BREAKING NEWS: MADIWANI WA JIJI LA ARUSHA WAWEKA REKODI YA KUGOMEA VIKAO

KWA MWAKA WA FEDHA WA 2016/2017 PEKEE VIMEAHIRISHWA VIKAO 5 KUTOKANA NA MADIWANI. KUGOMA KWA MADAI YA KUINGILIWA NA KUBURUZWA NA SERIKALI KUPITIA MKURUGENZI WA JIJI.

 WAFANYA BARAZA LA KUFUNGA MWAKA BILA TAARIFA ZA ROBO YA 3 NA YA 4 KWA KUGOMEA VIKAO HIVYO KWA LENGO LA KUIKOMOA SERIKALI.

Msuguano mkali kati ya madiwani na serikali kuu unazidi kupamba moto ambapo Madiwani wa Jiji la Arusha wamelazimika kufanya baraza la kufunga mwaka  mnamo 29 Julai 2017 huku kukiwa hakuna mihutasari wala taarifa za:

• ·Robo ya 3 (Januari hadi Machi 2017) 

• ·Robo ya 4 (April hadi Juni 2017) za kamati nyeti ya fedha na utawala. 

• ·Vilevile vikao viwili vya baraza vilivunjika cha robo ya kwanza na kingine cha baraza maalum vyote kutokana na vurugu na kushutumiana kati ya Wajumbe na Mkurugenzi wa Jiji Athumani Kihamia kwa tuhuma za kutoheshimiana hasa katika maamuzi wanayoyatoa wakidai kinachotekelezwa kwa kiasi kikubwa ni maamuzi ya mkuu wa mkoa wa Arusha Mrisho Gambo na Mkuu wa Wilaya ya Arusha Gabriel Daqqaro badala ya maamuzi ya madiwani ambapo ilibaki kidogo ngumi zichapwe katika baraza maalum.

• ·Pia kikao cha robo ya 2 ya kamati ya mipango miji kilivujika kwa madai ya kuingiliwa kiutendaji na ofisi ya RC tuhuma hizi zilitolewa na mbunge Godbless Lema.

1. Baraza la robo ya I lilivunjika baada ya wajumbe wengi kutoka ukumbini na kukimbilia mahakamani kusikiliza kesi ya mbunge.

2. Baraza maalum lilivunjika baada ya diwani mmoja kumporomoshea matusi mkurugenzi wa jiji ambapo ilibaki kidogo zipigwe kavukavu na madiwani wengi waliposimama  kama ishara ya kumvamia mkurugenzi ndipo mkurugenzi huyo akalazimika kukimbia ukumbini kukwepa kipigo hata hivyo ilibidi kikao kirudiwe chini ya usimamizi wa katibu tawala wa mkoa yeye mwenyewe mhe Richard Kwitega ambapo kiliisha kwa mbinde na mkurugenzi siku hiyo hakuhudhuria aliwakilishwa na  mhandisi wa jiji.

3. Kamati ya mipango miji ilivunjwa na mbunge akidai mpaka RC atakapoacha kuingilia masuala ya hospitali inayojengwa na ya wafadili ajenda ambayo haikuwa na uhusiano na kikao hicho.

4. Kamati ya fedha robo ya 3 wajumbe walitoka ukumbini na kwenda polisi kufuatilia dhamana ya meya aliyekuwa anashikiliwa na jeshi hilo kwa kosa la kufanya mkusanyiko usiokubalika katika shule ya luck vicent akidai anapeleka rambirambi.

5. Kamati ya fedha ya robo ya 4 walikataa mjadala wakidai wanataka kwanza wakae cha robo ya 3 ambacho wanasahau kwamba walikigomea.

Vikao vyote hivyo 5 vilivunjika bila sababu inayokubalika kikanuni.

SWALI: JE MEYA WA JIJI LA ARUSHA ANA HAKI YA KUJIITA MEYA BORA KWA VURUGU HIZI ZA MADIWANI  MEYA, NA MBUNGE?

Licha ya kuvunjika vikao hivi hata ambavyo vimemalizika bado kumekuwa na mivutano mikali kati ya  madiwan kwa upande mmojai na mkurugenzi na wakuu wake wa idara kwa upande mwingine..
Mvutano huu ulisababisha ofisi ya rais TAMISEMI kuunda tume kuchunguza na kisha kutoa maelekezo kwa meya na mkurugenzi ambao ni viongozi wa pande zinazovutana lakini haikusaidia kwa kuwa meya hana ubavu wa kumpinga mbunge.

Makamu wa Pili wa Rais wa Zanzibar ahitimisha kilele cha maadhimisho ya siku ya Mwani ya Kongano Bunifu la Mwani Zanzibar

Makamu wa Pili wa Rais wa Zanzibar Balozi Seif Ali Iddi akipokea maandamano ya Wazalishaji wa zao la Mwani katika sherehe za maadhimisho ya Siku ya Mwani Duniani zilizofanyika Uwanja wa Malindi Mjini Zanzibar.

 Akina Mama wazalishaji wa zao la Mwani wakionyesha bidhaa zao kwenye maandamano ya Siku ya Mwani Duniani zilizofanyika Malindi ambapo Mgeni Rasmi ni Balozi Seif Ali Iddi.

 Bibi Maryam Pandu Kweleza wa Kikundi cha ushirika cha Kazi Moto Bwejuu akimfahamisha Balozi Seif  jinsi ya ukulima wa zao la mwani unavyoendeshwa kwenye maonyesha ya bidhaa zinazozalishwa na zao hilo hapo Malindi.

 Balozi Seif na Waziri wa Kilimo, Maliasili, Mifugo na Uvuvi Mh. Hamad Rashid Mohamed wakiangalia Mwani uliopea tayari kwa ajili ya kutengenezwa mali ghafi ya bidhaa mbali mbali.

Nyuma ya Mh. Hamad Rashid ni Mwenyeketi na Muwezeshaji wa Kongano la Ubunifu wa Mwani Dr. Flower Msuya akishuhudia kitendo hicho huku Bibi Marya Kweleza akiendelea kutoa maelezo.

 Balozi Seif akiridhika na bidhaa  safi za vyakula na Juisi zilizotengenezwa na wazalishaji wa mwani kutoka vikundi mbali vya akina mama wakati akikagua maonyesho ya bidhaa hizo.

Balozi Seif akiangalia sabuni ya maji iliyotengenezwa na Kikundi cha  akina Mama wa Kijiji cha Makangale Micheweni Pemba ambayo imetumia Mali ghafi  ya Mwani.

Picha na – OMPR – ZNZ.

Press  Release:-

Serikali inaendelea kuwaunga Mkono Wananchi kwa kuwajengea uwezo ikiwemo fursa za mikopo pamoja na kuongeza kasi katika kutafuta masoko  mapya ili kuona Wakulima  wa kilimo cha Mwani wanaongeza kiwango cha uzalishaji na uwezo wa ubunifu.

Hatua hiyo italeta tija zaidi kwa Wakulima  wa Kilimo hicho kilichoanza kulimwa Nchini takriban kwa karibu  Miaka 30 sasa na kushirikisha vijiji zaidi ya 50 ili kuweza kujikwamua kiuchumi na kuongeza fursa kwa Taifa katika kukuza mapato yake .

Makamu wa Pili wa Rais wa Zanzibar balozi Seif Ali Iddi alitoa kauli hiyo wakati  wa kilele cha maadhimisho ya siku ya Mwani ya Kongano Bunifu la Mwani Zanzibar yaliyofanyika katika viwanja vya Michezo vya Malindi Mjini Zanzibar.

Balozi Seif  alisema mwenendo wa mapato kwa Wananchi unaonekana kuongezeka siku hadi siku na kuonyesha  haja kwa Serikali kuendelea kutilia mkazo uzalishaji wa zao Mwani kwa vile ni sekta ya tatu kwa kuleta tija kwa Taifa ikitanguliwa na Utalii na Karafuu na ni zao la pili kwa kusafirishwa nje ya Nchi likitanguliwa na Karafuu.

Alisema Sekta hiyo tayari imeshatoa ajira za kudumu kwa zaidi ya Wakulima 23,000 na kuna ajira nyingi ambazo hutokea kipindi cha msimu wa kupanda, kuvuna na kusarifu Mwani.

Alieleza kwamba faida imeanza kuonekana kupitia zao la Mwani Kiuchumi ambapo Wananchi kutoka Vijiji mbali mbali vya Zanzibar  na hata baadhi ya Wilaya za Tanzania Bara walijishughulisha na zao hilo ambapo asilimia kubwa ya Wakulima wake ni Akinamama.

Balozi Seif alifahamisha  kwamba Serikali ya Mapinduzi ya Zanzibar inazungumza na wadau mbali mbali wa ndani na nje ya Nchi ili waanzishe Viwanda vodogo vidogo vya kuweza kulifanyia kazi zao hilo hapa nchini pamoja  na kuimarisha soko na bei yake.

Makamu wa Pili wa Rais wa Zanzibar alisema Serikali inafahamisha kuwa pamoja na faida inayopatikana katika uzalishaji wa zao la Mwani lakini bado Sekta hiyo imekumbwa na changamoto kubwa ikiwemo kutofahamika kwa bei yake pamoja na utaratibu wa leseni kwa Wafanyabiashara wa Mwani.

Alisema katika kutatua changamoto za Masoko, Kongano la Mwani kwa kushirikiana na Shirika la Milele Zanzibar Foundation waliamua kuweka Siku ya Mwani ili kutoa nafasi kwa Jamii kujua matumizi halisi ya zao hilo na kulifanya litumike zaidi Nchini na kupunguza utegemezi mkubwa wa soko la nje.

Balozi Seif alitoa rai ya kuchukuliwa hatua za makusudi katika kuvitumia vyombo vya Habari Nchini na Nje ya Nchi kuutangaza Mwani kwa upana zaidi ili Wananchi  wapate mwamko juu ya zao la Mwani na sio kusubiri Makongano kwa ajili ya kujitangaza.

Amempongeza Mwenyekiti na Mwezeshaji wa Kongano la Mwani Dr. Flower  Msuya kwa uwamuzi wake wa kushirikiana na Wizara ya Kilimo Zanzibar pamoja na Shirika la Milele Foundation Zanzibar kuwa bega kwa bega na Wakulima katika kuzitambua changamoto zao na kuzitafutia ufumbuzi wa kudumu.

Makamu wa Pili wa Rais wa Zanzibar aliwaahidi wadau wa zao la Mwani kwamba Serikali ya Mapinduzi ya Zanzibar imesikia kilio chao kinachotokana na kodi kubwa la Bidhaa hizo wanazotozwa.

Alisema juhudi zitachukuliwa katika kuona kodi hizo zinapunguzwa au kuondoshwa kabisa ili kuwapa fursa ya kuweza kuliendeleza kwa vile limeshonyesha muelekeo wa kuongeza mapato yao.

Mapema Mwenyekiti na Mwezeshaji wa Kongano la Ubunifu wa Mwani Dr. Flower Msuya alisema bidhaa za mwani hivi sasa zimefikia 50  ikilinganishwa na bidhaa moja tuu iliyokuwa ikizalishwa na Kikundi cha Tusife Moyo cha Kijiji cha Kidoti mnamo Mwaka 2006.

Dr. Flower alisema mipango ya baadae ya ya Taasisi hiyo ni kuendelea kutengeneza bidhaa zinazotokana  na zao la Mwani baada ya kufanyiwa utafiti uliothibitisha kwamba bidhaa hiyo ina matumizi mengi mchanganyiko ikiwemo chakula.

Akitoa salamu za Taasisi ya Milele Zanzibar Foundation iliyoratibu hafla hiyo ya siku ya Mwani Duniani, Mwakilishi wa Milele Zanzibar bibi  Khadija Sharifu alisema Taasisi yake inakusudia kuwaleta Wataalamu wa kigeni kwa ajili ya kuwapatia mafunzo wazalishaji wa mwani.

Bibi Khadija alisema Wataalamu wa Milele wamegundua kwamba Sekta ya Mwani  inaweza kuwakomboa wananchi walio wengi kwa kutoa ajira kubwa ambapo kwa sasa tayari imetoa ajira ya watu zaidi ya 23,000 tokea kuanza kwa sekta hii nchini Tanzania.

Akimkaribisha mgeni rasmi kwenye siku hiyo ya Mwani Duniani Waziri wa Kilimo, Mali asili, Mifugo na Uvuvi Zanzibar Mheshimwa Hamad Rasid Mohamed alisema jamii inapaswa kubadilika katika utaratibu wao wa nlishe na kupoenda kutumia mazao ya Mwani kwa lengo la kujenga afya zao.

Waziri Rashid alisema zao la Mwani kwa utafiti wa kitalaamu linaonyesha kukinga maradhi mbali mbali ikiwemo ukanda wa jeshi,  Mshtuko wa Moyo pamoja na maradhi yanayodhoofisha upungufu wa Damu kutokana na ulaji ovyo wa vyakula vya makopo.

Mapema Makamu wa Pili wa Rais wa Zanzibar Balozi Seif alipokea maandamano ya wazalishaji wa zao la mwani kutoka wilaya mbali mbali za Unguja na Pemba na baadaye kukagua bidhaa zao wanazozalisha kutokana na  mali ghafi hiyo ya Mwani.

Wakulima hao walimueleza Balozi Changamoto wanazopambana nazo katika harakati zao za kulima zao hilo kukausha hadi kukamilika kwa ajili ya soko ambapo walisema  kodi ya bidhaa iwanayotozwa kuhusiana na bidhaa ya zao hilo imekuwa ikiwakatisha tamaa.

Walieleza pia upo upungufu wa ukosefu wa mashine ya kukaushia mwani ambayo kwa sasa inapatikana  Kidoti Mkoa wa Kaskazini Unguja pamoja na bei ndogo ya zao hiyo isiyolingana na gharama za uzalishaji wake.

Kongano Bunifu la Mwani Zanzibar lilianzishwa Mwaka 2006 kwa kupitia Mpango wa Makongano Bunifu Afrika unaosimamiwa na Tume ya Sayansi Teknolojia Tanzania {COSTECH} ili kuunga mkono juhudi zinazochukiwa na Serikali. 

Mpango huo wa Makongano Bunifu ulianza na Makongano Manane kwa Tanzania Bara na Kongano Moja tu la Mwani  kwa Zanzibar  Tokea kubuniwa kwake ambapo kwa sasa tayari yapo Makongano 70 kwa Bara na Manane kwa Zanzibar.

Zao Mwani limekuwa likitumika kwa kutengeneza Sabuni, Mafuta ya kujipaka, shampuu na vyakula vya kama Juisi keki, jam, kachumbari na kupikwa kama mboga sambamba na utengenezaji wa dawa za Binaaadamu, vipodozi na chakula cha mifugo.

Ujumbe wa Mwaka huu wa Siku ya Mwani Duniani unaeleza Mwani kwa afya, Mwani kwa kipato na Mwani kwa uwezeshaji.

Othman Khamis Ame

Ofisi ya Makamu wa Pili wa Rais wa Zanzibar

23/7/2017.

BREAKING NEWS : KIKAO CHA KAMATI YA FEDHA JIJINI ARUSHA CHAVUNJIKA TENA LEO.

MBUNGE LEMA NA NAIBU MEYA WAMUONYA MKURUGENZI.

Kwa mara nyingine madiwani wa kamati ya fedha jijini Arusha leo wamegomea kuendelea na kikao cha robo ya nne cha kamati hiyo kwa madai kuwa hadi wafanye kikao cha robo ya tatu kwanza ambacho pia walikigomea mwezi April mwaka huu. Wajumbe hao wakiongozwa na mbunge wa Arusha mjini Godbless Lema walisema wapo tayari kwa lolote litakalowatokea lakini hawapo tayari kuendelea na kikao. Walisema kikao cha robo ya tatu kiligomewa na wajumbe kwa kuwa serikali ilimkamata meya wao Kalisti Lazaro akitoa rambirambi kwa kukusanya watu bila kibali.

Hata hivyo meya huyo hakuwepo katika kikao hicho cha leo na haikufahamika alipo tangu alipovuliwa madaraka ya ukatibu wa chadema mkoa wa Arusha wiki iliyopita. Mkurugenzi wa jiji la Arusha Bw. Athumani Kihamia pamoja na wakuu wa idara wote walishangazwa na mgomo huo wa madiwani kwa kuwa vikao vya kamati hiyo vya miezi ya April na mei vimefanyika kama kawaida. Diwani wa viti maalum katika kamati hiyo aliyejulikana kwa jina moja la Sabina amemdokeza mtoa habari hizi kuwa watafanya hivyo hadi mkurugenzi huyu atakapoondolewa au posho zetu alizozikata kwa kushirikiana na mkuu wa mkoa na mkuu wa wilaya zitakaporejeshwa na hayo ni maagizo maalum ya mbunge na viongozi wa chama. " Katika baraza la madiwani la mwezi huu mei tutamkataa mkurugenzi huyu ili watafute pa kumpeleka , tangu afike hali imekuwa mbaya kwa watumishi na madiwani.

Tumemjulisha Katibu mkuu ofisi ya raisi tawala za mikoa na selikali za mitaa mara kadhaa tunaamini atatuelewa. Wampeleke wanapotaka ni dikteta sana hata Kaliua waliwahi kumkataa. Anamsikiliza DC na RC sisi anatuona kama watu wasiokuwa na maana, Safari hii tumemchoka na mbunge Lema ameapa kutorudi nyuma kwenye hili" alisikika naibu meya akilalama muda mfupi baada ya kikao kuvunjika. Alipotafutwa Mkurugenzi aelezee hili jambo hakupatikana ingawa mkuu wa kitengo kimojawapo katika jiji la Arusha amedokeza kwamba mvutano huu hautakwisha kwa kuwa madiwani hawa wa Chadema hawayatambui mamlaka na majukumu ya DC na RC kuhusu usimamizi wa jiji na mkurugenzi huyu hapendi kupelekwa pelekwa yeye anacheza na kanuni tu. Hadi sasa hakuna shughuli yoyote ya jiji iliyowahi kusimama licha ya madiwani hawa kumgomea mkurugenzi huyu mara kwa mara karibu vikao 5 sasa kwa nyakati tofauti vimevunjika.

NI KUSUBIRI NA KUONA NINI KITATOKEA TAREHE 28 MEI SIKU YA BARAZA LA MADIWANI

DC wa zamani, mbunge wakabana koo uenyekiti CCM Shinyanga

Mbunge wa Shinyanga Mjini,. Ezekiel Maige.

WANACHAMA 26 wa Chama Cha Mapinduzi (CCM) wamejitokeza kuwania uenyekiti wa chama hicho mkoani Shinyanga akiwamo aliyewahi kushikilia wadhifa huo na mkuu wa wilaya wa zamani, Charles Gishuli, Mbunge wa Msalala, Ezekiel Maige pamoja na wanawake wawili.

Katibu wa CCM Mkoa wa Shinyanga, Haula Kachwamba alisema jana kwamba wagombea wote waliochukua fomu wamerudisha kwa wakati. Alieleza kuwa katika nafasi ya Ujumbe wa Halmashauri Kuu ya Mkoa wapo wanachama 12, wajumbe wa NEC Taifa Tanzania Bara wapo 12 na sita wanataka kuwa Katibu wa Siasa na Uenezi.

Kachwamba alisema wanawake wawili ambao ni Angela Joseph na Juliana Billu wamejitokeza kuwania nafasi ya Uenyekiti pamoja na Gishuli na wagombea wengine ambao ni Michael Bundala, Khalfani Mandwa, Sendema Luhende, Nassoro Waryoba, Charles Simon, Bathromeo Mwanansia, Joseph Raulent na Justine Sheka.

Pia wamo Maxmine Mazulla, Erasto Theonest, Shija Malisha, Luhende Richard, Emmanuel Mlimandago, Mabala Mlolwa, Jonh Makune, Salumu Simba, Swetbert Nkuba, Cornel Ngudungi, Ally Manzi, Festo Kang’ombe, Nuhu Mnoni, Ezekiel Maige na Thomas Chuma.

Aliwataja wanaotaka NEC Taifa ni Richard Luhende, Sweetbert Nkuba, Mola Zabroni, Mussa Jonas, Abed Aljabri, Gerad Mwanzia, Peter Daniel, Gasper Kileo, Margaye Makune, Bernard Shigella, Joyce Masunga na Solomoni Matoba.

Kwa upande wa NEC Tanzania Bara, waliojiotokeza ni James Masunga, Gikula Madulu, Donald Tilusasila, Hassan Mwendapole, Khalfan Mashimba, Awadhi Aboud, Abeid Aljabri, Emmanuel Luhende, Erasto Lushekya, Mussa Ngangalla, Saleh Sizya na Meshack Mashigalla. Aliwataja waliojitokeza nafasi ya Katibu wa Siasa na Uenezi ni Msanii Masele, Margaye Makune, Maxmine Mazulla, Emmanuel Mlimandago, Jacqueline Brayi na Mussa Ngangalla.

Everton watwaa ubingwa ardhi ya Tanzania

Mshabiki wa Man U avamia uwanja kumkubatia Wayne Rooney wakati Everton ikiifunga Gor Mahia 2-1

EVERTON ya Ligi Kuu England imetwaa kombe la SportPesa katika ardhi ya Tanzania baada ya kuifunga Gor Mahia ya Kenya 2-1 katika uwanja wa Taifa jijini Dar es Salaam leo Alhamisi.

Pamoja na ubingwa huo, nyota wa zamani wa Manchester United, Wayne Rooney, ndiye aliyekuwa gumzo ndani na nje ya dimba baada ya kufunga goli kwa mkwaju wa mbali katika dakika ya 34 ya mchezo baada ya kubanwa vilivyo kwa muda mrefu na walinzi wa Gor Mahia.

Hata hivyo goli hilo lilidumu dakika tatu tu kwani dakika ya 37, Jacques Tuyisende aliisawazishia Gor Mahia kwa kichwa baada ya mabeki wa Everton kushindwa kuokoa kona na timu hizo kwenda mapumziko zikiwa sare ya 1-1.

Kipindi cha pili kilianza kwa kasi huku timu hiyo ya England ikitaka bao la pili kwa udi na uvumba lakini mashutu yao yaligonga mwamba huku mengine yakiokolewa na mabeki wa Gor Mahia.

Hata hivyo, Dowel Davies aliiandikia Everton goli la pili katika dakika ya 81 baada ya kufunga mkwaju mkali uliomshinda golikipa wa Gor Mahia na kuifanya timu hiyo ya EPL kuweka historia ya kuchukua kombe hilo hapa nchini.

BREAKING NEWS: MADIWANI WAJIFUNGIA MASAA 5 KUHUSU KUMKATAA MKURUGENZI WA JIJI BW. ATHUMANI KIHAMIA.

MADIWANI  WAJIFUNGIA MASAA 5 KUHUSU KUMKATAA MKURUGENZI WA JIJI BW. ATHUMANI KIHAMIA.

Madiwani hao wakiongozwa na mbunge  wa Arusha mjini Godbless Lema walijiorodhesha majina kwa idadi ya theluthi moja ya madiwani wote kwa lengo la kuitisha baraza maalum la kumkataa mkurugenzi huyo ambaye wanamtuhumu kuwa tangu alipoingia amekuwa na Kazi moja ya kuvuruga madiwani wa Chadema.

Awali desemba 2016 TAMISEMI iliunda tume ya watu 5 kufuatilia utendaji kazi wa mkurugenzi huyu lakini bado habadiliki. Madiwani  hao hivi karibuni  mnamo tarehe 23 juni 2017 walijifungia katika ukumbi wa mikutano wa halmashauri kumjadili mkurugenzi huyo kwa tuhuma za   kupuuza maazimio ya vikao na kutekeleza ya kwake na washirika wake. amekuwa  akiwaweka ndani ndani madiwani kwa kutumia polisi na kulazimisha maamuzi yasiyo ya madiwani kuhusu upangishaji wa maduka ya jiji na kutowaondoa wamachinga mjini na mengineyo mengi.  Baada ya mjadala mzito yafuatayo yaliamuliwa dhidi ya mkurugenzi  huyo.

1. Apelekwe kwenye kamati ya maadili inayoongozwa na Profesa Mosha ili asomewe  tuhuma hizo za kuendesha halmashauri kibabe.

2. Baada ya hapo baraza maalum la madiwani kuitishwa na    kumsomea tuhuma na  kumkataa siku hiyohiyo.

3. Endapo maamuzi ya kumkataa yakipuuzwa baraza la madiwani litavunjwa kuliko kuendelea kuongozwa na mkurugenzi huyu ambaye hatabiriki na haeleweki anachokitaka.

4. Kama ilivyo kwa RC Mrisho Gambo mkurugenzi  huyu amekuwa akiundiwa tume na hata kupelekwa PCCB kila Mara hasa alipokuwa Kaliua mkoani Tabora kwa kuvurugana  na madiwani na kukataa kutekeleza maazimio ya vikao ambapo alipohamishwa walifanya sherehe.

5. Baraza likivunjwa itatengenezwa migogoro Ili mabaraza mengine ya halmashauri zinazoongozwa na Chadema zivunjwe kisha maandamano yaanze nchi mzima.  

Akiongea na chanzo hiki diwani mmoja wa viti  maalum Chadema amesema kwa ufupi mitego yote ya kumnasa Mkurugenzi huyu ni kama  imeshindikana ikiwemo kumtegeshea asaini nyaraka zenye utata kwa kuwatumia wakuu wa idara au kumtengenezea ajali ya gari au kumteka au   kumchafua ikiwemo  kumteka  mwalimu Batuli Kisaya wa shule ya msingi ya Unga limited.  

"Tukifika 2020 na huyu mtu  tutaharibikiwa ni vyema mgogoro iwe mikubwa ili mheshimiwa rais amtoe vinginevyo bora kuvunja  baraza kuliko kuingia katika uchaguzi akiwepo maana hatutabaki salama damu itamwagika kwa kuwa anafahamika akipewa maagizo na serikali anatekeleza kama yalivyo   hapunguzi hata nukta ni hatari hakutakuwa na haki hata kidogo" alisema mbunge Lema. 

Rafiki wa karibu wa mmoja wa wasaidizi wa karibu  Mkurugenzi Huyo amethibitisha kuwa kwa jinsi alivyo tangu amefika hajabadilika wala kuonyesha dalili za kubadilisha misimamo yake, kwa kweli kazi ipo.

CCM Dijitali yawaletea Ujumbe wa "IDD EL Fitri 2017"

Salamu za Eid Mubarak

Samia: Rushwa husababisha wananchi kukosa imani na serikali yao

Makamu wa Rais, Samia Suluhu Hassan
 
Imeandikwa na Katuma Masamba - Habari Leo

MAKAMU wa Rais, Samia Suluhu Hassan amesema rushwa ni miongoni mwa vitu vinavyoharibu maendeleo na kwamba kukithiri kwa vitendo hivyo katika nyanja mbalimbali kunasababisha wananchi kukosa imani na serikali yao.

Samia ametoa kauli hiyo leo (Alhamisi) wakati akizungumza kwenye mkutano wa ngazi ya juu wa Kimataifa wa kubadilishana uzoefu katika vita dhidi ya rushwa ambapo amesema, rushwa inatakiwa kushughulikiwa kuanzia kwenye kiini na kwamba serikali inalihakikisha hilo.

“Rushwa ni uovu ambao umeendelea kuharibu nyanja zote za maendeleo ya binadamu. Rushwa hudhoofisha utawala wa sheria, hivyo huharibu uaminifu wa umma kwa serikali,” alisema Samia.

Alisema serikali ya awamu ya tano inayoongozwa na Rais John Magufuli imejidhatiti katika mapambano dfhidi ya rushwa na kwamba tayari kuna mikakati mbalimbali iliyowekwa kwa ajili ya vita hiyo ikiwemo Mkakati wa Taifa wa Kupambana na Rushwa na Mpango wa Utekelezaji wa Awamu ya Tatu (NACSAP III).

Mkutano huo unafanyika nchini kutokana na ombi la Rais John Magufuli kwa Rais wa Benki ya Dunia, Jim Yong Kim kusaidia Tanzania katika kuimarisha utawala bora. Mkutano huo unaelezwa utakuwa msaada kwa Tanzania katika vita dhidi ya rushwa. Mwisho.

Azindua viwanda vikubwa 3

Rais John Magufuli akijaribu kuendesha trekta katika kiwanda cha kutengeneza matrekta aina ya Ursus kilichopo Kibaha mkoani Pwani jana baada ya kuzindua mradi wa kutengeneza matrekta hayo. (Picha na Ikulu).

RAIS John Magufuli amezindua viwanda vikubwa vitatu na mradi wa upanuzi wa mtambo wa maji wa Ruvu Juu na ulazaji wa mabomba makuu kutoka Mlandizi hadi Dar es Salaam, katika siku ya pili ya ziara ya kikazi ya siku tatu mkoani Pwani jana.

Kwa mujibu wa taarifa ya Ikulu, kwanza, Rais Magufuli alizindua kiwanda cha kutengeneza vifungashio cha Global Packaging Tanzania Ltd kilichopo katika eneo la viwanda Kibaha ambacho kina uwezo wa kutengeneza mifuko ya sandarusi 53,000 kwa siku kwa ajili ya kuhifadhia mazao.

Kiwanda hicho kinachomilikiwa na Mtanzania, Joseph Wasonga kimeajiri watu 110 na kimejengwa kwa gharama ya takribani Sh bilioni nane. Aidha, Dk Magufuli alizindua mradi wa kutengeneza matrekta 2,400 aina ya Ursus ambao utagharimu Sh bilioni 55, na matrekta hayo yatasambazwa nchi nzima kwa ajili ya kuboresha sekta ya kilimo.

Mradi huo unamilikiwa na Serikali ya Tanzania kwa asilimia 100 na utazalisha matrekta ya aina 6 zenye nguvu ya kuanzia HP50 hadi HP 85. Pia jana, Rais Magufuli alizindua kiwanda cha chuma cha Kiluwa Steel Group kilichopo Mlandizi ambacho katika awamu hii ya kwanza kina uwezo wa kuzalisha tani 500,000 za nondo kwa mwaka na awamu ya pili kitaongeza uzalishaji hadi kufikia tani milioni 1.2 kwa mwaka.

Balozi wa China nchini, Dk Lu Youqing alisema kiwanda hicho kinachomilikiwa na Mtanzania Mohamed Kiluwa kwa asilimia 51, asilimia 49 zinamilikiwa na mwekezaji kutoka China ikiwa ni mwendelezo wa uhusiano na ushirikiano mzuri uliopo kati ya China na Tanzania.

Aidha, Shirika la Reli Tanzania (TRL) limejenga njia ya reli ya kilometa 3.5 inayounganisha kiwanda hicho na reli ya kati ikiwa ni juhudi za kurahisisha usafirishaji wa malighafi na vyuma vinavyozalishwa kiwandani hapo kwenda ndani na nje ya nchi.

Akizungumza katika miradi hiyo, Rais Magufuli alipongeza uwekezaji huo na akaagiza vyombo vinavyohusika kutoa vibali kwa ajili ya ujenzi wa viwanda hapa nchini viondoe urasimu ambao umekuwa ukiwakatisha tamaa wawekezaji kujenga viwanda.

Dk Magufuli alitoa mwito kwa wamiliki wa viwanda hivyo kujali maslahi na usalama wa wafanyakazi waliowaajiri, amezitaka benki nchini kujielekeza kufanya biashara na wananchi kwa kuwakopesha mitaji wafanyabiashara na wajasiriamali badala ya kutaka kufanya biashara na serikali na ameiagiza Wizara ya Nishati na Madini na Wizara ya Viwanda, Biashara na Uwekezaji kuhakikisha viwanda vya chuma vinatumia malighafi za hapa nchini kutoka Mchuchuma na Liganga.

Leo Rais Magufuli atakamilisha ziara yake ya kikazi ya siku tatu mkoani Pwani kwa kuzindua kiwanda cha vinywaji baridi cha Sayona Drink Ltd, kuzindua kiwanda cha kukausha matunda cha Elven Agric Company na kuzindua mradi wa barabara ya Bagamoyo – Msata.

Magufuli ‘amtumbua’ Mutalemwa Dawasa

     Imeandikwa na Shadrack Sagati

RAIS John Magufuli amemtaka Mkurugenzi Mkuu wa Mamlaka ya Maji Safi na Maji Taka Dar es Salaam, (Dawasa), Archad Mutalemwa ‘kuachia ngazi’ kwa maelezo kuwa amekaa muda mrefu katika mamlaka hiyo.

Rais pia amemwagiza Waziri wa Maji na Umwagiliaji kuhakikisha anamaliza mkanganyiko uliopo kati ya Dawasa na Kampuni ya Maji Safi Dar es Salaam (Dawasco) juu ya uendeshaji wa huduma ya maji na pia amemwagiza namna ya kuangalia kuunda bodi moja ya maji; badala ya kuwa na bodi mbili zinazosimamia taasisi hizo mbili.

Mbali na hilo, alisema taasisi za serikali zisizolipia huduma ya maji zinapaswa kukatiwa huduma hiyo na kwamba wakuu wa mikoa, wakuu wa wilaya na wakurugenzi watendaji wa wilaya ambao taasisi zao nyeti zitakatiwa maji, wajihesabu kuwa wameshindwa kazi kwa sababu fedha zinatolewa kulipia huduma hiyo muhimu.

Rais Magufuli pia ameiagiza Wizara ya Maji na Umwagiliaji kuhakikisha kwamba wafanye kila linalowezekana mji wa Kisarawe mkoani Pwani upatiwe maji haraka na pia wakamilishe mradi wa maji wa Lindi ambao alisema umekaa kwa muda mrefu bila kukamilika.

Dhambi za wizara

Akizindua mradi wa upanuzi wa mtambo wa maji wa Ruvu Juu na ulazaji wa mabomba makuu kutoka Mlandizi kwenda Kibamba, Dar es Salaam, Rais Magufuli alitaja upungufu ya wizara ni kuwepo kiwanda jijini Dar es Salaam ambacho kilifunga bomba la maji bila kupitishiwa kwenye mita.

Alisema kinatumia maji mengi, lakini hawalipi bili. Pia alisema kuna kampuni moja inajenga barabara ilikuwa inatumia maji ya Dawasco bila kulipa ankara zao. “Sasa kama hao matajiri hamuwadai ankara zenu, inakuwaje wananchi hawa maskini mnakuwa na viherehere vya kwenda kuwadai bili zao,” alieleza Rais Magufuli katika hotuba yake kwa wananchi.

Pia alisema kuna wafanyakazi wa Dawasco ambao anawafahamu wanaouza maji na fedha zinaenda kwenye akaunti zao na akasisitiza kuwa anafahamu hadi akaunti zao. Alimwagiza waziri alifanyie kazi yeye mwenyewe.

“Rekebisheni dhambi zenu zilizopo, hapa Ruvu mmepata A, lakini kule kwingine mmepata C maana mambo yenu hayaendi vizuri,” alisema Rais. Amvaa bosi wa Dawasa Rais Magufuli katika hotuba yake alihoji, “Kuna wanaouliza hivi Mutalemwa utastaafu lini?

Maana nimeanza kukusikia nikiwa bado sekondari. Mzee wangu jiandae kustaafu, unaweza kuwa na mwili mzuri; lakini umri umekwenda tunataka kukutumia kwa kazi zingine za taifa hili. “Hivyo nakuomba mzee wangu jiandae kustaafu kwa haraka kabla ya mabaya hayajakupata.

Maana ukikaa sehemu kwa muda mrefu hata kama watu wanakupenda unaweza kukumbwa na mabaya. Mimi hili nimeona niliseme tu kwa uwazi,” alisema Rais Magufuli. “This is your time, umefanya kazi nzuri, waachie vijana ili tushughulike nao, tufukazane nao.

Kama umenisikia nielewe, kama hujanielewa….,” alisema Rais Magufuli. Upotevu wa maji udhibitiwe Kuhusu kupotea maji, Rais Magufuli alisema nchi inaweza kukopa fedha nyingi, lakini asilimia kubwa ya mapato hayo yanaweza kupotea kwa maji yanayopotea.

Aliwaomba watendaji wa wizara hiyo kuhakikisha hakuna maji yanayopotea. Alisema Wizara ya Maji na Umwagiliaji wamefanya kazi nzuri, licha ya kuwa kazi zao hazionekani. “Dawasa na Dawasco tembeeni vifua mbele kwani mnafanya kazi kubwa.

Nimeiona kazi nzuri na ya kufurahisha,” alisema Magufuli. Aliwahakikishia kuwa serikali iko pamoja nao na akawataka miradi ambayo haijakamilika ukiwemo wa Lindi, wajipange na ikiwezekana Dawasa wahamie wote Dawasco wakausimamie ili uweze kukamilika.

Alisema anafahamu kuna utata kati ya Dawasa na Dawasco. “Nafahamu kuna contradiction (mkanganyiko) kati ya pande hizo mbili kati ya Dawasco na Dawasa.

Dawasco wanahoji kwa nini

Dawasa wakimaliza kufanya kazi kwa nini wasijiunge pamoja na Dawasco kufanya kazi pamoja, lakini Dawasa nao wanauliza kwa nini tusibaki na miradi hii ili tuiendeshe sisi, kwa nini tunawapa Dawasco?

Hili naliacha kwa Wizara ya Maji,” alieleza Dk Magufuli. Aagiza kukata maji Rais Magufuli pia aliiagiza wizara kuhakikisha taasisi zake zinawakatia maji taasisi zote za serikali ambazo zinadaiwa kiasi hicho cha Sh bilioni 40.

Alisema wizara hiyo ifanye uhakiki wa madeni hayo na wapeleke Wizara ya Fedha na Mipango taasisi zote zinazodaiwa ili fedha hizo zikatwe huko huko. “Na nyinyi pia lipeni shilingi bilioni nane mnazodaiwa za umeme, lakini msipofanya hivyo pia nitaiagiza Wizara ya Fedha ikate huko huko,” alisema.

Aliongeza: “Tumezoea kudekezana, maana wizara ina bajeti na fedha za matumizi zinapelekwa, lakini vipaumbele vyao vinakuwa safari za nje na semina na wanacha kulipia maji.”

Kisarawe ipatiwe maji

Aliagiza wizara kuhakikisha kuwa wanafikisha huduma ya maji katika mji wa Kisarawe ili nao wafaidike na huduma ya maji kwa kuwa nao wamekuwa wanatunza vyanzo vya maji.

Aliwataka wahandisi wa wizara hiyo kusahau yaliyopita; badala yake sasa watumie elimu zao kuwahudumia wananchi. Rais Magufuli aliwaagiza wizara na taasisi zao wakapunguze makongamano na semina ili wakafanye kazi.

“Semina zenu hizi naziorodhesha… bodi zikasimamie kazi…lakini pia hakuna haja ya kuwa na bodi nyingi ya Dawasco na Dawasa, kwa nini tusiwe na bodi moja inayosimamia maji?” alihoji.

Katibu ataja miradi saba Awali, Naibu Katibu Mkuu wa Wizara ya Maji na Umwagiliaji, Emmanuel Kalobelo alisema mradi wa upanuzi wa mtambo wa Ruvu Juu ni miongoni mwa miradi saba ya kimakakati ambayo inalenga kuongeza upatikanaji wa maji kwa wananchi wa Jiji la Dar es Salaam na miji ya Kibaha, Mlandizi na Bagamoyo.

Alitaja miradi hiyo kuwa ni upanuzi wa mtambo wa Ruvu Chini, upanuzi wa mtambo wa Ruvu Juu, uchimbaji wa visima virefu vya Kimbiji na Mpera, ujenzi wa bwawa la Kidunda, upanuzi wa mtandao wa usambazaji maji katika meneo yote yanayohudumuiwa, kupunguza upotevu wa maji na uboreshaji wa mfumo wa mitandao ya majitaka.

Alisema miradi hiyo inalenga kuongeza uzalishaji wa maji kutoka ujazo wa lita milioni 300 hadi lita milioni 750 kwa siku ifikapo mwaka 2020. Balozi wa India, Sandeep Arya alisema tangu Waziri Mkuu wa India, Narenda Modi alipofanya ziara yake nchini, hatua mbili zaidi zimepangwa katika ushirikiano baina ya hizo mbili ikiwemo kusainiwa kwa mkataba mwezi uliopita kwa ajili ya upanuzi wa usambazaji wa maji katika miji ya Tabora, Nzega na Igunga.