JAMII MPYA TANGA YAANDAA KONGAMANO LA KUMPONGEZA RAIS DKT SAMIA SULUHU HASSAN

Taasisi ya Jamii Mpya Mkoa wa Tanga tarehe 26/8/2023 wameandaa Kongamano la kumpongeza Rais Dkt Samia Suluhu Hassan kwa kazi kubwa anazofanya katika kuongoza nchi na kutekeleza miradi mingi ya maeneo nchi nzima ikiwemo katika Mkoa wa Tanga. 

Mhe Ummy amewapongeza Jamii Mpya Mkoa wa Tanga kwa wazo lao zuri la kumpongeza  na kumtia moyo Rais wetu Dkt Samia kwa kuwa ni kweli Kazi za Rais Samia katika nchi hii ni kazi kubwa, kazi nzuri na kazi zinaonekana kila mkoa, kila Wilaya, kila Kata na Kila Kijiji na Mtaa yote nchini. 

Mhe Ummy ameendelea kusema kuwa Kazi za Rais Samia zinaonekana kwenye sekta za Elimu, Afya, Maji, Nishati, Miundombinu ya barabara, Kilimo na Uvuvi. Hivyo tunapaswa kumpongeza, kumtia moyo na kumuunga mkono ili aendelee kuwatumikia vyema watanzania.

 

Akiwasilisha Hotuba yao kwa Mgeni Rasmi, Katibu wa Jamii Mpya mkoa wa Tanga Bi. Halima Bughe  amesema kuwa lengo la Jamii Mpya ni kumpigania Rais Samia sambamba na kuibua na kuzisemea kero za wananchi hasa wanawake, watoto na vijana. Hivyo wameona waandae kongamano hilo ili kumpongeza Rais sambamba na kuzindua Rasmi Taasisi ya Jamii Mpya Mkoa wa Tanga ambayo tayari wana wanachama zaidi ya 2,000 katika Wilaya za Tanga Mjini, Muheza, Korogwe, Mkinga, Pangani, na Kilindi.

Hafla hiyo imehudhuriwa na mratibu wa Jamii Mpya Tanzania ndg. Ally Makwiro, Mratibu wa Jamii Mpya Mkoa wa Tanga Mwalimu Mwajuma Selemani, Katibu wa CCM wilaya Tanga ndg. Seleman Sankwa, Mstahiki Meya wa Jiji la Tanga Mhe. Abdurahaman Shiloo waheshimiwa madiwani na viongozi wengine wa chama  na serikali na wanachama wa jamii mpya kutoka Wilaya zote za Mkoa wa Tanga.

Imetolewa na;

Ofisi ya Mbunge, Jimbo la Tanga Mjini.

27/08/2023.

Dc Kilindi alishukuru shirika lisilo la kiserikali World Vision ADP Mgera

Mkuu wa wilaya Kilindi Mh Hashim Mgandilwa amelishukuru shirika lisilo la kiserikali World Vision ADP Mgera kwa kufadhili Mradi wa maji utakaonufaisha wakazi wa Kijiji cha Ngobore kilichopo kata ya Saunyi

Akizungumza katika hafla ya makabidhiano ya Mradi huo tarehe 28/08/2023 Mh Mgandilwa alisema ili Mradi huo iendelee kuwepo na kunufaisha walengwa kwa muda mrefu ni  lazima miundombinu yake itunzwe vizuri

Alisema serikali inayoongozwa na Dk Samia Suluhu Hassan imekuwa ikitafuta fedha kwa ajili ya miradi ya maji pamoja na kushirikiana na wadau wa Maendeleo ili kutatua kero ya maji

Awali akitoa taarifa ya Mradi huo mratibu wa ADP Mgera Modest Kessy alisema Mradi huo ulioanza mwaka 2022/2023 na umegharimu shilingi milioni 259,279,000/= na unategemea kunufaisha watu 2801 wanawake wakiwa 884,wanaume 847 na watoto 1076 na kuishukuru serikali kwa ushirikiano mkubwa katika kipindi chote cha utekelezaji Mradi

Modi Mngumi

Mawasiliano Serikalini Kilindi DC

@ofisiyamkuuwamkoawatanga 

@ccm_kilindi @waziriwazirik @ortamisemi

ZIARA YA MAKAMU WA PILI JIMBO LA KIWANI NA CHAMABNI

Mjumbe wa Kamati Kuu ya Halmashauri Kuu ya CCM Taifa Ndugu Hemed Suleiman Abdulla akimkabidhi Kadi ya CCM Ndg. Said Zubeir Muhammed (wape Salam) alierejesha Kadi ya ACT Wazalendo na kuamua kujiunga na Chama Cha Mapinduzi.

Wanachama wa CCM wakila kiapo cha utii mara baada ya zoezi la kukabidhiwa kadi wanachama wapya waliojiunga CCM wakati wa ziara ya kuimarisha Chama Jimbo la Chambani.

Mjumbe wa Kamati Kuu ya Halmashauri Kuu ya CCM Taifa Ndugu Hemed Suleiman Abdulla amewataka Viongozi na wanachama wa CCM kuongeza nguvu katika kukiimarisha Chama kwa kuweka mipango na mikakati sahihi itakayowavutia wananchi na wapenda Amani itakayowavutia wapinzani kujiunga na CCM.

 

Akiendelea na ziara ya kuimarisha Chama katika Jimbo ya Chambani na Jimbo la Kiwani  Mhe. Hemed amewataka  Wananchi kujiunga na CCM ambayo inatekeleza ahadi zake kwa kasi kubwa na kuwaletea maendeleo ya haraka.

 

Sambamba na hayo Mjumbe huyo wa Kamati Kuu ya Halmashauri Kuu ya CCM Taifa amewataka viongozi wa CCM kuendelea kuinadi na kuitekeleza Ilani ya Chama Cha Mapinduzi kwa kutekeleza miradi mbali mbali ya kimkakati na maendeleo ambayo itawanufaisha wazanzibari wote inayotekelezwa na Rais wa Jamhuri ya Muungano wa Tanzania Mhe. Dkt. Samia Suluhu Hassan na Rais wa Zanzibar na Mwenyekiti wa Baraza la Mapinduzi Mhe. Dkt. Hussein Ali Mwinyi.

 

Amewasisitiza Viongozi wa Kamati za Siasa za Jimbo, Wilaya na Mkoa kuendelea kudumisha umoja na mshikamano uliopo ndani ya Chama kwa kufuata miongozo ya Mwenyekiti wa CCM Taifa Mhe. Dkt. Samia Suluhu Hassan na Makamu Mwenyekiti wa CCM Zanzibar Mhe. Dkt. Hussein Ali Mwinyi.

 

Amesema CCM itaendelea kutekeleza ahadi zake kwa kuziondoa changamoto zilizopo na zitakazojitokeza ikiwa ni pamoja na kuajiri Walimu na Madaktari  walio na sifa katika fani hzio

Makamu wa Pili wa Rais wa Zanzibar amefafanua kuwa Serikali itazijenga barabara zote kwa kiwango cha Lami sambamba na kupeleka miundombinu ya maji katika vijiji ambavyo huduma hiyo haijafika kikiwemo kijiji cha Miamboni ambacho kimekosa huduma hiyo kwa muda mrefu.

Mhe.Hemed ameeleza kuwa Jimbo la Kiwani ni miongoni mwa Majimbo yaliyobahatika kupata miradi mingi ikiwemo ujenzi wa Kituo cha Afya Kendwa, ujenzi wa skuli Nne za Ghorofa pamoja na ujenzi waTangi la Maji safi na Salama lenye ujazo wa Lita Milioni moja.

Amesema kutokana na maendeleo makubwa yaliyofanywa na Rais Dkt. Samia Suluhu Hassan na Rais Dkt. Hussen Ali Mwinyi kuna kila sababu Wananchi kuwapa kura nyingi ifikapo 2025 ili waweze kuendelea kuwafanyia mambo  mazuri kwa wakati sahihi .

 

Kwa upande wake Mjumbe wa Halmashauri Kuu ya CCM Taifa Ndg Abdallah Muhamed Madishi amemshukuru Rais wa Zanzibar na Mwenyekiti wa Baraza la Mapinduzi Mhe. Dkt. Hussein Ali Mwinyi kwa  maamuzi yake ya kuwajengea Soko kubwa la Kisasa la Mtambile ambalo limesaidia kwa kiasi kikubwa wafanyabiashara na wajasiriamali kufanya shughuli zao kwa ufanisi na Wananchi kupata huduma stahiki katika sehemu sahihi.

 

Ameeleza kuwa juhudi hiyo inadhihirisha azma ya Rais Dkt. Mwinyi ya kuwawekea mazingira mazuri wajasiriamali na wafanyabiashara kufanya shughuli zao katika sehemu salama na kuacha na kufanya biashara sehemu zisizo rasmi

Nae Muwakilishi...... Mhe. Maryam Azzan na Mhe. Shadya Muhamed wameeleza kuwa Serikali ya Mapinduzi ya Zanzibar imefanikiwa kufikisha huduma mbali mbali kwa wananchi ikiwemo Afya, elimu, maji safi na Salama, umeme na barabara ili wananchi waweze kupata huduma bora kwa masafa ya karibu na maeneo yao.

 

Wameeleza kuwa ni wajibu wa Viongozi wa CCM kuanzia Shina hadi Taifa kufuata nyayo za Viongozi wakuu wakiongozwa na Mwenyekiti wa CCM Taifa Mhe. Dkt. Samia Suluhu Hassan na Makamu Mwenyekiti wa CCM Zanzibar Mhe. Dkt. Hussein Ali Mwinyi kwa kuhubiri Amani na utulivu pamoja na kueleza mema yanayofanywa na Serikali zao.

Katika ziara hiyo Mjumbe huyo wa Kamati Kuu ya Halmashauri Kuu ya CCM Taifa Mhe. Hemed Suleiman Abdulla amepokea zaidi ya Wanachama 500 wakiwemo wanachama wapya na waliotoka vyama vya upinzani.

 

Akizungumza kwa niaba ya wanachama hao Ndg. Said Zubeir Muhamed (wape Salam) kutoka Chama Cha ACT Wazalendo ameeleza kuwa ameamua kujiunga na Chama Cha Mapinduzi kutokana na kasi ya utekelezaji wa Ilani ya CCM na dhamira thabiti ya Rais Dkt. Hussein Ali Mwinyi kuwaletea maendeleo wazanzibari wote bila ya kujali tofauti zao za kisiasa.

Ziara hiyo ni muendelezo wa Ziara ya Mjumbe wa Kamati Kuu ya Halmashauri Kuu ya CCM Taifa Ndg. Hemed Suleiman Abdulla kutembelea majimbo yote ya hamsini ya uchaguzi ambapo tayari ameshatembelea Majimbo arobaini na Tano kwa lengo la kuimarisha Chama.

 

Imetolewa na Kitengo cha Habari (OMPR)

28 Agosti, 2023

UAPISHO IKULU

Rais wa Jamhuri ya Muungano wa Tanzania Mhe. Samia Suluhu Hassan, akimuapisha Balozi Ali Idi Siwa kuwa Mkurugenzi Mkuu wa Idara ya Usalama wa Taifa katika hafla fupi iliyofanyika Ikulu Jijini Dar es Salaam tarehe 28 Agosti, 2023.

KATIBU MKUU YAKUBU AWAPA NONDO ZA UTEKELEZAJI WA MAJUKUMU MAAFISA UTAMADUNI NA MICHEZO

Na Shamimu Nyaki

Katibu Mkuu Wizara ya Utamaduni, Sanaa na Michezo, Bw. Saidi Yakubu amefungua kikao kazi cha Maafisa Utamaduni na Michezo leo Agosti 27, 2023 mkoani Njombe ambapo ametoa maagizo manne makubwa kwa maafisa hao ikiwemo kuongeza ushiriki wa jamii katika michezo na kuibua vipaji  vya Utamaduni, Sanaa na michezo katika maeneo yao.

Amewaagiza maafisa hao, kuandaa mikakati itakayosaidia vijana kutumia majukwaa mbalimbali kuonesha vipaji vyao pamoja na kuandaa mkakati wa kukabiliana na mmomonyoko wa maadili ambao umeanza kujitokeza katika jamii.

"Serikali inaendelea kuongeza wataalamu wa michezo kupitia Chuo Cha Michezo Malya ambacho sasa kinafanyiwa maboresho makubwa ikiwemo ujenzi wa hosteli mpya ambayo itasaidia ongezeko la udahili wa wanafunzi chuoni hapo", amesema Katibu Mkuu Yakubu.

Bw. Yakubu ametoa wito kwa Halmashauri zote nchini kuhakikisha Kitengo cha Utamaduni na Michezo kinatengewa bajeti ya kutosha ili kutekeleza majukumu yake ipasavyo.

Katibu Mkuu Yakubu ametumia nafasi hiyo kugawa vifaa vya michezo ikiwemo mipira  54 ya mchezo wa Mpira wa Miguu, Kikapu na Wavu ambayo itagawiwa kwa mikoa yote nchini kwa ajili ya mashindano ya Samia Cup yanayotarajiwa kufanyika mwezi Oktoba.

"Wizara ya Fedha watakiwa kufanya kazi kwa ushirikiano na kuzingatia sheria, kanuni, taratibu pamoja na miongozo"

Watumishi wa Wizara ya Fedha wametakiwa kufanya kazi kwa ushirikiano na kuzingatia sheria, kanuni, taratibu pamoja na miongozo katika utekelezaji wa majukumu mbalimbali ya wizara ili kuleta tija katika Taasisi na Taifa kwa ujumla.

Rai hiyo imetolewa na Naibu Waziri wa Fedha Mhe. Hamad Hassan Chande, wakati akifungua kikao kazi cha Watumishi wa Wizara hiyo kwa niaba ya Waziri wa Fedha Mhe. Dkt. Mwigulu Lameck Nchemba (Mb), kilichofanyika katika ukumbi wa Chuo cha Mipango ya Maendeleo Vijijini - IRDP, jijini Dodoma.

Alisema kuwa ni lazima kila mtumishi kuzingatia sheria, kanuni, taratibu na miongozo mbalimbali inayotolewa na Serikali pamoja na Wizara ikiwa ni kuziishi tunu za Wizara ikiwemo uadilifu katika utekelezaji wa majukumu.

‘‘Tutambue kuwa Wizara ya Fedha ni moyo wa nchi yetu. Wizara ya Fedha ikiyumba, nchi inayumba. Hivyo, ni muhimu kufanya kazi kwa kuzingatia misingi ya uadilifu, weledi, ubunifu, uwazi na kuwajibika pale tunapoenda kinyume na misingi ya utawalabora na utawala wa sheria, ili kuleta tija katika taasisi yetu na Taifa letu kwa ujumla’’, alisema Mhe. Chande.

Aidha alisisitiza umuhimu wa mawasiliano katika utekelezaji wa majukumu ikiwa ni pamoja na utoaji, upokeaji, usambazaji na utunzaji wa taarifa zinazohusu majukumu ya Wizara uzingatie misingi ya usiri pamoja mifumo na njia sahihi za mawasiliano.

‘‘Uthabiti katika mawasiliano ni muhimu kwa kila mmoja wetu ili kudumisha misingi ya uelewa na uwajibikaji wa pamoja. Teknolojia imerahisisha sana mifumo na njia za mawasiliano. Hata hivyo, kihatarishi kikubwa ni ukosefu wa uadilifu katika matumizi ya teknolojia ya kisasa katika kutoa, kupokea, kusambaza na kutunza taarifa za kiofisi ili kulinda heshima ya Wizara yetu na Taifa kwa ujumla,’’alisisitiza Mhe. Chande.

Aidha alisisitiza umuhimu wa utunzaji wa mali za Serikali kwa kusimamia sera, sheria, kanuni, miongozo na mifumo ya TEHAMA katika usimamizi wa mali za Serikali pamoja na kuongeza ubunifu na weledi katika eneo la usimamizi wa fedha za umma kwa kujenga uwezo na kuziba mianya ya opotevu wa mapato na matumizi mabaya ya fedha za umma.

‘‘Ni matumaini yangu kuwa mtakuwa wabunifu zaidi ili kuongeza ufanisi katika utekelezaji wa majukumu yetu.  Mafunzo yanayolenga kuongeza ujuzi katika maeneo ya usimamizi wa fedha za umma yapewe kipaumbele ili kuchochea ubunifu mahali pa kazi,’’ alisema Mhe. Nchemba.

Alihitimisha kwa kuwapongeza watumishi kwa ushiriki makini katika maandalizi ya Mpango na Bajeti ya Serikali kwa mwaka 2023/2024 na kutoa rai kwa kila mmoja kusimamia eneo lake ili kufikia malengo yaliyowekwa.

Naye Katibu Mkuu Wizara ya Fedha, Dkt. Natu El- Maamry Mwamba amepongeza watumishi wote wa Wizara makao makuu na ofisi za mikoa kwa kuhitimisha vyema utekelezaji wa mpango na bajeti ya 2022/23.

‘’Pamoja na athari za UVIKO 19 na mgogoro kati ya Urusi na Ukraine kuendelea kuathiri shughuli mbalimbali za kiuchumi na kijamii hapa nchini, tumefanikiwa kufikia shabaha za bajeti ya serikali kwa asilimia 98.7. Mafanikio haya yametokana na juhudi zenu pamoja na watumishi wa Mamlaka nyingine za serikali’’, alisema Dk. Mwamba.

Alisema mwaka 2022/2023, Wizara ilitekeleza kwa ufanisi majukumu yake ya msingi ya usimamizi wa masuala ya mipango, uchumi na fedha kutokana na mshikamano na ushirikiano uliopo miongoni mwa watumishi na viongozi wa Wizara.

‘‘Maeneo tuliyofanya vizuri zaidi ni kuhudumia deni la serikali kwa wakati, kugharamia miradi mikubwa ya maendeleo inayoendelea kwa sasa na kulipa mishahara ya watumishi kwa wakati hivyo nitoe wito kwa watumishi wenzangu kuimarisha upendo, uwazi, ushirikiano na uwajibikaji wa pamoja ili kujenga taasisi imara, endelevu na bunifu.’’ alisema Dkt. Mwamba.

Alisema kuwa uongozi wa Wizara unaendelea kuchukua hatua mbalimbali kuboresha mazingira ya kazi ili kuongeza ari, bidii na ubunifu katika utekelezaji wa majukumu ya Wizara.

Alifafanua kuwa katika mwaka 2022/2023, Wizara imefanikisha kupandisha madaraja watumishi 162 na kubadilisha kada watumishi 6, kugharamia mafunzo ya muda mrefu watumishi 60 na mafunzo ya muda mfupi watumishi 285 pamoja na kuendelea kuboresha mazingara ya TEHAMA kwa kuanza kutumia mifumo mbalimbali inayorahisisha upatikana wa huduma na taarifa na kupunguza matumizi ya karatasi.

Kwa upande wao Manaibu Katibu Mkuu Bi. Jenifa Omolo na Elijah Mwandumbya walisisitiza watumishi wa Wizara hiyo kufanya kazi kwa ushirikiano na kuwa na nidhamu ya kazi pamoja na ubunifu ili kuhakikisha kuwa changamoto zinazojitokeza zinatatuliwa kwa namna bora.

Pia waliwapongeza watumishi wa Wizara hiyo kwa kuendelea kufanya kazi kwa bidii na weledi na kuahidi kuwa uongozi wa Wizara hiyo utaendelea kushirikiana nao ili kuwa na mazingira ya kazi rafiki kwa kila mtumishi kuweza kutimiza wajibu wake.

Wizara ya Fedha imekutana na watumishi hao ikiwa ni sehemu ya utaratibu wa kukutana mwanzoni mwa mwaka wa fedha kutafakari kwa pamoja yaliyojiri katika utekelezaji wa majukumu ya Wizara na Serikali kwa mwaka uliotangulia na kushirikishana mikakati ya utekelezaji wa vipaumbele kwa mwaka wa fedha uliopo.

"Kesi yeyote ya ardhi itakayoonekana watendaji katika serikali au wenyeviti wa vijiji wanahusika wahusika hao watafikishwa mahakamani kwa majina yao na sio taasisi"- DC Kilindi, Tanga

Mkuu wa wilaya Kilindi Mh Hashim Mgandilwa amesema kuanzia Sasa kesi yeyote ya ardhi itakayoonekana watendaji katika serikali au wenyeviti wa vijiji wanahusika wahusika hao watafikishwa mahakamani kwa majina yao na sio taasisi

Mh Mgandilwa ametoa kauli hiyo wakati alipokuwa akizungumza na watumishi wa tarafa za Mgera,Mswaki na viongozi wa kisiasa katika tarafa hizo kilichofanyika katika kata ya Kwediboma

Alisema ifike wakati tuone kila uhai una thamani kubwa na wanaotumia migogoro ya ardhi kwa manufaa yao hawatavumiliwa tena kwani migogoro ya ardhi na mingine katika Wilaya imekuwa ni tatizo ambalo kila mmoja anapaswa kuhakikisha tatizo hilo linaisha ama kupungua ili masuala mengine ya maendeleo yaendelee

Mh Mgandilwa alisema ikitokea mgogoro Kama vile mfugaji ameingiza mifugo katika shamba la mtu na kesi hiyo ikaripotiwa sehemu husika na baadae mkulima atoe taarifa ya kukataa kuendelea na shauri hilo kwa maamuzi wamemalizana wenyewe mkulima au mhusika huyo aliyesema haendelei na shauri hilo atafikishwa yeye mahakamani

Alisema hatua hiyo itatekelezwa kwa sababu ya kukithiri migogoro ya ardhi katika Wilaya Kilindi

Kikao hicho kilishirikisha waheshimiwa madiwani,wenyeviti wa vijiji na watumishi wa tarafa za Mgera na Mswaki

Mawasiliano Serikalini Kilindi DC

@ofisiyamkuuwamkoawatanga 

@ccm_kilindi @waziriwazirik @ortamisemi

DKT. TAX AWAPA WAKUU WA MIKOA MBINU ZA KUTEKELEZA DIPLOMASIA YA UCHUMI

DKT. TAX AWAPA WAKUU WA MIKOA MBINU ZA KUTEKELEZA DIPLOMASIA YA

 UCHUMI

Waziri wa Mambo ya Nje na Ushirikiano wa Afrika Mashariki, Mhe. Dkt. Stergomena Tax (Mb.) amewapa Wakuu wa Mikoa mbinu mbalimbali za kutekeleza Diplomasia ya Uchumi katika Mikoa yao.

Dkt. Tax ametoa mbinu hizo tarehe 26 Agosti, 2023 wakati wa Mafunzo ya Uongozi kwa Wakuu wa Mikoa na Makatibu Tawala wa Mikoa yanayofanyika katika Shule ya Uongozi ya Mwalimu Nyerere iliyopo Kibaha mkoani Pwani.

“Mbinu za kuibua na kutekeleza diplomasia ya uchumi ni nyingi kama vile kufungua balozi, kukusanya taarifa na uchambuzi, majadiliano,……………….lakini kwenu nyie Wakuu wa Mikoa mnaweza kufanya makongamano ya biashara na uwekezaji na kuzitangaza fursa mbailmbali za biashara katika mikoa yenu pamoja na elimu kwa Umma,” alisema Dkt. Tax.

“Kupitia mikoa yenu mnaweza mkafanya makongamano ya biashara na uwekezaji na kuzitangaza fursa za biashara katika mikoa yenu, ninyi ni wadau wakubwa wa kutekeleza diplomasia ya uchumi kwa vitendo na kuchangia maendeleo,” alisema Dkt. Tax

Alisema kuwa Serikali itaendelea kuboresha  mifumo ya sheiria, kiutendaji na kukuza mazingira ya kushindana Kimataifa na Ofisi za Wakuu wa Mikoa zina mchango mkubwa kufanikisha utekelezaji wa Diplomasia ya Uchumi na hivyo kuchangia maendeleo ya kiuchumi nchini.

“Serikali itaendelea kuboresha mifumo ya kisheria, kiutendaji na kukuza mazingira wezeshi kushindana kimataifa ambapo ofisi za wakuu wa Mikoa zina nafasi na mchango mkubwa wa kufanikisha utekelezaji wa Diplomasia ya uchumi, na kuchangia kasi ya maendeleo nchini,” alisema Dkt. Tax.

Waziri Tax aliongeza kuwa Wakuu wa Mikoa ni wadau wakubwa katika kutekeleza diplomasia ya uchumi kwenye mikoa yao kwani huibua fursa mbalimbali za biashara na uwekezaji zinazopatikana katika mikoa yao.

Pamoja na mambo mengine Waziri Tax aliongeza kuwa ofisi za Wakuu wa Mikoa ni wadau muhimu na wanalo jukumu la kibua fursa katika maeneo yao kama Mamlaka za msingi zinazobuni mipango ya biashara, miradi ya uwekezaji, uzalishaji, na utumiaji wa rasilimali katika ngazi ya mikoa.

Mafunzo ya Uongozi kwa Wakuu wa Mikoa na Makatibu Tawala wa Mikoa katika Shule ya Uongozi ya Mwalimu Nyerere, Kibaha mkoani Pwani yalianza tarehe 21 – 28 Agosti, 2023.

Rais Mwinyi amesema kuna haja kwa Zanzibar kuongeza vivutio vingi vya utalii kwa kubuni matukio maalumu ya kuwavutia wageni wengi na kuviimarisha vivutio vya asili vilivyomo Tanzania.

Zanzibar,

26 Agosti, 2023

RAIS wa Jamhuri ya Muungano wa Tanzania, Dk. Samia Suluhu Hassan amesema kuna haja kwa Zanzibar kuongeza vivutio vingi vya utalii kwa kubuni matukio maalumu ya kuwavutia wageni wengi na kuviimarisha vivutio vya asili vilivyomo Tanzania.

Akizungumza kwa niaba ya Rais Dk. Samia, Rais wa Zanzibar na Mwenyekiti wa Baraza la Mapinduzi Dk. Hussein Ali Mwinyi, aliyasema hayo kwenye ufunguzi wa Tamasha la nane la Kizimkazi, huko uwanja wa Paje Mkoa wa Kusini Unguja.

Rais Dk. Mwinyi alisema tamasha hilo linatoa fursa yakuendeleza utalii na kuutangaza mkoa wa kusini kiutalii na Zanzibar kwa ujumla kwa kufungua fursa nyingi za maendeleo ikiwemo biashara, uwekezaji na uchumi.

Alieleza matarajio yake ya baadae kwa tamasha hilo kuweka hitoria nyengine ya mkoa wa Kusini Unguja kwa kuongeza fursa nyingi za Utalii, uwekezaji na maendeleo ya biashara.

Sambamba na kueleza tamasha hilo mbali na kuongeza vivutio vya utalii vya ndani ya mkoa huo kama tukio la asili la ‘mwaka kogwa’ lakini kuendelea kuitangaza Zanzibar na Tanzania kwa ujumla kwa kuendeleza umoja na mshikamano wa Watanzania kwa pande zote za Jamuhuri ya Muungano wa Tanzania kuwakutanisha pamoja kwa amani na upendo kupitia Tamasha la Kizimkazi ambako wasanii wengi, wananchi, taasiisi mbalimbali za binafsi, wadau wa maendeleo, wajasiriamali, wenyeji na wageni kukutana na kufurahika kwa pamoja.

Pia alieleza tamasha hilo limeendelea kuezi na kuimarisha utamaduni wa Tanzania kwa kuvienzi vyakula vya asili, kuimarisha makongamano, michezo, burudani na kuwawesha vijana kiuchumi kwa kubuni miradi mbalimbali ya maendeleo kwa kukuza biashara, aidha, Dk. Mwinyi alieleza fursa za makampuni binafsi kuwekeza miradi mikubwa zikiwemo taasisi binafsi, tasisi za fedha na benki kutanua matawi yao kusini Unguja kutokana na Tamasha la Kizimkazi.

Hata hivyo, Rais Dk. Mwinyi aliipongeza Serikali ya Mkoa wa Kusini Unguja na kamati ya maandalizi ya Tamasha la Kizimkazi kwa kuelendeza juhudi za Rais Dk. Samia kwa kulienzi tamasha hilo.

Akizungumzia fursa za Uchumi wa Buluu na uwekezaji wa biashara, Rais Dk. Mwinyi alisema Mkoa wa Kusini Unguja umebarikiwa bahari na eneo kubwa la wazi kwa wilaya zake zote mbili za Kati na Kusini mwa Mkoa huo na kueleza kupitia Tamasha la Kizimkazi na fursa zinazotoka huko, sekta ya uvuvi itaimarika zaidi kwa kilimo cha kisasa cha mwani na kuongezeka tija kwa fursa nyingi za utalii kuendelea kufunguka.

Akitoa salam za mkoa, Mkuu wa Mkoa wa Kusini, Unguja Rashid Hadidi aliipongeza Serikali ya Mapinduzi ya Zanzibar na ya Jamhuri ya Muungano wa Tanzania kwa ushirikiano wanatoa kukuza maendelo ya mkoa huo kwa sekta zote ikiwemo kuimarishwa kwa miundombinu ya barabara za kisasa, ujenzi wa hospitali kubwa za Wilaya zenye mashine na vifaa tiba vya kisasa, skuli za ghorafa pamoja na kukamilika kwa ujenzi wa matangi matatu makubwa ya maji safi yenye uwezo wa kuchukua lita milioni 10 ambayo yatasaidia kusambaza maji kwa mkoa wote wa Kusini Unguja.

Tamasha la Kizimkazi liliasisiwa na Rais wa Jamhuri ya Muungano wa Tanzania Dk. Samia Suluhu Hassan miaka nane iliyopita likiwa na lengo la kuunganisha umoja, ushirikiano na mshikamo wa Watanzania wa Mkoa wa kusini Unguja na Tanzania yote bila kujali tofauti za asili na siasa zao.

IDARA YA MAWASILIANO IKULU, ZANZIBAR

WAZIRI MABULA AWASILISHA VIPAUMBELE VYA SEKTA YA ARDHI KATIKA SEMINA YA MA-RC NA MA-RAS

WAZIRI MABULA AWASILISHA VIPAUMBELE VYA SEKTA YA ARDHI KATIKA SEMINA YA MA-RC NA MA-RAS

 

KIBAHA

 

Waziri wa Ardhi Nyumba na Maedeleo ya Makazi Mhe Dkt Angeline Mabula amewasilisha vipaumbele vya wizara yake kwa Wakuu wa Mikoa na Makatibu Tawala katika semina ya uongozi katika Chuo cha Mwalimu Nyerere kilichopo kibaha mkoani Pwani.

 

Katika wasilisho lake leo tarehe 26 Agosti  202, Waziri Mabula alizungumzia masuala ya ukusanyaji mapato yatokanayo na sekta ya ardhi, mipango miji pamoja na maeneo ya uwekezaji ambayo yote wakuu hao wa mikoa wanalo jukumu la kusimamia kwenye mikoa yao.

 

Dkt Mabula aliwataka wakuu wa mikoa kusaidia katika kuongeza hamasa katika suala la ukusanyaji mapato ya serikali yatokanayo na sekta ya ardhi.

 

"Niwaombe mkasimamie mikakati ya ukusanyaji maduhuli hayo ikiwa ni pamoja na kuwakumbusha wananchi waliopo katika maeneo kulipa kodi ya pango la ardhi.

 

Kwa mujibu wa Dkt Mabula Rais Samia alitoa msamaha wa riba ya kodi kwa miezi 10 mafanikio yalionekana japo si kwa kiwango kilicho tarajiwa.

 

Pia aliwataka wakuu wa mikoa kuzisimamia halmashauri katika kutenga fedha katika bajeti za maendeleo ya sekta ya ardhi ili kuhakikisha ardhi inapangwa, kupimwa na kumilikisjwa.

 

"Halmashauri zitambue kuwa jukumu hilo bado ni la kwao na wanahitaji kuendelea kushiriki kikamilifu katika kutenga fedha ili kutekeleza majukumu yao na kuwezesha watumishi waliopo katika halmashauri kufanya kazi" alisema Dkt Mabula.

 

--------MWISHO------

 

Waziri wa Ardhi Mhe. Dkt Angeline Mabula akizungumza katika kikao cha wakuu wa mikoa na makatibu tawala kinachoendelea katika chuo cha uongozi cha Mwalimu J K Nyerere kibaha mkoani Pwani tarehe 26 Agosti 2023.

 

Sehemu ya washiriki semina ya uongozi inayofanyika katika chuo cha uongozi cha Mwalimu Julius Nyerere kibaha mkoa wa Pwani.

 

Waziri wa Ardhi Mhe. Dkt Angeline Mabula akizungumza katika kikao cha wakuu wa mikoa na makatibu tawala kinachoendelea katika chuo cha uongozi cha Mwalimu J K Nyerere kibaha mkoani Pwani tarehe 26 Agosti 2023.

 

Baadhi ya wakuu wa mikoa wakifuatilia wasilisho la Waziri wa Ardhi Mhe. Dkt Angeline Mabula wakati wa semina ya uongozi inayofanyika katika chuo cha uongozi cha Mwalimu Julius Nyerere kibaha mkoa wa Pwani. (PICHA ZOTE NA WIZARA YA ARDHI)

SERIKALI IMETENGA BILIONI 1.5 KUIMARISHA HUDUMA YA UZAZI SALAMA ZANZIBAR.

Zanzibar,

26 Agosti, 2023

RAIS wa Zanzibar na Mwenyekiti wa Baraza la Mapinduzi, Dk. Hussein Ali Mwinyi amesifu jitihada za wadau wa maendeleo wakiwemo Mashirika ya Kimataifa, taasisi binafsi, makampuni na wahisani mbalimbali wanavyojitokeza kuunga mkono juhudi za Serikali ya Mapinduzi ya Zanzibar.

Dk. Mwinyi aliyasema hayo, viwanja vya Maisra Suleiman alipozungumza kwenye kampeni ya “Uzazi ni Maisha” iliyoandaliwa kwa ushirikiano wa Wizara ya Afya Zanzibar na Shirika la Kimataifa la Amref Afika, tawi la Tanzania yenye lengo la kupunguza vifo vya mama wajawazito na watoto wachanga Zanzibar.

“Kwa dhati kabisa napenda niwashukuru Amref Health Africa kwa kutoa msaada wa gari (Mobile van) ambayo itakuwa msaada muhimu kwa Wizara ya Afya kwenye shughuli mbalimbali zikiwemo kusafirisha wataalamu, kusafirisha sampuli na kutoa huduma za upimaji na ushauri nasaha kwa wananchi katika vituo tofauti vya afya hapa Zanzibar” alieleza Dk. Mwinyi.

Rais Dk. Mwinyi alisema, wadau hao wa maendeleo wamekua na mchango mkubwa kwa Serikali hasa kwenye masuala ya jamii na maendeleo kupitia sekta za Afya, Elimu na huduma za upatikanaji wa maji safi na Salama.

Aidha, alilipongeza Shirika la Amref kwa jitihada zao za kuanzisha kampeni za “Uzazi ni Maisha” zilizojumuisha matembezi ya mbio fupi na matembezi ya hiari, yaliyoanzia Kiembe Samaki kwa Butros Wilaya ya Magharibi B na kumalizikia viwanja vya Maisara, Zanzibar.

Alisema, uamuzi huo ni jitihada za kuunga mkono jitihada za Serikali za kupunguza na kuepusha vifo vya akina mama wajawazito na watoto wachanga ambapo alieleza bado kiwango cha changamoto hiyo kipo juu.

Rais Dk. Mwinyi alieleza takwimu zinaonesha vifo vya kina mama 134 kati ya vizazi hai 100,000 kwa mwaka na vifo 28 vya watoto wachanga kati ya vizazi hai 1,000 kwa mujibu wa takwimu za mwaka 2017, husababishwa na changamoto za huduma duni za mama na mtoto katika hospitali na vituo vya afya zikiwemo uhaba wa wahudumu na tatizo la kukosekana kwa dawa.

Dk. Mwinyi, alieleza matumaini yake kupitia kampeni hiyo, kwamba Serikali itaongeza vifaa tiba kwa vituo vya afya 28, sawa na asilimia 40.5 ya vituo vyote 69 vinavyotoa huduma za mama na mtoto Zanzibar. 

Pia, alieleza jitihada za Seriklali kuimarisha huduma za afya ya msingi kwa ajili ya uzazi salama, italeta mafanikio makubwa ya kulinda maisha ya mama na mtoto.

Akizungumza kwenye hafla hiyo, Naibu Waziri wa Afya, Zanzibar Hassan Hafidh alisema lengo la kuanzishwa kwa kampeni ya “Uzazi ni Maisha” ni kupunguza vifo vya mama wajawazito na watoto nchini.

Alisema, katika kulikabili tatizo hilo kivitendo, Serikali ya Mapinduzi ya Zanzibar imeweka mikakati madhubuti ikiwemo kuwachukulia hatua kali za kisheria na nidhamu watumishi wote wa sekta ya Afya wanaokiuka sheria na taratibu za utumishi wao kutokana na uzembe kazini, kauli chafu, utovu wa nidhamu unaosababisha athari mbaya kwa mama na watoto hasa wakati wa kujifungua. Aidha alieleza Wizara imefanikiwa kuzizibidhi hali hiyo kwa asilimi kubwa.

Naye, Mwakilishi mkaazi wa Shirika la Amref Afika kwa upande wa Tanzania, Dk. Folence Temu alisema lengo la kuanzishwa kampeni hiyo ya “Uzazi ni maisha ni kukusanya shilingi Bilioni moja kwajili ya kununuliwa vifaa tiba vya hospitali na vituo vya afya 69 vinavyotoa huduma za mama na mtoto, Zanzibar.

Alisema, wakiwa kwenye mwaka wa pili wa kampeni yao, Shirika la Amref tayari limefanikiwa kukusanya milioni 557 na wamepokea ahadi za shilingi milioni 883 ambayo itafikisha lengo la kampeni hiyo kufikia 2024.

Kampeni ya “Uzazi ni Maisha” ilianza mwaka jana na inatarajiwa kukamilika mwakani inatekelezwa kwa kaulimbiu isemayo ”Changia vifaa tiba kwa uzazi salama” ambayo imechangia kufikia malengo ya kuanzishwa kwake mwaka wa pili sasa wa utekelezaji wake. 

IDARA YA MAWASILIANO IKULU, ZANZIBAR