RC GAMBO AONGOZA KIKAO CHA KWANZA CHA KAMATI YA AMANI

Nteghenjwa Hosseah – Arusha

Mkuu wa Mkoa wa Arusha  Mhe Mrisho Mashaka Gambo  amekutana na  kamati ya Amani ya Mkoa  ambayo inajumuisha viongozi wa dini mbalimbali zilizoko katoka Mkoa huu kuzungumzia mustakabali  wa Amani  na namna  viongozi hawa wa dini watashirikiana na Serikali ya Awamu ya Tano  katika kuleta maendeleo kwa wananchi ambao ni waumini  wao.

Akizungumza katika Kikao hicho Mhe. Gambo alisema kazi ya Ulinzi wa Amani itakua rahisi sana kupitia  viongozi wa dini ambao wana karama ya kuongea na kubadilisha maisha ya watu bila kutumia nguvu ama  kuwashurutisha isipokua kwa chakula cha roho ambacho hujenga misingi imara ya imani na tabia njema.

Maendeleo ya wananchi hayawezi kupatikana bila Amani kuwepo katika Mkoa wetu ni lazima tusaidiane katika hili dhamira yetu ifanikiwe kwa wepesi zaidi tuna Imani kubwa sana Na viongozi wetu wa dini na ndio maana nikaona ni vyema tukakutana ili tusikie kutoka kwenu ninyi ambao  mnawakilisha kundi kubwa la wananchi na pia kufahamu kero mbalimbali zinazowakwaza wananchi  katika maeneo yenu  alisema Gambo.

Askofu wa Dayosisi ya Kaskazini Kati KKKT Solomon Masangwa akichangia kuhusu masuala yanayoweza kuhatarisha amani alisema kundi  ambalo linatakiwa kuangaliwa kwa jicho la Tatu na litasaidia sana katika ulinzi wa Amani ni waendesha boda boda pamoja na wanachinga ambao kwa sasa wanaonekana kutopewa kipaumbele au hatuwajali kwa kiasi kinachostahili.

Tunapaswa kuangalia namna gani watu wanaofanya shughuli hizi wanakua rasmi kwa kupatiwa maeneo maalumu pamoja na utambulisho utakaowawezesha kufanya kazi zao kwa Amani na kujipatia kipato cha kuendesha maisha yao na si kama walivyo sasa wanafanya kazi hizo katika maeneo yasiyo rasmi na kuhama kila siku hali hii ina wafanya wajihisi kama si sehemu ya Taifa hili hivyo wanaweza kutumika kiurahisi kuhatarisha amani ya Nchi yetu alisema Masangwa.

Akichangia katika viashiria vya uvunjifu wa amani Askofu Dr. Leornard Mwizarubi wa Kanisa la SAYUNI EAG (T) alisema ni vyema Serikali ikajikita katika kutatua changamoto zinazoathiri maisha ya kila siku ya wananchi ili hata sisi viongozi wa dini  tunapoongea na waumini tuwe na vielelezo dhabiti vya kuonyesha namna ambavyo Serikali kero zao zimeshughulikiwa.

Aliendelea kusema “Katika eneo ambalo ninatoa huduma ya Kiroho kwenye Kata za Unga Ltd, Sokoni 1, Daraja II, Sinoni na maeneo ya jirani wakazi wa mitaa hiyo wanapata shida sana ya huduma ya maji Taka na hata katika Kanisa langu inanilazimu kutafuta gari la kunyonya maji taka mara tatu kwa wiki ili kufanya mazingira kuwa safi, sasa kuna maeneo mengine wananchi hao hawana uwezo wa kutafuta gari hilo la kunyonya maji taka hivyo wanaishia kulalamika kwa kuishi katika mazingira machafu”.

Aidha Sheikh Mkuu wa Bakwata mkoa wa Arusha, Shabaan Juma alishkuru Sekretariet ya Mkoa kwa kikao hiki muhimu kwa ustawi wa jamii ya Arusha na kueleza kuwa katika kipindi hiki cha Mpito Nchi yetu inahitaji maombi ya bila kikomo ili kuweza kuvuka salama na tunategemea kuendelea kuona mabadiliko katika kila eneo; Tunaamini si wote  wanafurahia mabadiliko haya hivyo tuna wajibu wa kuwajulisha waumini wetu kuhusu umuhimu wa mabadiliko ya mifumo katika uongozi wa Serikali ya Awamu ya Tano na faida zitakazo patikana kwa Taifa.

Akiwasilisha changamoto katika upande wake Sheikh Shaaban alisema “Kuna ukuaji wa kasi ya makazi holela katika Jiji la Arusha,   Utaratibu wa mipango miji hauzingatiwi na hii inasabisha maeneo mengi kutopitika kwa urahisi hivyo hata itakapotokea dharua sio tahisi kwa wananchi wetu kupata msaada wa haraka, tunaomba wanachi wapimiwe maeneo yao, barabara zifunguliwe ili huduma muhimu ziweze kufika katika maeneo hayo”.

Mkurugenzi wa Idara ya maji safi na maji Taka (AUWASA) Eng. Ruth Koya alisema Taasisi yake inaanza utekelezaji wa Mradi mkubwa wa maji safi na Taka ambao matatizo yote yaliyowasilishwa katika kikao hiki yanayohusiana na maji  yatashughuliwa kupitia mradi huo.

Aliongeza kuwa mradi huo utahusisha uboreshaji wa mioundombinu ya maji safi, Uhamishaji wa mabwawa ya maji Taka(yaliyokuwa Lemara kwa hivi sasa), ununuzi wa magari ya kunyonyea maji machafu pamoja na magari ya kusambaza na kuuza maji safi.

Mkuu wa Mkoa Mge. Gambo alitolea ufafanuzi wa hoja mbalimbali zilizowasilishwa na kuelezea namna ambavyo Changamoto ya Mipango Miji ilivyopata ufumbuzi kupitia ukamilishaji wa  Mpango Mkakati wa Jiji la Arusha (Master Plan) na kuwajulisha wajumbe kuwa mpango umekamilisha na umekwishapitiwa na Halmashauri zote tatu zinazohusika, hivyo kwa hivi sasa utawasilishwa Wizarani na taratibu zote zikikamilika utekelezaji utaanza mara moja.

Kuhusu suala la Machinga na waendesha boda boda boda Rc Gambo alisema Serikali imekwisha anza utaratibu wa kutafuta maeneo salama na rafiki  kwa ajili ya wafanyabishara ndogondogo maarufu kama machinga na tutaongea nao ili tuwe na makubalino ya pamoja.

Aidha kuhusu bodabdoa tumeanza kuwatambua kupitia kwenye uongozi wa mitaa na vituo vyao na tutahakikisha tunaboresha mazingira yoa ya kufanyia kazi na zaidi tunawatafutia  Pikipiki ambazo watapewa Vijana wanaofanya biashara ya boda boda kwa utaratibu maalumu; Itawapasa kurudisha Fedha za Pikipiki tu na kisha kupata umiliki halali ya Chombo hicho tofauti na sasa hivi ambapo wanapewa pikipiki hizo na kulipa mara mbili ya bei kwa matajiri wao ndipo wapate Umiliki alimalizia Gambo.

Mwisho.

Mkuu wa Mkoa wa Arusha Mhe. Mrisho Mashaka Gambo(katikati) katika Picha ya pamoja na Viongozi wa Dini waliohudhuria Kikao cha Kamati ya Amani.

 Mkuu wa Mkoa wa Arusha Mhe. Mrisho Mashaka Gambo akifungua Kikao cha kwanza cha Kamati ya Amani ya viongozi wa dini Mkoa kilichofanyika Ofisini.

  Kamanda wa Takukuru Wilaya ya Arusha Bi. Jacquline Kapila akielezea kazi za Taasisi yake kwa viongozi wa Dini kwenye kikao cha kamati ya Amani.

 Kamanda wa Polisi Mkoa wa Arusha Charles Mkumbo akiongea na viongozi wa Dini wakati wa Kikao cha Kamati ya Amani.

 ASKOFU Mkuu wa Dayosisi ya Kaskazini Kati katika Kanisa la Kiinjili la Kilutheri Tanzania (KKKT) Mkoani Arusha, Solomon Masangwa akioelezea mchango wa viongozi wa Dini katika kuhamasisha amani.

 Sheikh Mkuu wa Bakwata mkoa wa Arusha, Shabaan Juma akichangia kwenye Kikao cha Kamati y Amani kwa kawataka wananchi kudumisha amani na kujenga utamaduni wa kuvumiliana.

 Askofu Dr. Leornard Mwizarubi wa Kanisa la SAYUNI EAG (T) akizungumza katika Kikao cha Kamati ya Amani na kumshkuru RC Gambo kwa kikao hicho na kushauri Kamati hii ikutane mara kwa mara ili kushirikiana kwa karibu na Serikali kutatua kero za wananchi.

 Meneja wa Mamlaka ya Mapato (TRA) Mkoani Arusha Ndg. Apili Mbaruku akijibu hoja za viongozi wa dini wakati wa Kikao cha Kamati ya Amani.

 Mkuu wa Mkoa wa Arusha Mhe. Mrisho Mashaka Gambo(kushoto) katika mazungumzo na ASKOFU Mkuu wa Dayosisi ya Kaskazini Kati (KKKT) Mkoani Arusha, Solomon Masangwa baada ya Kikao cha Kamati ya Amani.  

Wananchi wa Shina la Shams ,Kata ya Elerai,Jijini Arusha waongea na Viongozi wa Chama Wilaya ya Arusha.

Katibu wa CCM Wilaya ya Arusha na Katibu wa Siasa na Uenezi wafanya ziara ya Kazi ya Kujenga na Kuimarisha Chama Cha Mapinduzi kwa kukutana na Wananchi kwenye Shina kusikiliza matatizo yao na kuyapatia majawabu.

• Kero ya Maji yajitokeza
• Wazee waomba kupatiwa kadi za Bima ya Afya
• Wananchi walalamika kukosa huduma kwenye Zahanati ya Elerai siku za Jumamosi na Jumapili na nyakati za usiku.
• Wakala wa ukusanyaji taka (Kimbute) walalamikiwa.
• Viongozi wa Chama walalamikiwa.

Viongozi wa Wilaya waahidi kuzitafutia majibu kero hizo.

 Katibu wa CCM Wilaya ya Arusha Ndg Feruzy Bano akijibu baadhi ya kero zilizowasilishwa kwenye Mkutano wa wananchi wa Mtaa wa Shams ,ulioandaliwa na Balozi wa Shina hilo Mama Maeda,kwa ajili kusikiliza matatizo yao na kuyapatia majibu. Katika Mkutano pia alikuwepo Katibu wa Siasa na Uenezi Ndg Jasper Kishumbua (aliyevaa t-shirt ya njano)

Balozi / Mwenyekiti wa Shina Mama Faustina E. Maeda (katikati) ,kulia ni Mjumbe wa Kamati ya Uongozi ya Shina Bi Joyce Edward na Mwenyekiti wa Mtaa wa Ngurumo Ndg Abubakari Jumbe wakiwa katika kikao na Wananchi wa Shina la Shams ,Mtaa wa Shams ,Kata ya Elerai katika mkutano wa Wananchi na  Viongozi wa CCM Wilaya ya kufafanua na kuelezea mambo mbali mbali na kusikiliza matatizo yao na kuyatafutia majawabu .Kama inavyoelekezwa kwenye Ilani ya CCM ya Uchaguzi Mkuu mwaka 2015 ,Ibara 185 (b).

 Baadhi ya Wazee Maarufu waliohudhuria katika Mkutano huo,akiwemo Mzee Ngurumo (alivaa miwani) na wazee wengine,wakifuatilia kwa makini majibu yaliyokuwa yanatolewa na Katibu wa Siasa na Uenezi CCM Wilaya ya Arusha Ndg Jasper Kishumbua (hayupo katika picha).

 Baadhi ya Wananchi  waliohudhuria katika Mkutano huo,wakifuatilia kwa makini majibu yaliyokuwa yanatolewa na Katibu wa Siasa na Uenezi CCM Wilaya ya Arusha Ndg Jasper Kishumbua (hayupo katika picha).

Katibu wa CCM Wilaya ya Arusha Ndg Feruzy Bano akijibu baadhi ya kero zilizowasilishwa kwenye Mkutano wa wananchi wa Mtaa wa Shams ,ulioandaliwa na Balozi wa Shina hilo Mama Maeda,kwa ajili kusikiliza matatizo yao na kuyapatia majibu. Katika Mkutano pia alikuwepo Katibu wa Siasa na Uenezi Ndg Jasper Kishumbua (aliyevaa t-shirt ya njano)

Magufuli hakamatiki

Rais John Magufuli akisikiliza swali kutoka kwa Mhariri Mtendaji wa Magazeti ya Serikali (TSN), Dk Jim Yonazi.(Picha na Mroki Mroki).

 Imeandikwa na Oscar Mbuza    | Habari Leo

AKITUMIA saa 2 na dakika 45 kuzungumza na wahariri wa vyombo mbalimbali vya habari vya ndani na nje ya nchi, Rais John Magufuli ameweza kukata kiu ya Watanzania waliotaka kujua mwenendo wa serikali yake katika kipindi cha mwaka mmoja tangu ilipoingia madarakani.

Pamoja na kuelezea utekelezaji wa miradi mbalimbali kwa ufasaha, Rais Magufuli amedhihirisha uwezo wa kiwango cha juu wa kuhifadhi takwimu za sekta mbalimbali kichwani. Pia alidhihirisha kiwango cha juu cha sanaa ya lugha katika kuzungumzia namna masuala mbalimbali ya kitaifa na kimataifa, yalivyopatiwa ufumbuzi.

Rais alitumia nafasi hiyo kuzungumzia ahadi zake kuhusu kukuza uchumi wa taifa, kuifanya nchi kuwa ya viwanda, usimamiaji ukusanyaji wa mapato, nidhamu katika uwajibikaji, nidhamu katika matumizi na kupambana na rushwa na ufisadi.

Maeneo mengine ni ongezeko la fedha kwenye miradi ya maendeleo, uboreshaji wa miundombinu, ukuzaji wa utalii na uboreshaji wa shughuli za kilimo, uboreshaji wa vyanzo vya uhakika vya nishati, uboreshaji wa sekta ya elimu na uboreshaji wa sekta ya afya.

Akizungumzia namna serikali yake ilivyosimamia suala la ukuzaji wa uchumi katika kipindi cha mwaka mmoja uliopita, Rais Magufuli alisema kasi ya ukuaji wa uchumi ni ya kuridhisha kutokana na mwaka uliopita kukua kwa asilimia 7.

Alisema katika mwaka huu uchumi unatazamiwa kukua kwa asilimia 7.2 huku dalili za kufikiwa kwa hilo, ikijidhihirisha katika kiashiria cha robo mbili za mwaka, ambapo umeweza kukua kwa asilimia 7.9.

“Tunaelekea kuzuri, naweza kusema bado tupo kwenye line (mstari) nzuri. Kinachotakiwa ni kuendelea kupata sapoti ya Watanzania wote. “Ukuaji wa uchumi wa Taifa letu umeifanya Tanzania kuwa nchi ya pili yenye uchumi unaokua kwa kasi baada ya Cote D’ivoire (Ivory Coast),” alisema Rais ambaye pia alisema kupungua kwa mfumuko wa bei kutoka asilimia 7 hadi 4.5 ni moja ya viashiria.

Hata hivyo akijibu hoja kuwa katika kipindi hicho wananchi wamekuwa na maisha magumu kutokana na fedha kutoweka mifukoni, Rais Magufuli alisisitiza; “Hela hazipo mfukoni kwa wapiga dili, na zitaendelea kutoweka, wanaofanya kazi kwa bidii ndio watakaojaa fedha mifukoni. Pamoja na kusisitiza kuwa katika uongozi wake atapigana kufa kupona katika kuhakikisha kuwa inazaliwa Tanzania mpya, Rais Magufuli pia alisisitiza; “Sijafika ninapopataka. Nataka Tanzania isiwe nchi ya kuomba misaada ila iwe nchi ya kutoa misaada.

“Mara kwa mara nimekuwa nasema, nchi hii ni tajiri, ila inategemea ni namna gani tunautumia utajiri huu tuliopewa na Mungu, kama tunataka kuipeleka nchi yetu mbele sawa, lakini kama tunataka kuirudisha nyuma sawa pia, maana kupanga ni kuchagua. “Tuna kila aina ya utajiri wa madini, yapo madini mengine ambayo hayapatikani mahala pengine popote duniani, lakini Tanzania yapo na mengine yanazidi kugundulika, ni lazima tutumie utajiri huu kwa manufaa ya Watanzania masikini.”

Kuhusu kubana matumizi serikalini, Rais Magufuli alisema serikali imeendelea kusimamia eneo hilo kwa nguvu zake zote, huku akisema yeye kama mfano ameweza kubana matumizi yake kwa safari za nje, ambapo katika safari 47 alizoalikwa amekwenda 3, ikiwa ni pamoja na kukwepa mikutano aliyowakilishwa na mabalozi.

“Mbali ya kutuma Mabalozi pia nimekuwa namtuma Makamu wa Rais, Waziri Mkuu, Mawaziri na Naibu Mawaziri. Nikienda mimi kama Rais, safari yangu inaweza kuwa na watu karibu 40 au 60, lakini nikituma Waziri anaweza kwenda mtu mmoja au wawili. Nafanya hivyo ili tuwe na Tanzania mpya,” alisema.

Hata hivyo, akionesha hatua hiyo kutokuwa na athari katika ukuzaji wa diplomasia ya kiuchumi na uhusiano wa kimataifa, Rais Magufuli alisema katika wakati huo ameweza kuwaalika nyumbani marais karibu saba; na kusaini nao mikataba mbalimbali ya kiushirikiano wa kiuchumi.

Akitupia jicho katika ukusanyaji wa mapato ya serikali, Rais alisema eneo hilo limekuwa na mafanikio makubwa, hasa kutokana na ushahidi kuwa mara tu ilipoingia madarakani, serikali yake ilikuza makusanyo kutoka Sh bilioni 800 kwa mwezi hadi kufikia Sh trilioni 1.2, huku kiwango cha juu zaidi kikirekodiwa mwezi Septemba yalipofikia Sh trilioni 1.592.

Alisema kuimarika kwa makusanyo hayo kuliifanya serikali kuongeza fedha inayoelekeza kwenye bajeti yake hadi kufikia Sh trilioni 29.5 mwaka 2016, huku fedha zinazoelekezwa kwenye miradi ya maendeleo zikiongezwa kutoka asilimia 26 hadi kufikia asilimia 40.

Alisema fedha zilizotengwa kwenye maeneo ya kisekta, pia zimeboreka ambapo katika sekta ya miundombinu, zimetengwa Sh trilioni 5.47 na kufanya miradi inayoendelea kupewa msukumo Lakini, pia kuanza miradi mipya, ukiwemo ujenzi wa Reli ya Kati ya kisasa (standard gauge), uliotengewa Sh trilioni 1 ili uanze mwaka huu katika awamu ya kwanza ya kutoka Dar es Salaam hadi Morogoro.

Kwa upande wa usafiri wa anga, Rais Magufuli alisema serikali imeweza kununua ndege mpya mbili aina ya Bombardier Q 400 kwa fedha taslimu, lakini pia imeagiza ndege nyingine tatu mpya ambazo matengenezo yake yanaendelea, moja ikiwa ni Bombardier Q 400 na mbili Jet SC 300 zenye uwezo wa kubeba abiria kati ya 137 na 150 huku asilimia 30 ya fedha za awali zikiwa zimeshalipwa na za kumalizia zipo.

“Ndege moja ya Bombardier itawasili nchini ifikapo Juni mwaka kesho na nyingine mbili zitawasili mwanzoni mwa mwaka 2018. Lakini pia tumetenga Dola za Marekani milioni 10 ili kuanza mazungumzo na Kampuni ya Boeing ili watutengenezee ndege moja kubwa yenye uwezo wa kubeba abiria 242, mazungumzo ya awali yataanza mwezi huu,” alisema.

Rais alisema lengo la serikali ni kuwa na ndege 7 ifikapo katikati ya mwaka 2018, zitakazowezesha kutimia kwa ndoto ya kuifanya Tanzania kuwa kitovu cha utalii, na hasa pale safari za ndege za moja kwa moja zitakapoanza kutoka Marekani na Beijing nchini China.

Alisema kuhusu ujenzi wa barabara na madaraja miradi inaendelea. Akizungumzia Sekta ya Kilimo, Rais Magufuli alisema Sh trilioni 1.56 zimeelekezwa katika eneo hilo huku akitoa baadhi ya mifano kama ule wa upatikanaji wa soko la uhakika la korosho katika mikoa ya Lindi na Mtwara, lililowezesha kupanda kwa bei ya kilo moja kutoka Sh 1,000 hadi kufikia Sh 4,000.

Alisema bei ya pamba pia imepanda hadi kufikia Sh 1,300 kwa kilo. Kuhusu Sekta ya Nishati alisema imetengewa Sh trilioni 1.3 na alitumia hadhira ya jana kuelezea baadhi ya utekelezaji wa miradi kama ujenzi wa Mradi wa Umeme wa Kinyerezi 1, wenye uwezo wa kuzalisha megawati 333 ambapo Dola za Marekani milioni 20 zimetolewa.

Lakini, pia ujenzi wa Mradi wa Kinyerezi II utakaozalisha megawati 240, Kinyerezi III megawati 600 na Kinyerezi IV megawati 300, na kuwezesha kuzalishwa kwa megawati 5,000 ifikapo mwaka 2020 kutoka megawati 1,400 za sasa.

Katika kudhihirisha kauli yake ya kuifanya Tanzania kuwa nchi ya viwanda, Rais Magufuli alisema hatua zimechukuliwa kwa serikali yake kuhamasisha, kukaribisha, na kutenga maeneo ya uwekezaji.

Alisema hilo linafanyika chini ya Mpango wa Ushirikiano baina ya Sekta ya Umma na Binafsi (PPP) na si vinginevyo. Alizungumzia pia kutengwa kwa Sh trilioni 4.47 katika Sekta ya Elimu, hatua iliyowezesha kutekeleza kwa mpango wa kutoa elimu bure kuanzia darasa la saba hadi kidato cha nne kwa kutoa Sh bilioni 18.77 kila mwezi.

Mafanikio mengine ni kuongezeka kwa fedha za mikopo ya wanafunzi wa vyuo vya elimu ya juu kutoka Sh bilioni 340 katika bajeti iliyopita hadi Sh bilioni 473, hatua iliyowezesha wanafunzi wanaonufaika kuongezeka kutoka 98,000 hadi 124,00, huku pia serikali ikiongeza Sh bilioni 10 zingine na kufikia Sh bilioni 483.

Picha ⏩⏩

Rais wa Jamhuri ya Muungano wa Tanzania Dkt John Pombe Magufuli akijibu maswali
kutoka kwa wahariri wa vyombo mbalimbali aliokutana nao kwa mahojiano leo Ijumaa Oktoba 4, 2016 katika ukumbi wa mikutano wa Ikulu jijini Dar es salaam.

Rais wa Jamhuri ya Muungano wa Tanzania Dkt John Pombe Magufuli akimsikiliza Mkurugenzi Mkuu wa Shirika la Utangazaji la Taifa (TBC) Dkt. Ayoub Rioba wakati wa kupokea  maswali kutoka kwa wahariri wa vyombo mbalimbali aliokutana nao kwa mahojiano leo Ijumaa Oktoba 4, 2016 katika ukumbi wa mikutano wa Ikulu jijini Dar es salaam.

 Rais wa Jamhuri ya Muungano wa Tanzania Dkt John Pombe Magufuli akimsikiliza mwanahabari Sammy Awami wa BBC wakati akiuliza maswali kutoka kwa wahariri wa vyombo mbalimbali aliokutana nao kwa mahojiano leo Ijumaa Oktoba 4, 2016 katika ukumbi w3a mikutano wa Ikulu jijini Dar es salaam.

 Rais wa Jamhuri ya Muungano wa Tanzania Dkt John Pombe Magufuli akimsikiliza Mhariri Mtendaji wa magazeti ya Serikali (TSN) Dkt. Jim Yonazi wakati akiuliza maswali.

 Rais wa Jamhuri ya Muungano wa Tanzania Dkt John Pombe Magufuli akimsikiliza Mtangazaji Tido Mhando wakati akiuliza maswali kutoka kwa wahariri wa vyombo mbalimbali aliokutana nao kwa mahojiano leo Ijumaa Oktoba 4, 2016 katika ukumbi wa mikutano wa Ikulu jijini Dar es salaam.

 Rais wa Jamhuri ya Muungano wa Tanzania Dkt John Pombe Magufuli akimsikiliza Msanii Mrisho Mpoto akiimbwa wimbo wa "SIJONZE" wakati alipokutana na wahariri kwa mahojiano leo Ijumaa Oktoba 4, 2016 katika ukumbi w3a mikutano wa Ikulu jijini Dar es salaam.PICHA NA IKULU.

Video 1 ⏩⏩

Video 2 ⏩⏩

Mh. Mohammed Aboud Mohammed akutana na Wajumbe wa Kamati ya kudumu ya Baraza la Wawakilishi ya kuwaenzi Viongozi wa Kitaifa.

 Wajumbe wa Kamati ya kudumu ya Baraza la Wawakilishi ya kuwaenzi Viongozi wa Kitaifa wakiwa kwenye Kikao cha majumuisho kuafuatia ziara yao katika Taasisi zilizo chini ya Ofisi ya Makamu wa Pili wa Rais wa Zanzibar kilichofanyika ukumbi mdogo wa Baraza la Wawakilishi Mbweni.

 Baadhi ya Wakurugenzi wa Idara na Taasisi zilizo chini ya Ofisi ya Makamu wa Pili wa Rais wa Zanzibar wakifuatilia Kikao cha Majumuisho cha Kamati ya Baraza l;a Wawakilishi ya kuwaenzi Viongozi wa Kitaifa.

Kikao hicho kiliongozwa na Mwenyekiti wake Mh. Omar Seif Abeid akiwa pia Mwakilishi wa Jimbo la Konde Kaskazini Pemba wa Pili kutoka kushoto aliyevaa Koti na jeusi na kofia.

Waziri wa Nchi Ofisi ya Makamu wa Pili wa Rais wa Zanzibar Mh. Mohammed Aboud Mohammed wa Pili kutoka Kulia akijibu baadhi ya hoja za Wajumbe wa Kamati ya kudumu ya Baraza la Wawakilishi ya kuwaenzi Viongozi wa Kitaifa.
Picha na – OMPR – ZNZ.
                                         

Press Release:-

Taasisi za Umma Nchini zinaweza kupata ufanisi mkubwa katika utekelezaji wa majukumu yake kitaifa endapo Serikali Kuu itaendelea kuzijengea uwezo na miundombinu imara taasisi hizo kwa faida ya kutoa huduma pana zaidi kwa Wananchi.

Wajumbe wa Kamati ya kudumu ya Baraza la Wawakilishi ya kuwaenzi Viongozi wa Kitaifa walieleza hayo wakati wa Kikao cha majumuisho ya ziara waliyofanya kuangalia uwajibikaji katika Taasisi zilizo chini ya Ofisi ya Makamu wa Pili wa Rais wa Zanzibar.

Kikao hicho cha majumuisho kilichowakutanisha Viongozi watendaji wa Taasisi za  Ofisi ya Makamu wa Pili wa Rais pamoja na wajumbe wa Kamati hiyo kilifanyika ukumbi mdogo wa Baraza la Wawakilishi Mbweni Nje kidogo ya Mji wa Zanzibar na kuongozwa na Mwenyekiti wa Mh. Omar Seif Abeid akiwa pia Mwakilishi wa Jimbo la Konde Kaskazini Pemba.

Wajumbe hao walisema zipo changamoto nyingi zinazozikumba Taasisi za Wizara hiyo wakizitaja baadhi yake kuwa ni pamoja na uchakavu wa gari za Tume ya Uchaguzi Zanzibar,asimilia 21% ya mgao wa nafasi za ajira katika Taasisi za Muungano pamoja na matumizi mabaya ya elimu ya mitandao inayopotosha Tamaduni za Jamii hasa Vijana.

Akigusia wimbi la changamoto ya Dawa za Kulevya zilizoathiri kwa kiasi Fulani kundi kubwa la Vijana, Mjumbe wa Kamati hiyo kutoka Jimbo la Mpendae Mh. Moh’d Said Dimwa alisema udhibiti wa Dawa za kulevya bado unaonekana kuwa mdogo hapa Nchini.

Mh. Dimwa alisema wakati umefika kwa Serikali kupitia vyombo vyake vya ulinzi kuongeza nguvu za udhibiti wa tatizo hilo licha ya kwamba  mazingira halisi ya Visiwa vya Unguja na Pemba kuzunguukwa na bahari pande zote.

Alisisitiza kwamba kinachopaswa kuchukuliwa hatua na kufanyiwa kazi kwa wakati huu ni jinsi wahusika wakuu wanaohusika na uingizaji wa biashara hiyo haramu wanavyofuatiliwa na kuchukuliwa hatua za kisheria badala ya nguvu nyingi kuelekezwa kwa watumiaji wa Dawa hizo.

Naye Mwenyekiti wa Kamati hiyo ya kuwaenzi Viongozi wa Kitaifa ya Baraza la Wawakilishi Zanzibar Mh. Omar Seif Abeid aliishauri Tume ya Kitaifa ya kuratibu na udhibiti wa Dawa za Kulevya Zanzibar kuandaa mipango madhubuti ya kurekebisha mapungufu yaliyojitokeza kwenye changamoto hilo.

Mh. Omar alisema mipango hiyo ni vyema ikazingatiwa zaidi katika kuhakikisha  ushiriki wa Wananchi katika sehemu mbali mbali hasa yale maeneo sugu yaliyoshamiri biashara hiyo wanasaidia katika mapambano dhidi ya Dawa za kulevya.

Akitoa ufafanuzi Afisa Mipango kutoka Tume ya Kitaifa ya kuratibu na udhibiti wa Dawa za Kulevya Zanzibar Nd. Khamis Omar Hassan alisema bado upo umuhimu wa Tume hiyo kuendelea kufanya kazi licha ya kasoro chache zinazokwaza katika uwajibikaji wake.

Nd. Omar alisema Tume hiyo imefanya kazi kubwa ya kutoa elimu inayohusu athari ya dawa za kulevya na kupatikana mafanikio makubwa yaliyochangia kupungua kwa matumizi ya Dawa za kulevya katika Majimbo yote ya Visiwa vya Zanzibar.

Afisa Mipango huyo kutoka Tume ya Kitaifa ya kuratibu na udhibiti wa Dawa za Kulevya Zanzibar aliiomba Serikali kuu kupitia Kamati hiyo kuipa meno Tume hiyo ili iweze kutekeleza vyema majukumu yake.

Akijibu baadhi ya hoja za Wajumbe wa Kamati hiyo Waziri wa Nchi Ofisi ya Makamu wa Pili wa Rais wa Zanzibar Mh. Mohammed Aboud Mohammed alisema Serikali itaendelea kujitahidi katika kuona janga la Dawa za kulevya linaondoka au kupungua kabisa nchini.

Waziri Aboud alifahamisha kwamba juhudi zitafanywa  na Serikali kuaangalia njia muwafaka ya kuwatumia wataalamu wa udhibiti wa Dawa za Kulevya kutoa taaluma kwa Viongozi, Wananchi na hata vijana ili kuelewa kwa kina madhara ya janga hilo.

Aliwapongeza Wajumbe wa Kamati ya kuwaenzi Viongozi wa Kitaifa ya Baraza la Wawakilishi Zanzibar kwa kazi kubwa iliyofanya na kuandaa Taarifa nzuri ya ziara yao ambayo kwa kiasi kikubwa imesaidia kuleta uwiano wa ushirikiano baina ya Kamati hiyo na Taasisi walizozitembelea.

Ziara za Kamati mbali mbali za Baraza la Wawakilishi Zanzibar hufanywa kila baada ya miezi Mitatu kuangalia  utekelezaji wa shughuli za Serikali katika Sekta tofauti hapa Nchini.

Othman Khamis Ame

Ofisi ya Makamu wa Pili wa Rais wa Zanzibar

4/11/2016.