Shamra shamra za Mashindano ya Shirikisho la Michezo ya Wizara, Idara za Serikali (SHIMIWI) jijini Tanga zimehamia katika mchezo wa bao kwa wanaume na wanawake.
Mchezo huo umefanyika Oktoba 13, 2022 katika ukumbi wa Bwalo la Maafisa wa Polisi jijini Tanga na kuhudhuriwa na watazamaji lukuki wakishangilia timu zao ili waweze kushika nafasi ya kwanza hadi ya tatu hatua inayowaongezea alama na kupata vikombe vya ushindi.
Haikuwa kazi rahisi kufikia shamra shamra hizo kwa Ofisi ya Makamu wa Rais pamoja na Wizara ya Afya ambapo wachezaji wao wameibuka kidedea na kushika nafasi ya kwanza katika mchezo wa bao licha ya mchezo kuwa mzuri na mgumu kwa kila timu kwa kuwa timu zote zlijipanga na kujiandaa vizuri kwa mashindano hayo.
Kwa upande wa wanawake, bingwa wa mchezo wa bao ni Ofarasia Muhoha kutoka Wizara ya Afya, nafasi ya pili imekwenda kwa Sheila Mabakila na nafasi ya tatu ikachukuliwa na Jamila Kalambo kutoka Wizara ya Mifugo na Uvuvi.
Aidha, kwa wanaume nafasi ya kwanza imekwenda kwa Jackson Mwakyelu kutoka Ofisi ya Makamu wa Rais, mshindi wa pili ni Shamuni Ibrahim kutoka Wizara ya Uwekezaji, Viwanda na Biashara wakati nafasi ya tatu imekwenda kwa Hashim Rashid kutoka Idara ya Mahakama Tanzania.
Katika mashindano hayo mchezo wa mpira wa miguu, timu ya Idara ya Mahakama imeingia hatua ya fainali baada ya kuifunga timu ya Wizara ya Ulinzi na Jeshi la Kujenga Taifa kwa penati 5-4 baada kutoka sare ya bila kufungana kwa dakika 90 za mchezo huo uliochezwa katika uwanja wa shule ya Sekondari ya Galanos.
Aidha, katika mchezo mwingine wa nusu fainali, timu ya Hazina ya Wizara ya Fedha na Mipango imeshinda kwa penati 4-3 dhidi ya timu ya Wizara ya Ujenzi na Uchukuzi (sekta ya Ujenzi) na kuungana na timu ya Idara ya Mahakama ambao watacheza fainali Oktoba 15, 2022 katika uwanja wa Mkwakwani.
Mashindano ya SHIMIWI 2022 ambayo yanatarajiwa kufikia kilele Oktoba 15, 2022 na yanatarajiwa kufungwa rasmi na Mkuu wa Mkoa wa Tanga Mhe. Omary Mgumba.
 |
| Picha ya pamoja ya mpambano wa mchezo wa bao kwa wanawake uliofanyika katika ukumbi wa Bwalo la Maafisa wa Polisi jijini Tanga ambapo safu ya kushoto ni mpambano wa kusaka nafasi ya kwanza kati ya Ofarasia Muhoha (bingwa) kutoka Wizara ya Afya na mshindi wa pili ni Sheila Mabakila na safu ya kulia ikiwahusisha Jamila Kalambo kutoka Wizara ya Mifugo na Uvuvi na Ester Mnyuku kutoka Wizara ya Utamaduni, Sanaa na Michezo. |
 |
| Mwenyekiti wa Shirikisho la Michezo ya Wizara, Idara za Serikali, Wakala na Mikoa (SHIMIWI) Bw. Daniel Mwalusamba (aliyesimama katikati) akishuhudia mchuano kati Jackson Mwakyeru kutoka Ofisi ya Makamu wa Rais (aliyekaa kulia) ambaye ni mshindi wa kwanza na Shamuni Ibrahim (aliyekaa kushoto) kutoka Wizara ya Uwekezaji, Viwanda na Biashara mshindi wa pili katika mchezo wa bao kwa wanaume mchezo katika mchezo uliyofanyika katika ukumbi wa Bwalo la Maafisa wa Polisi Oktoba 13, 2022 jijini Tanga. Kulia waliosimama ni Katibu wa shirikisho hilo Alex Temba. |
 |
| Mlinzi wa Timu ya Mahakama Gizbert Chentro (Kulia) akijaribu kumkaba Radhan Ukaly wa timu ya Wizara ya Ulinzi, wakati wa mchezo wa nusu fainali ya michuano ya Shirikisho la Michezo ya Wizara na Idara za Serikali (SHIMIWI) uliochezwa katika uwanja wa Shule ya Sekondari Galanos Jijini Tanga. Mahakama ilishinda 5-4. |
 |
| Mshindi wa kwanza katika mchezo wa bao kwa wanaume Jackson Mwakyeru kutoka Ofisi ya Makamu wa Rais (kulia) akipambana na mshindi wa pili Shamuni Ibrahim (kushoto) kutoka Wizara ya Uwekezaji, Viwanda na Biashara katika fainali ya mchezo wa bao ambao umefanyika Oktoba 13, 2022 katika ukumbi wa Bwalo la Maafisa wa Polisi jijini Tanga. |
