Makamu wa Pili wa Rais wa Zanzibar akiwa pamoja na Sheikh wa
Mkoa wa Dar es salaam kulia yake Al-Hajj Mussa Salum na Mbunge wa Mpendae Mh.
Salum Turky Kushoto yake walipokuwa
kwenye kisimamo cha kiyamu wakati wa
kumsalia Mtume Muhammad {SAW } kwenye sherehe za maulidi yaliyoandaliwa
na Jumuiya ya Sunni Muslim Jamat Jijini Dar es salaam.
Picha na Hassan Issa wa – OMPR – ZNZ.
Press Release:-
Makamu wa Pili wa Rais wa Zanzibar Balozi Seif Ali Iddi
alisema kwambna Waumini wa Dini ya Kiislamu Nchini wanapaswa na wajibu wa
kuisoma Historia ya Kiongozi wa Dini hii Mtume Muhammad { SAW } ili vijana na
jamii yote kwa jumla ielewe kiundani utukufu na ubora wa Dini ya Kiislamu.
Alisema hatua hii itatoa fursa kwa wasomi hao kuzijua
changamoto na mafanikio yanayotokana na uongozi uliotukuka wa Mtume Muhammad {
SAW } ambao ni mfano tosha wa kuigwa kwa waumini pamoja na viongozi wa kada
zote.
Balozi Seif alisema hayo wakati wa sherehe ya maulid ya
kuzaliwa Mtume Muhammad { SAW } yalioyoandaliwa na Baraza la wadhamini wa
Jumuiya ya Sunni Muslim Jamaat iliyopo Mtaa wa Mosque, Kitumbini Jijini Dar es
salaam.
Alisema licha ya kuenea kwa vugu vugu la Dini ya Kiislamu
katika pembe zote za Dunia lakini moyo wa kujitolea kwa baadhi ya waumini
katika harakati za kusimamisha Dini unaonekana kupungua kasi.
Balozi Seif alieleza kuwa jamii imekuwa ikishuhudia madrasa
nyingi nchini zikikosa walimu wa kujitolea katika kusomesha vijana wenzao kwa
dhana ya kudai maslahi yao kwanza badala
ya kuangalia akhera yao.
Alisema ni wajibu wa kila Muumini kuhakikisha kwamba dini ya
kiislamu inasimama kwa hali yoyote ile ili kuunga mkono kazi kubwa aliyoifanya
Kiongozi huyo ambayo alipewa na mola mtukufu kuitekeleza.
Balozi Seifahamisha kwamba Mtume Muhammad alianza harakati
za kusimamisha dini ya Kiislamu mara tu alipopewa utume akiwa na umri wa miaka
40 na kuifanya kazi hiyo kwa muda wa miaka 23.
Hata hivyo Balozi Seif alisema Kioingozi huyo alikumbwa na
changamoto nyingi akizitaja baadhi yake kuwa ni pamoja na kufanyiwa lugha za
kejeli, vitendo vya maudhi pamoja na mapigano kati ya wale waliomfuata na wale
waliomkanusha.
“ Mapigano kati ya wale waliomfuata na wale waliomkanusha lakini pia Mtume Muhammad alipata mafanikio makubwa sana ambayo kila mmoja wetu anatakiwa ajitahidi alau ayakaribie mafanikio hayo kubwa zaidi subra na uvumilivu “. Alisema Balozi Seif.
Makamu wa Pili wa Rais wa Zanzibar Balozi Seif Ali Iddi
alisisitiza kwamba kazi kubwa inayowakabili waislamu katika maisha yao kwa sasa
ni kuhakikisha Historia ya uzawa, malezi na uongozi wa Mtume katika kusimamisha
dini ya Kiislamu inaimarishwa ili wafanikiwe katika maisha yao ya dunia na yale
ya milele.
Balozi Seif aliupongeza Uongozi wa Jumuiya ya Sunni Muslim Jamaat iliyopo Mtaa
wa Mosque, Kitumbini Jijini Dar es salaam kwa jitihada zake za kuandaa hafla
hiyo ya kheir ambayo itaendelea kuwa kielelezo kwa jamii ya Kiislamu hapa
Nchini.
Mapema Mjumbe wa Baraza la wadhamini wa Jumuiya ya Sunni
Muslim Jamat Sheikh Said Abdull – Haji alisema Baraza hilo liko katika
matayarisho ya mwisho ya kuunda Kamati ya Baraza.
Sheikh Said alisema kamati hiyo itapatikana baada ya wana
Jumuiya hiyo kuwachaguwa Viongozi watakaounda Kamati hiyo na kuifanya Jumuiya
kukamilisha Uongozi wake kufuatia misuko suko iliyoipata kwa takriban miaka 21
iliyopita.
Alifahamisha kwamba Sunni Muslim Jamat imejiwekea malengo ya
muda mrefu katika uanzishaji wa taasisi
za Elimu, ujenzi wa nyumba za Makaazi, huduma za afya ili kuijengea uwezo
Jumuiya hiyo iliyoasisiwa kwenye kitovu cha msikiti wao tokea mwaka 1907.
Naye Imamu Mkuu wa Msikiti wa Sunni Muslim Jamat Maulana
Faiz aliwakumbusha waumini wa Dini ya kiislamu kuendelea kushikamana vitendo
vilivyopewa nafasi ya juu na Masahaba waliyosimamia Dini ya Kiislamu.
Maulana Faiz alisema uislamu ni Dini kamili iliyokamilika
muundo wake inayompa uwezo na fursa mwanaadamu kuendesha harakati zake za
kimaisha katika misingi ya amani na uungwana.
Akimkaribisha Makamu wa Pili wa Rais wa Zanzibar Balozi Seif
Ali Iddi kuwawaa-idhi waumini hao Sheikh wa Mkoa wa Dar es salaam Al – Hajj
Mussa Salum alisema yapo matumaini makubwa kwa jumuiya ya Sunni Muslim Jamat ya
ya kusaidia kuendeleza Dini na fikra za
waumini wa Dini ya Kiislamu.
Al – Hajj Mussa Salum alisema Jumuiya hiyo imepita katika
majaribu makubwa ambayo kwa kiasi Fulani yamechangia kupunguza kasi ya malengo
ya Taasisi hiyo ya Kidini.
Katika hafla hiyo ya kusherehekea uzawa wa Mtume Muhammad {
SAW } iliyoandaliwa na Jumuiya ya Sunni Muslim Jamat Makamu wa Pili mwa Rais wa
Zanzibar Balozi Seif Ali Iddi alikabidhi tuzo na vyeti kwa waasisi mbali mbali
waliochangia kuendeleza Jumuiya hiyo.
Othman Khamis Ame
Ofisi ya Makamu wa Pili wa Rais wa Zanzibar
5/1/2014.
