JIKO LA HOTELI YA KENDWA ROCKS , MKOA WA KASKAZINI UNGUJA LAUNGUA MOTO.

Balozi Seif akiwafariji wamiliki wa Kendwa Rocks Bwana Ali Ibrahim Kilupi aliyepo mwanzo kushoto na msaidizi wake Omar Ibrahim Kilupi baada ya jengo la jiko la hoteli yao kuungua moto.

Kati kati ni Waziri wa Nchi Ofisi ya Makamu wa Pili wa Rais wa Zanzibar Mh. Moh’d Aboud Moh’d na kushoto kwa Balozi Seif ni Mkuu wa Mkoa Kaskazini Unguja 

Kanal Mstaafu Juma Kassin Tindwa.

 Baadhi ya Sehemu za jengo la Jiko la Hoteli ya Kendwa Rocks iliyoko Mkoa wa Kaskazini Unguja ambalo iliuungua moto ulisababishwa na hitilafu za umeme.

 Wahandisi wa Hoteli ya Kendwa wakijaribu kurejesha miundo mbinu ya umeme iliyoathirika kutokana na moto mkubwa uliotokea kwenye Hoteli hiyo.

 Jengo la Jiko la Hoteli ya Kendwa Rocks lililoungua vibaya mwa moto uliosababishwa na hitilafu ya umeme.

Makamu wa Pili wa Rais wa Zanzibar Balozi Seif Ali Iddi akimfariji Mwakilishi wa Hoteli ya Gold Zanzibar iliyopo Nungwi  Mkoa wa Kaskazini Unguja Bwana Andrea Azzala baada ya paa la jengo lao kuungua moto.

Balozi Seif akikaguzwa kuangalia maeneo yaliathirikia kutokana na moto kwenye Hoteli ya Kendwa Rocks Nungwi Mkoa wa Kaskazini Unguja.

Kulia ya Balozi Seif ni  Msaidizi Menja Mkuu wa Kendwa Rocks Bwana Omar Ibrahim Kilupi, Mkuu wa Mkoa wa Kaskazini Unguja Kanal Mstaafu Juma Kassim Tindwa na Waziri wa Nchi Ofisi ya Makamu wa Pili wa Rais wa Zanzibar Mh. Moh’d Aboud Moh’d.

Picha na – OMPR – ZNZ.

Press Release:-

Hitilafu ya umeme iliyotokea mapema  asubuhi imesababisha moto mkubwa   ulioteketeza jengo la jiko, Duka ,sehemu ya burdani ya Hoteli Kendwa Rocks pamoja na Hoteli ya Gold Zanzibar zilizopo katika Kijiji cha Nungwi Mkoa wa kaskazini Unguja.

Moto huo ulioripuka kwa kusaidiwa na upepo mkali uliokuwa ukivuma majira ya saa nne za asubuhi umeteketeza vitu na vifaa mbali  vilivyokuwemo ndani ya majengo hayo na kusabisha hasara inayokisiwa kufikia shilingi za Kitanzania Bilioni Moja { 1,000,000,000/- }.

 Makamu wa Pili wa Rais wa Zanzibar Balozi Seif Ali Iddi akiambatana pamoja na Waziri wa  Nchi Ofisi ya Makamu wa Pili wa Rais wa Zanzibar  Mh. Moh’d Aboud Moh’d walifika eneo la tukio kuwafariji wamiliki wa Hoteli hizo.

Meneja wa Kendwa Rocks Bwana Ali Ibrahim Kilupi alimueleza Balozi Seif kwamba wafanyakazi  kwa kushirikiana na wananchi wanaozizunguuka Hoteli hizo walijaribu kuuzima moto huo uliokuwa ukiwaka kwa kasi kutokana na upepo mkali uliovuma wakati huo.

Bwana Ali alifahamisha kwamba Uongozi wa Hoteli hiyo ulijaribu kuwasiliana na Kikosi cha Zima moto na Uokozi  Zanzibar kujaribu kusaidia uokozi huo lakini wakati huduma hizo zinakaribi kufika kasi ya moto huo iliyochukuwa baina ya dakika 15 na 20 tayari ilikuwa imeshateketeza vifaa na vitu vyote.

Alieleza kwamba licha ya wageni wengi kuvutiwa na mazingira ya nyumba zinazoezekwa makuti lakini Uongozi wa Hoteli hiyo umeamua kubadilisha mfumo huo kwa kutumia vitage ili kujaribu kujikinga na majanga kama hayo.

Naye Mwakilishi wa Hoteli ya Gold Zanzibar Bwana Andrea Azzala alisema kwa kwa hivi sasa  ni mapema mno kujua hasara iliyopatikana kutokana na kuungua kwa paa la jengo lao moja.

Bwana Andrea aliwashukuru wafanyakazi na baadhi ya wananchi wa vijiji jirani vilivyozuunguka Hoteli hizo kwa jitihada zao zilizosaidia kukabiliana na moto huo uliovumba ghafla mapema asubuhi.

Akitoa pole kwa wamiliki wa miradi hiyo ya Hoteli Makamu wa Pili wa Rais wa Zanzibar Balozi Seif Ali Iddi alisema Serikali ya Mapinduzi ya Zanzibar imesikitishwa kutokea kwa janga hilo la moto litakalorejesha nyuma malengo ya wamiliki wa hoteli hizo.

Hata hivyo Balozi Seif amefurahishwa na Uongozi wa Hoteli hiyo kwa uamuzi wake wa kuuwekea  bima ya moto mradi wao  kwani itasaidia kupunguza machungu ya hasara iliyotokea.

Alisema maafisa wa Idara ya Maafa Zanzibar ambayo iko chini ya Ofisi yake  itafanya tathmini kujuwa harasa kamili iliyotokea ya janga hilo na kuripoti Serikalini ili kuangalia namna ya kusaidia wawekezaji hao wazalendo.

Akitoa shukrani kwa niaba ya Uongozi wa hoteli ya Kendwa Rocks Msaidizi meneja Mkuu wa Hoteli hiyo Bwana Omar  Ibrahim Kilupi ameipongeza Serikali ya Mapinduzi ya Zanzibaf kwa  kuwa karibu na Wananchi wake.

Majanga ya miripuko ya moto yamekuwa yakitokea mara kwa mara katika kipindi cha kiangazi na kusababisha hasara kubwa inayochukuwa muda mrefu hasa kwenye miradi ya hotel.

Othman Khamis Ame

Ofisi ya Makamu wa Pili wa Rais wa Zanzibar

14/2/2015.

BALOZI SEIF ALI IDDI AIPONGEZA SERIKALI YA WATU WA MAREKANI

Makamu wa Pili wa Rais wa Zanzibar Balozi Seif akiwa katika picha ya pamoja na washiriki wa mafunzo ya siku tano kuhusu zoezi la kukabiliana na maafa Zanzibar yanayofanyika Hoteli ya Zanzibar Beach Resort.

Kushoto ya Balozi Seif ni Mwakilishi wa shirika la Usafricom Kamanda Philip Knightsheen, Waziri wa Afya Zanzibar Mh. Rashid Seif , Kaimu Kamanda wa Brigedia Nyuki Zanzibar na Mkuu wa Mkoa Mjini Magharibi Mh. Abdulla Mwinyi.

Kulia ya Balozi Seif ni Waziri wa Nchi Ofisi ya Makamu wa Pili wa Rais wa Zanzibar Mh. Moh;d Aboud Moh’d, Mwakilishi wa shirika la Misaada la Marekani Us Aid Bibi Anna Senga, Waziri wa Nchio Ofisi ya Rais Tawala za Mikoa na Idara Maalum Mh. Haji Omara Kheir, na Msadizi Kamishna wa Polisi Kamanda Hassan Nassir.

Kamanda Philip Knightsheen akitoa salamu za Shirika lake linalosimamia huduma za Kibinaadamu na Afya la Usafricom kwenye mafunzo ya siku tano ya zoaezi la kukabiliana na maafa Zanzibar hapo Zanzibar Beach Resort Mazizini.

 Mwakilishi wa shirika la Misaada la Marekani Us Aid Bibi Anna Senga akizungumza katika mafunzo ya siku tano kuhusu zoezi la kukabiliana na maafa Zanzibar.

Waziri wa Ncho Ofisi ya Makamu wa Pili wa Rais wa Zanzibar Mh. Moh’d Aboud Moh’d akimkabidhi Makamu wa Pili wa Rais wa Zanzibar Balozi Seif Ali Iddi Ripoti ya Maafa Zanzibar.

 Mkurugenzi wa Idara ya Maafa Zanzibar Nd. Ali Juma Hamad wa kwanza kutoka kulia akiwa na baadhi ya watendaji wa Idara hiyo wanaoshiriki mafunzo ya sku tano kuhusu zoezi la kukabiliana na maafa Zanzibar.

Baadhi ya washiriki wa mafunzo ya siku tano kuhusu zoezi la kukabiliana maafa Zanzibar yanayofanyika Hoteli ya Zanzibar Beach Resort Mazizini.

 Baadhi ya washiriki wa mafunzo ya siku tano kuhusu zoezi la kukabiliana maafa Zanzibar yanayofanyika Hoteli ya Zanzibar Beach Resort Mazizini.

 Mwakilishi wa shirika la Misaada la Marekani Us Aid Bibi Anna Senga akibadilishana mawazo na Makamu wa Pili wa Rais wa Zanzibar Balozi Seif nje ya ukumbi wa Zanzibar Beach Resort mara baada ya kufunguliwa rasmi mafunzo ya zoezi hilo.

Nyuma ya Balozi Seif ni Waziri wa Nchi Ofisi ya Rais ,Tawala za Mikoa na Idara Maalum Mh. Haji Omara Kheir. Kulia ya Balozi Seif ni Waziri wa Nchi Ofisi ya Makamu wa Pili wa Rais wa Zanzibar Mh. Moh’d Aboud Moh’d na Mwakilishi wa Shirika linalosimamia huduma za Kibinaadamu na Afya la Usafricom Kamanda Philip Knightsheen.

Picha na – OMPR – ZNZ.

 Press Release:-

Makamu wa Pili wa Rais wa Zanzibar Balozi Seif Ali Iddi ameipongeza Serikali ya Watu wa Marekani kupitia Shirika lake la Misaada ya Maendeleo la Us aid kwa jitihada zake za kuisaidia Zanzibar katika mipango yake ya kutafuta mbinu za kuwa tayari kwa kukabilana na maafa wakati wowote yatapotokezea.

Alisema Zanzibar imekuwa na historia pana ya majanga mbali mbali yaliyowahi kuikumba na kusababisha maafa makubwa yatayoendelea kukumbukwa na vizazi vya sasa na vile vijavyo.

Balozi Seif alitoa pongezi hizo wakati akifungua rasmi mafunzo ya siku tano kuhusu zoezi la kukabiliana na maafa Zanzibar yanayofanyika katika Ukumbi wa Hoteli ya Zanzibar Beach Resort Mazizini nje kidogo ya Mji wa Zanzibar.

Alisema Marekani imekuwa mshirika mkubwa katika kusaidia harakati mbali mbali za maendeleo ya miundo mbinu ya mawasiliano ya Bara bara, huduma za Afya na ustawi wa Jamii wa Zanzibar jambo ambalo limekuwa likileta faraja kwa Wananchi walio wengi hapa Nchini.

Balozi Seif alifahamisha kwamba juhudi za Zanzibar katika kujiweka tayari kukabiliana na maafa yoyote yatakayoweza kutokea zimekuja kufuatia majanga tofauti yaliyowahi kutokea kama maradhi ya Kolera, ajali za vyombo vya usafiri wa Baharini na majanga ya moto ambayo yamesababisha vifo vya watu kadhaa.

“ Zanzibar imeshuhudia maradhi ya kolera karibu miaka 20 iliyopita na kukumbwa na ajali za usafiri wa Baharini miaka michache iliyopita na kulazimika kuchukuwa jitihada za tahadhari katika kukabiliana nayo endapo yatatokezea tena “. Alisema Balozi Seif.

Alifahamisha kwamba Zanzibar ikiwa miongoni mwa Mataifa machanga Duniani inawajibika kuimarisha Idara yake ya Maafa kwa kushirikiana na taasisi za ulinzi, Afya na Mawasiliano ili kuona huduma za kukabiliana na maafa Nchini zinapatikana kwa ubora unaokusudiwa.

Makamu wa Pili wa Rais wa Zanzibar alieleza kuwa ile nia ya Serikali ya Mapinduzi ya Zanzibar kujenga vituo vya mafunzo na uokozi wakati yanapotokea maafa katika eneo la Nungwi Mkoa wa Kaskazini Unguja na Chake chake kwa Pemba bado iko pale pale.

Alisema kilichokwamisha utekelezaji wa mpango huo kwa sasa ni upatikanaji wa vifaa na fedha licha ya juhudi kadha zinazoendelea kuchukuliwa na Serikali kuu katika kuomba misaada ya kiufundi kwa Taasisi za Kimataifa zilizobobea katika taaluma hiyo muhimu.

Balozi Seif alieleza kuwa katika kuimarisha huduma za kukabiliana na maafa Nchini Mswada wa Sheria ya Kuanzisha Sheria ya Kupunguza na Kukabiliana na Maafa Zanzibar uliwasilishwa na kujadiliwa na Baraza la Wawakilishi Zanzibar hivi karibu na hatimae kupitishwa katika Mkutano wa 18 wa Baraza hilo.

Alisema Mswada huo ulikusudiwa kuweka sheria mpya inayoweka mfumo wa kisheria katika shughuli za kukabiliana na maafa na mambo ambayo yataondosha mapungufu yanayoonekana katika sheria iliyopo hivi sasa.

Balozi Seif alisisitiza kwamba Sheria hiyo mpya itawiana na Sera ya Kukabiliana na Maafa ya mwaka 2011 pamoja na Makubaliano na Mikataba ya Kikanda na Kimataifa inayohusiana na masuala ya kukabiliana na maafa iliyoridhiwa na nchi yetu.

Mapema Naibu Katibu Mkuu Wizara ya Nchi Ofisi ya Makamu wa Pili wa Rais wa Zanzibar Nd. Ahmad Kassim alisema lengo la zoezi hili la kukabiliana na maafa Zanzibar ni kujenga nguvu za pamoja kati ya Taasisi za Umma, binafsi zikiungwa mkono na washirika wa maendeleo .

Nd. Ahmad alisema kwa vile majanga yanapotokea yanakumba kila kilichoko mbele yake ushirikiano wa karibu unahitajika kwa pande zote zinazohusika ili kujiweka tayari kukabiliana na majanga yoyote yanapotokezea.

Wakitoa salamu za Taasisi zao za kimataifa zinazoshiriki zoezi hilo Mwakilishi wa Shirika linalosimamia huduma za Kibinaadamu na Afya la Usafricom Kamanda Philip Knightsheen na Mwakilishi wa shirika la Misaada la Marekani Us Aid Bibi Anna Senga walisema suala la ulinzi wa maisha ya Mwanadaamu linamuhusu kila mwana jamii.

Walisema licha ya kwamba nguvu kubwa imewekwa kwa vikosi vya ulinzi na uokozi kukabiliana na maafa yanapotokea, lakini bado jukumu hilo litaendelea kusimamiwa kwa pamoja na taasisi zote za umma,binafsi kwa kushirikiana na washirika wa maendeleo.

Wawakilishi wa taasisi hizo za Kimataifa walisema kwamba Nchi za Malawi, Msumbiji na Senegal zinazokuwa zikikabiliana na mafuriko ya mara kwa mara zimekuwa zikipata msaada ya kibinaadamu kwa lengo la kuwapa matumaini wananchi wake wanaokumbwa na kadhia hiyo.

Waliahidi kwamba Taasisi na mashirika ya maendeleo ya Kimataifa wakiyatolea mfano yale ya Unicef, WHO,Usafricom,CDHAM na mengine ya kujitolea yataendelea kuunga mkono juhudi za Serikali ya Mapinduzi ya Zanzibar katika kukabiliana na majanga na maafa wakati yanapotokea.

Akimkaribisha mgeni rasmi kufungua zoezi hilo Waziri wa Nchi Ofisi ya Makamu wa Pili wa Rais wa Zanzibar Mh. Moh’d Aboud Moh’d alizishukuru Taasisi inayohudumia masuala ya Kibinaadamu na Afya { USAFRICOM } na ile ya kujikinga na Majanga ya Kibinaadamu { CDHAM } kupitia Serikali ya Marekani kwa kukubali kugharamia mafunzo ya zoezi hilo.

Waziri Aboud alisema msaada wa Taasisi hizo utasaidia kuwawezesha washiriki wa mafunzo hayo kutoka Mataifa mbali mbali rafiki kupata taaluma pana itayoweza kuwasaidia katika kutekeleza majukumu yao kwenye taasisi wanazotokea.

Mafunzo hayo ya siku tano kuhusu zoezi la kukabiliana na maafa Zanzibar yanayofanyika katika ukumbi wa Mikutano wa Hoteli ya Zanzibar Beach Resort yameshirikisha wawakilishi wa Taasisi za ulinzi, maafa, Utawala, pamoja na wataalamu wa Afya kutoka nchi mbali mbali Duniani.

Othman Khamis Ame

Ofisi ya Makamu wa Pili wa Rais wa Zanzibar

9/2/2015.

 

Mh. Pinda awapongeza wanamichezo wa Timu za Bunge la Jamuhuri ya Muungano wa Tanzania

Waziri Mkuu wa Serikali ya Jamuhuri ya Muungano wa Tanzania Mh. Mizengo Pinda akiwa pamoja na Spika wa Bunge Mh. Anna Makinda na Baadhi ya Wabunge wakifurahia vikombe mbali mbali vilivyoibuliwa na Timu za Bunge la Jamuhuri katika Mashindano yha Mambunge ya Jumuiya ya Afrika Mashariki.

Baadhi ya Wabunge wa Bunge la Jamuhuri ya Muungano wakiwa kwenye tafrija ya kuupokea mwaka mpya wa 2015 iliyofanyika katika majengo ya Bunge Mjini Dodoma sambamba na kuzipongeza Timu za Bunge hilo zilizoshinda kwenye mashindano ya Mabunge ya Afrika Mashariki.

Waziri Mkuu Mh. Mizengo Pinda akiwapongeza wachezaji wa timu za Bunge la Jamuhuri kwenye tafrija ya kuukaribisha mwaka mpya wa 2015 katika majengo ya Bunge hilo Mjini Dodoma.

Waziri Mkuu akiwaongoza waheshimiwa wenzake kwenye mduara ulioporomoshwa na bendi ya Utalii katika tafrija ya kuukaribisha mwaka mpya wa 2015 Mjini Dodoma.

Picha na – OMPR – ZNZ.

                                                                     Press Release:-

Waziri Mkuu wa Serikali ya Jamuhuri ya Muungano wa Tanzania Mh. Mizengo Peter Pinda aliwapongeza wanamichezo wa Timu za Bunge la Jamuhuri ya Muungano wa Tanzania kwa kuliletea sifa kubwa Bunge hilo kwenye mashindano ya michezo mbali mbali ya Kitaifa na Kimataifa.

Mh. Pinda alitoa pongezi hizo katika Tafrija maalum ya kuukaribisha mwaka mpya zilizofanyika katika majengo ya Bunge la Jamuhuri Mjini Dodoma hafla iliyokwenda sambamba na kuwapongeza wanamichezo wa Bunge hilo baada ya kushinda michezo tofauti katika mashindano ya Mabunge ya Jumuiya ya Afrika Mashariki yaliyofanyika Mjini Arusha Tanzania.

Waziri Mkuu Pinda alisema kwamba michezo inatoa nafasi kubwa ya ushirikiano ambayo ni kielelezo cha msingi kinachozaa Viongozi bora wanaotokana na sekta ya michezo.

Aliishauri Kamati ya Uongozi wa Michezo ya Bunge hilo kufikiria umuhimu wa kuwashirikisha wawakilishi wa wanamichezo wa mabunge wanachama kwenye tafrija kama hizo kwa lengo la kusherehekea nao pamoja ili kudumisha ushirikiano pamoja na ujirani mwema.

Alieleza kwamba michezo ina nafasi pana ya kupunguza joto la kisiasa, hitilafu au ugomvi unaotokea baina ya nchi na nchi na kupelekea watu wa pande zinazohitilafiana kurejea kwenye ushirikiano na mafungamano baina yao.

Mh. Pinda alifahamisha kwamba kwa kuwa mabunge mengi yana utaratibu mzuri wa kuandaa mashindano ni vyema kwa waheshimiwa wabunge kuzitumia fursa kama hizo katika kushiriki kwenye mazoezi na hatimae mashindano kwa lengo la kudumisha afya zao.

Waziri Mkuu wa Serikali ya Jamuhuri ya Muungano wa Tanzania aliwatakia mwaka mwema wa 2015 Waheshimiwa wote wa Bunge la Jamuhuri hasa mwezi Oktoba mwaka huu ambao kama wamefanya vyema majimboni mwao utawarejesha tena kwenye wadhifa wao.

Alisema kurejea kwa Wabunge hao kwa kiasi kikubwa kunaweza kuleta faraja kubwa kwa vile tayari wameshazoeana kutokana na kushirikiana pamoja katika vikao vya Bunge hilo kwa takriban miaka mitano.

Mapema Mwenyekiti wa Bunge Sports Club Iddi Azan alisema ongezeko la michezo mbali mbali kwenye mashindano ya Timu za Mabunge ya Afrika ya Mashariki linatokana na azimio la Mabunge ya Jumuiya hiyo la kuzitaka Nchi Wanachama kuongeza michezo mengine kwenye mashindano hayo.

Mwenyekiti Azan alisema mshindano ya Mabunge hayo yalikuwa yakishirikisha michezo miwili tuu ile ya Kandanda na Pete ambapo kwa sasa ipo riadha, mbio za vijiti, kuvuta kamba, kufukuza kuku ikiwemo pia ile ya watu wenye mahitaji maalum { Walemavu }.

Mwenyekiti huyo wa Bunge Sports Club alielezea faraja yake kutokana na ushiriki mzuri wa wanamichezo wa Timu za Bunge la Jamuhuri ya Muungano wa Tanzania kwenye mashindano mbali mbali ya Mabunge na kuleta ushindi katika michezo tofauti.

Katika mashindano hayo ya mwaka 2014 ya Timu za Mabunge ya Jumuiya ya Afrika Mashariki yaliyoshirikisha wachezaji 150 Timu ya Mpira wa Pete Wanawake ya Bunge la Tanzania ilitokea mshindi wa kwanza, Riadha wanawake washindi wa kwanza, riadha wanaume washindi wa Tatu, mpira wa miguu washindi wa Pili na kuvuta kamba Timu za wanawake na wanaume Tanzania zimeshika nafasi ya kwanza.

Othman Khamis Ame

Ofisi ya Makamu wa Pili wa Rais wa Zanzibar

7/2/2015.

BALOZI SEIF ALI IDDI AFUNGA MKUTANO WA 18 WA BARAZA LA WAWAKILISHI ZANZIBAR

 Makamu wa Pili wa Rais wa Zanzibar Balozi Seif Ali Iddi akiufunga Mkutano wa 18 wa Baraza la Wawakilishi Zanzibar uliokuwa ukiendelea katika ukumbi wa Majengo ya Baraza hilo uliyopo Mbweni Nje kidogo ya Mji wa Zanzibar.

Aliyepo meza ya juu ni Spika wa Baraza la Wawakilishi Zanzibar Mheshimiwa Pandu Ameir Kificho.

Spika wa Baraza la Wawakilishi Zanzibar Mh. Pandu Ameir Kificho akiambatana na Makatibu na walinzi wa Baraza  hilo wakitoa nje mara baada ya kufungwa kwa Mkutano wa 18 wa Baraza la 

Wawakilishi Mbweni.

Picha na – OMPR – ZNZ.

                                        Press Release:-

Serikali ya Mapinduzi ya Zanzibar inakamilisha utafiti wa kuibua vivutio vipya vya Utalii vilivyopo katika maeneo ya vijiji nchini ambapo matokeo ya utafiti huo yatasambazwa kwa wanachi ili kuongeza uelewa wa fursa za sekta ya utalii zilizomo katika maeneo yao.

Makamu wa Pili wa Rais wa Zanzibar Balozi Seif Ali Iddi alieleza hayo wakati akiufunga Mkutano wa 18 wa Baraza la Wawakilishi Zanzibar uliokuwa ukiendelea katika ukumbi wa Majengo ya Baraza hilo yaliyopo Mbweni Nje kidogo ya Mji wa Zanzibar.

Balozi Seif alisema utekelezaji wa mpango huo unatarajiwa kutoa ajira za moja kwa  moja zaidi kwa Wananchi hasa wale wa Vijijini katika kuendeleza ile azma ya Serikali ya kuimarisha Utalii kwa wote.

Alisema mwishoni mwa mwaka uliopita Sekta ya Utalii imefanikiwa kutoa fursa za ajira zisizokuwa za moja kwa moja zipatazo 60,000 na zile za moja kwa moja 22,884 ambapo takwimu zinaonyesha wazi kwamba mchango wa sekta ya utalii katika pato la Taifa umefikia asilimia 27%.

Balozi Seif alieleza kutokana na mchango mkubwa wa sekta ya utalii katika maendeleo ya Taifa Serikali itaendelea kuweka mazingira mazuri ya kitaasisi na kiutendaji ili kukidhi viwango vinavyokubalika kimataifa katika utoaji wa huduma za kitalii.

Alifahamisha kwamba Serikali itazidi kuhamasisha wananchi kuzalisha bidhaa bora na zenye viwango ambazo zitakuwa na uwezo wa kuingia kwenye  soko la utalii na hivyo kuifanya sekta hii kuzidi kuwanufaisha zaidi wananchi ambao ndio walengwa wakuu.

Alieleza kuwa hivi sasa wananchi waliowengi hasa wakulima wamepata fursa ya kuuza bidhaa wanazozalisha mashambani kuuza kwenye hoteli mbali mbali hali ambayo imeongeza upatikanaji wa soko la uhakika wa bidhaa zao.

Alisema kuwa ili sekta ya utalii izidi kukuwa na kuleta tija hakuna budi kwa Serikali kwa kushirikiana na sekta binafsi na wananchi kuimarisha vivutio pamoja na mindombinu itakayowavutia watalii ikiwemo usafi na utunzaji wa mazingira, uwekezaji katika ujenzi wa hoteli zenye viwango bora.

Makamu wa Pili wa Rais wa Zanzibar aliziagiza Taasisi zinazohusika katika kusimamia sekta hiyo kuandaa na kutekeleza mipango itakayoamsha ari ya wananchi kupenda kutembelea maeneo yenye vivutio vya utalii kwa lengo la kukuza utalii wa ndani.

Hata hivyo Balozi Seif alitahadharisha wazi kwamba kuimarika kwa utalii washirika wote wa sekta hiyo hawanabudi kuhakikisha kwamba mapato yatokanayo na  eneo hilo yanakusanywa kikamilifu na kuingia katika mfuko Mkuu wa Serikali.

Aliendelea kusisitiza umuhimu wa kuendelea kudumishwa kwa amani iliyopo hapa nchini ambayo ndiyo kichocheo kikubwa kinachotoa fursa kwa wageni na watalii kupenda kuvitembelea visiwa vya Zanzibar.

Akizungumzia sekta ya kilimo ambayo bado ni tegemeo kubwa la wananchi waliowengi katika kujipatia ajira, kipato,chakula na kuimarisha lishe na afya zao Balozi Seif alisema Serikali inaendelea kutoa msukumo mkubwa kusaidia sekta hiyo ili wananchi waweze kuongeza tija na uzalishaji na hivyo kuimarisha vipato vyao.

Alisema Serikali ya Mapinduzi ya Zanzibar kupitia Wizara ya Kilimo imejiandaa kikamilifu kuhakikisha kwamba huduma za kilimo cha matrekta na zana nyengine za kilimo zinapatikana kwa uhakika na kwa bei nafuu zitakazotoa nafasi kwa  wakulima kuzimudu.

Alisema mpango huo utakwenda sambamba na ongezeko la kiwango cha upatikanaji wa mbegu bora ya mpunga, dawa ya kuulia magugu na mbolea kupitia programu ya ruzuku katika kilimo cha Mpunga.

Makamu wa Pili wa Rais wa Zanzibar alitoa wito kwa wakulima wote wa zao la mpunga nchini kuungana na juhudi zinazochukuliwa na Serikali kwa kutumia fursa zilizopo kuhakikisha wanalima kwa wakati na kufuata kanuni za kilimo bora.

Halkadhalika Balozi Seif akawahimiza wakulima wote wa mazao mengine kuchukuwa juhudi stahiki kwa kufuata ushauri wa mabwana shamba na Mabibi shamba ili nao waweze kuongeza uzalishaji wa mazao yao.

Akigusia suala la udhalilishaji wa kijinsia ambalo linaendelea kuwa changamoto licha ya juhudi zinazochukuliwa za kudhibiti vitendo viovu lakini Balozi Seif alisema bado wapo watu miongoni mwa jamii wanaoendeleza vitendo hivyo.

Alisema ni wajibu wa kila mwana jamii kuzidisha mapambano dhidi ya waovu wanaohusika na matendo hayo kwa kuwafichua na kuwapeleka kwenye vyombo vya sheria  bila ya kuwaonea muhali.

Alisema waovu hao kwa kiasi kikubwa wanavunja utu na heshima za kibinaadamu na kuwasababishia madhara makubwa ya kimwili na kiakili.

“ Watu wote wenye taarifa za waovu hao ni vyema kutosita kufika mahakamani kwa kutoa ushahidi pale wanapohitajika na kuacha kabisa masuala hayo kumalizikia majumbani “. Alisema Balozi Seif.

Kuhusu  utolewaji wa vitambulisho vya Mzanzibari Mkaazi  Makamu wa Pili wa Rais wa Zanzibar aliwakumbusha Wananchi pamoja na Viongozi  hasa wale wa Kisiasa waelewe kwamba huduma hiyo hutolewa kwa mujibu wa sheria nambari 7 ya Mwaka 2005.

Alisema muhusika lazima atimize matakwa ya sheria hiyo kabla ya kupatiwa kitambulisho ambayo ni pamoja na Mzanzibari wa kuzaliwa, mwananchi kukaa katika eneo lake  si chini ya miezi 36 sambamba na kutimiza umri wa miaka 18.

Hata hivyo Balozi Seif alifafanua kuwa kwa mujibu wa kifungu cha 13 { 1 } { 2 } cha sheria hiyo imetoa haki kwa mtu kukata rufaa kwa Mkurugenzi wa Vitambulisho dhidi ya Afisi ya usajili pindipo hakuridhia na mamuzi yanayotolewa  au kwa waziri kama pia hakuridhika na uamuzi wa Mkurugenzi.

Alisema suala la utoaji wa vitambulisho vya Mzanzibari limekuwa na mjadala mkubwa kutokana na baadhi ya wanasiasa na waheshimiwa kulalamikia juu ya baadhi ya wananchi wao kutopatiwa vitambulisho hivyo kwa sababu mbali mbali.

Alielezea imani yake kwamba waheshimiwa wawakilishi, wanasiasa na wananchi hawana sababu  ya kulalamikia  suala hilo ambalo lina utaratibu mzuri uliowekwa kwa  mujibu wa sheria.

Makamu wa Pili wa Rais wa Zanzibar alitanabahisha kwamba suala zima la upatikanaji wa vitambulisho hivyo lisihusishwe na mambo ya kisiasa kwani utaratibu wa kisheria upo. Hivyo ni vyema na wajibu wa kila mwananchi kutumia sheria hiyo katika kutafuta haki yake.

Miswada Minne ya Sheria iliwasilishwa katika Mkutano huo wa 18 wa Baraza la Wawakilishi  na kujadiliwa na wajumbe wa Baraza  hilo ambayo ni Mswada wa sheria ya kuanzisha sheria ya kupunguza na kukabiliana na maafa Zanzibar na Mambo mengine yanayohusiana na hayo.

Mwengine ni Mswada wa sheria ya kuanzisha Taasisi ya ulinzi ya Jeshi la Kujenga Uchumi Zanzibar, Mswada wa sheria ya kufuta sheria ya usimamizi wa mazingira kwa ajili ya maendeleo endelevu nambari 2 ya mwaka 1996 na kuweka badala yake msharti bora ya kuhifadhi, kulinda na kusimamia mazingira pamoja na mswada wa sheria ya maadili ya Viongozi wa umma na kuanzisha Tume ya maadili ya Viongozi na mambo mengine yanayohusiana na hayo.

Baraza la Wawakilishi Zanzibar limeahirishwa hadi Jumatano ya Tarehe 11 Machi mwaka 2015 mnamo saa 3.000  za asubuhi.

Othman Khamis Ame

Ofisi ya Makamu wa Pili wa Rais wa Zanzibar

30/1/2015.