WAZIRI WA IRELAND AZURU TANGA AKUTANA NA DKT. BURIANI.

 Waziri wa Mambo ya Nje na Biashara wa Ireland anayeshughulikia Ushirikiano wa Kimataifa, Maendeleo, na Diaspora, Mhe. Neale Richmond

 

Waziri wa Mambo ya Nje na Biashara wa Ireland anayeshughulikia Ushirikiano wa Kimataifa, Maendeleo, na Diaspora, Mhe. Neale Richmond, amefanya ziara ya siku moja mkoani Tanga ambako amekutana na kuzungumza na Mkuu wa Mkoa huo, Mhe. Dkt. Batilda Buriani.

 

Katika mazungumzo yao, viongozi hao wameangazia namna ya kuendelea kushirikiana kupitia sekta za kimkakati, ikiwemo afya, ufugaji, uchumi wa bluu, uhifadhi wa mazingira ya pwani na baharini, uwezeshaji wa kijinsia, na maendeleo ya vijana.

 

Mhe. Dkt. Buriani ameishukuru Serikali ya Ireland kwa mchango wake katika miradi mbalimbali ya maendeleo mkoani humo hasa katika sekta za afya, ufugaji, na uwezeshaji kiuchumi kwa wanawake na vijana.

 

Ameeleza dhamira ya mkoa wa Tanga kuendele kushirikiana na Ireland ili kuimarisha maendeleo ya kijamii na kiuchumi.

 

Aidha, Mkuu wa Mkoa ametoa wito kwa Ireland kuangazia fursa za uwekezaji katika sekta za utafiti wa maziwa, uvuvi, na afya, huku akisisitiza umuhimu wa kuimarisha uchumi wa bluu kama nyenzo ya maendeleo endelevu katika mkoa huo.

 

Kwa upande wake, Mhe. Richmond ameahidi kuendeleza ushirikiano kati ya Ireland na Tanzania, akisisitiza kuwa nchi yake itaendelea kuunga mkono juhudi za Tanzania katika sekta za afya, usawa wa kijinsia, uwezeshaji wa wanawake na mifugo.

 

Katika ziara yake mkoani Tanga, Waziri Richmond ameambatana na Balozi wa Tanzania nchini Uingereza, ambaye pia anawakilisha Ireland, Mhe. Mbelwa Kairuki, Balozi wa Ireland nchini Tanzania, Mhe. Nicola Brennan, Mkurugenzi wa Idara ya Ulaya na Amerika katika Wizara ya Mambo ya Nje na Ushirikiano wa Afrika Mashariki, Balozi Swahiba Mndeme, pamoja na maafisa wengine wa serikali kutoka Tanzania na Ireland.

Mkuu wa Mkoa wa Tanga Mhe. Dkt Batilda Salha Buriani (kushoto) na Waziri wa Mambo ya Nje  Na Biashara Ireland anayeshughulikia masuala ya Ushirikiano wa Kimataifa, Maendeleo na Diaspora (Kulia)

Mkuu wa Mkoa wa Tanga Mhe. Dkt Batilda Salha Buriani

Waziri wa Mambo ya Nje  Na Biashara Ireland anayeshughulikia masuala ya Ushirikiano wa Kimataifa, Maendeleo na Diaspora

WAZIRI WA MAMBO YA NJE WA IRELAND ATEMBELEA MIRADI YA MAENDELEO MKOANI TANGA

 

Waziri wa Mambo ya Nje na Biashara wa Ireland anayeshughulikia ushirikiano wa kimataifa, maendeleo, na diaspora, Mhe. Neale Richmond, amefanya ziara rasmi mkoani Tanga kwa lengo la kukagua miradi mbalimbali ya maendeleo inayofadhiliwa na Serikali ya Ireland.

 

Katika ziara yake, Mhe. Richmond alitembelea Mradi wa Faida Maziwa, unaotekelezwa na Taasisi ya Utafiti wa Mifugo Tanzania (TALIRI). Mradi huo unalenga kuboresha uzalishaji wa maziwa, kuongeza thamani ya bidhaa za maziwa, na kuinua kipato cha wafugaji wa ng’ombe wa maziwa.

 

Aidha, ameweka mkazo katika matumizi ya mbegu bora za malisho, hatua inayosaidia kupunguza migogoro kati ya wafugaji na wakulima, na hivyo kuimarisha ustawi wa maisha ya jamii ya wakulima na wafugaji mkoani Tanga.

 

Pia, Mhe. Richmond alitembelea kituo cha afya kinachofadhiliwa na Benjamin Mkapa Foundation kwa kushirikiana na Shirika la Afya la Amref, ambacho ni miongoni mwa taasisi zinazopokea msaada kutoka Serikali ya Ireland.

 

Katika ziara hiyo, alishuhudia juhudi zinazofanywa katika kuboresha huduma za afya, hususan afya ya mama na mtoto, pamoja na uwekezaji katika miundombinu ya huduma za afya.

 

Aidha, Waziri Richmond alipata fursa ya kuzungumza na viongozi wa mashirika mbalimbali yakiwemo Amref, Benjamin Mkapa Foundation, Femina, na Uzikwasa, pamoja na vikundi vya kijamii vinavyotekeleza miradi ya maendeleo katika sekta tofauti.

 

Akihitimisha ziara yake mkoani humo Mhe. Richmond alisisitiza dhamira ya Serikali ya Ireland kuendelea kushirikiana na Tanzania katika kukuza maendeleo endelevu kupitia miradi yenye tija kwa wananchi.

 

Pia alitoa pongezi kwa wadau wote wanaoshiriki katika utekelezaji wa miradi hiyo na kusisitiza kuwa ni muhimu kuimarisha sekta za afya, kilimo, na biashara ili kukuza uchumi wa wananchi na Taifa kwa ujumla.

RAIS MSTAAFU DKT. KIKWETE ZIARANI JAPAN: KUKUTANA NA VIONGOZI, KUSUKUMA AJENDA YA ELIMU

 

Rais mstaafu, Dkt. Jakaya Mrisho Kikwete, akiwa  Mwenyekiti wa Bodi ya Shirika la Elimu la Kimataifa (GPE), yupo Tokyo nchini Japan kwa ziara maalum yenye lengo la kuimarisha ushirikiano kati ya GPE na serikali ya Japan katika kutatua changamoto za elimu ya msingi katika nchi zinazoendelea.

 

Katika siku yake ya kwanza Tokyo, Dkt. Kikwete amefanya mazungumzo na Waziri wa Fedha wa Japan, Mhe. Shin-ichi Yokohama, pamoja na Naibu wake, Mhe. Atsushi Mimura. Mazungumzo hayo yalijikita katika ushirikiano wa kifedha ili kusaidia miradi ya elimu inayosimamiwa na GPE, ikiwemo upatikanaji wa rasilimali kwa ajili ya kuboresha mazingira ya kujifunzia kwa watoto wa nchi zinazoendelea.

 

Baada ya mazungumzo hayo, Rais Mstaafu Kikwete alikutana na Bw. Akihiko Tanaka, Rais wa Shirika la Ushirikiano wa Kimataifa la Japan (JICA). Shirika hili limekuwa na mchango mkubwa katika miradi ya maendeleo barani Afrika, na mazungumzo yalihusu namna JICA inaweza kusaidia jitihada za GPE katika kukuza elimu bora.

 

Dkt. Kikwete pia alikutana na Bw. Yohei Sasakawa, Mwenyekiti wa Taasisi ya Nippon. Bw. Sasakawa, mwenye umri wa miaka 86, ni mtu mashuhuri wa kusaidia miradi ya kijamii duniani. Katika mazungumzo yao, waligusia nafasi ya sekta binafsi katika kusaidia elimu, hasa kupitia taasisi zisizo za kiserikali. Vilevile, Bw. Sasakawa alishangaza dunia baada ya kufanikisha kupanda Mlima Kilimanjaro tarehe 12 Februari 2024, kama sehemu ya maadhimisho ya miaka 85 ya kuzaliwa kwake – hatua inayothibitisha kuwa umri si kikwazo kwa ndoto kubwa.

 

Katika siku zinazofuata, Rais Mstaafu Kikwete anatarajiwa kukutana na Waziri wa Mambo ya Nje wa Japan, Mhe. T. Miyaji, pamoja na wabunge wa Bunge la Japan, ambapo ajenda kuu itakuwa nafasi ya elimu na teknolojia katika maendeleo ya jamii. Pia, atashiriki mijadala maalum kuhusu elimu na teknolojia, kufanya mahojiano na vyombo vya habari, pamoja na kukutana na Mhe. Tetsuro Yano, Rais wa Taasisi ya AFRECO, ambayo inahusika na kukuza ushirikiano kati ya Japan na Afrika.

 

Ziara hii ni sehemu ya juhudi endelevu za Dkt. Kikwete katika kuboresha mifumo ya elimu duniani, hasa katika nchi zinazoendelea. Japan ni mshirika muhimu wa maendeleo ya elimu barani Afrika, na ushirikiano huu unaweza kuwa na mchango mkubwa katika kuhakikisha watoto wengi zaidi wanapata fursa ya elimu bora.

Rais Mstaafu Dkt Jakaya Mrisho Kikwete akiwa na Waziri wa Fedha wa Japan, Mhe. Shin-ichi Yokohama,jijini Tokyo

Rais Mstaafu Dkt. Jakaya Mrisho Kikwete akiwa na Bw. Yohei Sasakawa, Mwenyekiti wa Taasisi ya Nippon jijini Tokyo. Bw. Sasakawa, mwenye umri wa miaka 86, ni mtu mashuhuri wa kusaidia miradi ya kijamii duniani. Katika mazungumzo yao, waligusia nafasi ya sekta binafsi katika kusaidia elimu, hasa kupitia taasisi zisizo za kiserikali. Vilevile, Bw. Sasakawa alishangaza dunia baada ya kufanikisha kupanda Mlima Kilimanjaro tarehe 12 Februari 2024, kama sehemu ya maadhimisho ya miaka 85 ya kuzaliwa kwake – hatua inayothibitisha kuwa umri si kikwazo kwa ndoto kubwa.

Rais Mstaafu Dkt. Jakaya Mrisho Kikwete akiwa katika mazungumzo na Bw. Yohei Sasakawa, Mwenyekiti wa Taasisi ya Nippo, na maofisa wake waandamizi jijini Tokyo.

MAKAMU WA PILI AFUTURISHA TIBIRINZI

 Makamu wa Pili wa Rais wa Zanzibar Alhajj Hemed Suleiman Abdulla amesema maendeleo yanayoonekana Nchini yanatokana na umoja na Mshikamano wa Wananchi bila ya kujali tofauti zao.

 

Alhajj Hemed ameyasema hayo alipojumuika na Waumini wa Dini ya Kiislamu kutoka Mikoa miwili ya Pemba katika Iftar aliyoiandaa kwa Wananchi hao iliyofanyika katika viwanja vya kufurahishia watoto Tibirinzi Wilaya ya chake-chake Mkoa wa Kusini Pemba.

 

Amesema Serikali inayoongozaa na Rais Dkt. Hussein Ali Mwinyi inaendelea kusisistiza umoja na Mshikamano ambavyo ndio Nguzo pekee ya kufikia azma yake ya kuwaletea maendeleo Wananchi wake.

 

Makamu wa Pili wa Rais wa Zanzibar amesema Miradi inayojengwa na Serikali inaelekezwa Unguja na Pemba kama vile Skuli, Hospital, Miundombinu ya Maji, Barabara, Miradi ya uwezeshaji Wananchi kiuchumi ili kuweka usawa kwa Wananchi wa pande zote mbili.

 

Makamu wa Pili wa Rais wa Zanzibar amewashukuru Wananchi kwa kuitikia mualiko huo na kuungana nae ambapo amesema Kitendo hicho ni cha kiungwana na kinaonesha mapenzi na umoja uliopo Baina ya Wananchi na Viongozi.

 

Akitoa Shukurani kwa Niaba ya Wananchi hao Bwana Muhammad Nassor Salim amemshukuru Makamu wa Pili wa Rais wa Zanzibar kwa kuendeleza utamaduni wa kufutari pamoja na Wananchi na kueleza kuwa suala hilo ni la kuigwa na ni Ibada yenye Fadhila kubwa mbele ya Allah (S.W)

 

Amesema Wananchi wa Mikoa Miwili ya Pemba wameridhika na maendeleo yanayoonekana Nchini yanayotokana na unawajibikaji katika Kila Idara katika kuwatumikia Wananchi wa Zanzibar.

 

Imetolewa na Kitengo cha Habari(OMPR) 

Tarehe 12.03.2025

MAKAMU WA PILI AKIGAWA IFTAR SKULI ZA KUSINI PEMBA

 Makamu wa Pili wa Rais wa Zanzibar Mhe. Hemed Suleiman Abdulla amesema Serikali ya Mapinduzi ya Zanzibar inaendelea kuweka Mazingira wezeshi kwa Wanafunzi kiweza kujisomea bila ya changamoto yoyote.

 

Mhe. Hemed ameyasema hayo katika ziara ya kuwatembelea na kuwapatia Iftari Wanafunzi wanaokaa Dakhalia katika Skuli za Mkoa wa Kusini Pemba.

 

Alhajj Hemed amesema Serikali imeongeza bajeti ya Bodi ya Mikopo ya Elimu ya juu na kufikia Bilioni 33 kwa mwaka wa fedha 2024/ 2025 kwa lengo la kuhakikisha kila mwanafunzi anaestahiki kupatiwa mkopo kuanzia ngazi ya Diploma hadi shahada ya uzamivu anapatiwa fursa hio.

 

Amesema kwa kutambua umuhimu wa Sekta ya Elimu Serikali imejenga Vyuo vya Amali katika maeneo tofauti ili kuwajengea uwezo wale ambao hawakubahatika kuendelea na Elimu ya juu ili waweze kujendelea kiuchumi

 

Aidha Makamu wa Pili wa Rais wa Zanzibar amewapongeza Walimu kwa kuendelea kujitolea kuwasomesha Wanafunzi na kuwahakikishia kuwa Serikali imejipanga kuwaongezea maslahi zaidi pamoja na kuwaongezea ujuzi ili kuzidi kuzalisha wasomi katika Taifa la Tanzania.

 

Akitoa shukurani kwa niaba ya Wanafunzi Mwalimu Mkuu wa Skuli ya Fidel Castro Mwalimu Seif Hamad Khalfan amesema wameipokea sadaka hio kwa moyo mkunjufu na kuahidi wataitumia kwa malengo yaliyokusudiwa ili Wanafunzi waweze kusoma kwa utulivu wakiwa na uhakika wa Iftar kwa kipindi chote watakachokuwa skulini hapo hasa katika mwezi wa Ramadhan.

 

Mwalimu Seif amemuahidi Makamu wa Pili wa Rais wa Zanzibar kuwa wataendelea kupambana kwa juhudi zote ili waendelee kupata matokeo mazuri kwa maslahi mapana ya wanafunzi na Taifa kwa ujumla.

 

Akitoa shukran kwa niaba ya wanafunzi wenzake Ndg. Salim Ramadhan Pandu ambae ni Rais wa Serikali ya Wanafunzi kutoka skuli ya Sekondari ya Dkt. Salim Ahmed salim amemshukuru Mhe. Hemed kwa kuona umuhimu wa kuwafutarisha Wanafunzi wanaoishi katika Dakhalia ili kuondokana na changamoto ya Iftari.

 

Wamempongeza Rais wa Zanzibar na Mwenyekiti wa Baraza la Mapinduzi Mhe. Dkt. Hussein Ali Mwinyi kwa juhudi anazozichukua katika kukuza Sekta ya Elimu nchini na kuahidi kufanya vizuri katika Mitihani yao.

 

Nae Mkuu wa Wilaya ya Mkoani Mhe Hamad Omar Bakari amempongeza Makamu wa Pili wa Rais wa Zanzibar kwa kuendelea kugawa Iftari kwa Wanafunzi wanaokaa Dakhalia hatua ambayo inaamsha Hamasa kwa Wanafunzi kusoma kwa bidii na kuwa na uhakika wa Iftari Katja mwezi Mtukufu wa Ramadhan.

 

Amesema Serikali za Wilaya na Mkoa zinajitahidi kutoa mashirikiano kwa Skuli zote ili kufikia lengo la kuanzishwa kwa Dakhalia Nchini na kuwaomba wazazi na walezi kuendeleza mashirikiano ili kuzalisha Taifa lenye Elimu na maadili mema.

 

Katika ziara hiyo Makamu wa Pili wa Rais wa Zanzibar ametembelea na kuwapatia Iftari Wanafunzi wanaokaa Dakhalia katika Skuli ya Sekondari Fidel Castro, Skuli ya Sekondari Dkt. Salim Ahmed Salim, Skuli ya Sekondari Madungu, Skuli ya Sekondari Mohamed J. Pindua na Skuli ya Sekondari kiwani.

 

…………………..

Imetolewa na Kitengo cha habari (OMPR)

12.03.2025

Makamu wa Pili wa Rais wa Zanzibar Mhe. Hemed Suleiman Abdulla akikabidhi Iftari kwa Wanafunzi wa Skuli ya Sekondari Fidel Casro wanaojiandaa na Mitihani yao ya Kidato cha sita mwaka huu

Wanafunzi wa Skuli ya Sekondari Fidel Casro wanaojiandaa na Mitihani yao ya Kidato cha sita mwaka huu

Rais wa Serikali ya Wanafunzi Skuli ya Sekondari Fidel Casro Dhulkifli Ali Khatib akitoa shukurani kwa niaba ya wananfunzi wenzake katika ziara ya Makamu wa Pili wa Rais wa Zanzibar Mhe. Hemed Suleiman Abdulla kukabidhi Iftari Mkuu wa Skuli ya Sekondari Fidel Casro

Makamu wa Pili wa Rais wa Zanzibar Mhe. Hemed Suleiman Abdulla akikabidhi Iftari kwa Wanafunzi wa Skuli ya Sekondari Dkt. Salim Ahmed Salim wanaojiandaa na Mitihani yao ya Kidato cha sita mwaka huu

MAKAMU WA PILI WA RAIS WA ZANZIBAR AJUMUIKA NA WAUMINI WA DINI YA KIISLAMU WA MASJID AL AMIN KIBWENI SALA YA IJUMAA

 

Makamu wa Pili wa Rais wa Zanzibar Alhajj Hemed Suleiman Abdulla amewataka wazazi na walezi kutoa mashirikiano kwa walimu wa Madrasa ili kusaidia upatikanaji wa Elimu bora kwa watoto. 

Alhajj Hemed ameyasema hayo alipokuwa akiwasalimia Waumini wa Dini ya Kiislamu wa Masjid Al Amin Kibweni alipojumuika nao katika Ibada ya Sala ya Ijumaa. 

Amesema jamii ina uhitaji Mkubwa wa wasomi wa Masomo ya kidini na ya kidunia hivyo, ni vyema kwa wazazi kutoa mashirikiano kwa walimu wa Madrasa ili kupata kizazi chenye hofu ya Mungu hatua ambayo itapelekea kumaliza vitendo viovu katika Jamii. 

Aidha Mhe. Hemed ameupongeza Uongozi wa Mskiti huo kwa kuwa na kawaida ya kuwasaidia Mayatima hasa katika kipindi cha mwezi Mtukufu wa Ramadhan jambo ambalo linasaidia kuingiza furaha kwa watoto hao ambao hujihisi wapo sawa na watoto wengine. 

Amesema Uislamu umeeleza Faida nyingi anazopata anaemhurumia Yatima ikiwa ni pamoja na kuwa karibu Peponi na Mtume Muhammad (S.A.W) na kuwataka Waumini kuendeleza jambo hilo kwa Kila hali ili kufikia lengo la kuanzishwa kwake. 

Sambamba na hayo Mhe. Hemed ameendelea kuwakumbusha Waislamu na wazanzibar kwa ujumla umuhimu wa kulinda Amani na Utulivu uliopo ili kutoa fursa kwa Serikali kuendelee kuwaletea maendeleo Wananchi wake. 

Aidha Makamu wa Pili wa Rais wa Zanzibar amepokea kilio cha Wananchi hao kuhusu barabara inayotaka KMKM Kibweni Hadi Mwanyanya na kuwaahidi kuwa Serikali ya Awamu ya nane inayoongozaa na Rais Dkt. Hussein Ali Mwinyi imepanga kuzijenga barabara zote kwa kiwqngo cha Lami ili kuwaondolea usumbufu Wananchi. 

Akitoa Khutba katika Sala ya Ijumaa Shekh Yussuf Muhammed Yussuf Ameeleza kuwa Mwezi wa Ramadhan ni mwezi wa kuzidisha Ibada na kujikurubisha na Allah na kuachana na mambo yote yenye kupunguza fadhila za mwezi mtukufu wa Ramadhan. 

Amesema Mwezi wa Ramadhan ni Msimu pekee ambao M/Mungu (S.A.W) huwa karibu na waja wake hivyo, ni vyema Kila mmoja kuutumia vyema Msimu huu ili kupata kheri na Fadhila zinazopatikana ndani yake. 

Wakati huo huo Makamu wa Pili wa Rais wa Zanzibar Alhajj Hemed Suleiman Abdulla amemtembelea na kumjuulia hali aliewahi kuwa Diwani wa Magomeni Bi Arafa Mohammed Said (G7) Nyumbani kwake Mwanyanya Wilaya ya Magharibi 'A'

 

 

…………………………...

Abdulrahim Khamis

Afisi ya Makamu wa Pili wa Rais wa Zanzibar

07/03/2025