax Plan Associetes ya Jiji hapa alisema kuwa hakuna anaweza kubisha kuwa hilo limefanikiwa kwa kiasi kikubwa na kumtaka Rais kurekebisha yale yote mabaya yaliyokuwa yakifanywa na Serikali zilizopita.
Alisema na kutoa ombi kupitia kwa Mkuu wa Mkoa wa Arusha kuwa Rais Dkt Magufuli katika mwaka wa pili wa uongozi wake anapaswa kurudisha imani kwa wafanyabiashara wa hapa nchini ili waweze kufanya kazi bila ya woga.
Naye Sailesh Pandit Mkurugenzi Mtendaji wa A lodhia Group Enterprises alisema kuwa mbali ya kumkubali Rais Dkt Magufuli kwa utendaji kazi wake wa hapa kazi tu alisema kuwa heshima ya kazi serikali imeimarika na watendaji wa serikali wanachapa kazi haswa haswa.
Pandit alisema kuna kasoro chache ambazo zinapaswa kufanyiwa kazi ikiwa ni pamoja na yeye kuzuiliwa kusambaza bomba za plastic na kusema kuwa kazi hiyo inafanywa na viwanda vya Jijini Dar es salaam tu.
Alisema na kumtaka Mkuu wa Mkoa wa Arusha Mrisho Gambo kuingilia hilo kwani kwa kufanya hivyo kutafanya viwanda vingi Mkoani Arusha kufungwa na azma ya Rais ya uchumi wa viwanda haitakuwa na maana yoyote.
Mkurugenzi huyo wa Lodhia alisema kiwanda chake kiko kwa zaidi ya miaka sita na kimeingia katika ushindani wa zabuni wa kusambaza bomba katika Mamlaka za maji hapa Arusha lakini kazi hizo zimekuwa zikipewa kampuniza Jijini Dar es salaam hali inayowafanya kukata tama.
‘’Kiwanda changu cha Plastic Arusha kimepigwa vita kisifanye kazi ya kusambaza bomba na kuteuliwa viwanda vya Dar es salaam hii ni mbaya sana mkuu wa mkoa ‘’ alisema Pandit
Alisema kiwanda hicho kimekaguliwa na Mamlaka zote za serikali kwa zaidi ya miaka sita iliyopita lakini baadhi ya taasisi zingine zinaweka ugumu bila ya sababu za msingi kwa kiwanda hicho kutopewa kazi.
Wafanyabiashara wengine Willbroad Chambulu wa Kibo Safari na Atul Nittal wa Mount Meru Millers wamesema kuwa serikali ya awamu ya tano iangalia namna ya kupunguza utitiri wa kodi kwa wafanyabiasha wakubwa.
Wakati huo huo Mfanyabiashara Willbroad Chambulu alikabidhi majina ya kampuni za Utalii zaidi ya 500 ambazo hazipo kwenye orodha ya Mamlaka ya Mapato Mkoani ili ziweze kuingizwa kwenye mfumo rasmi wa mapato.
Gambo aliwahakikishiwa wafanyabiashara hao kuwa Serikali yao itakuwa imara na ipo tayari kuwasaidia pale watakapo kwama, lengo ni kutaka wafanye kazi kwa ufanisi bila ya kipingamizi.
Mwisho
