Balozi Seif Ali Iddi azindua rasmi Barabara ya pili ya Amani hadi Mtoni

Makamu wa Pili wa Rais wa Zanzibar Balozi Seif Ali Iddi akizindua rasmi Bara bara ya pili ya Amani hadi Mtoni baada ya kukamilika awamu ya mwisho ikiwa ni shamra shamra za maadhimisho ya kutimia miaka 51 ya Mapinduzi ya Zanzibar.

Kulia ya Balozi Seif ni Waziri wa Miundombinu na Mawasiliano Zanzibar Mh. Juma Duni Haji na Naibu Wake Mh. Issa Ussi Gavu.

 Balozi Seif akikata utepe kuashiria uzinduzi rasmi wa bara bara ya amani – Mtoni akishindikizwa na Waziri wa Miundombinu na Mawasiliano Mh. Juma Duni Haji kuilia yake na Naibu Waziri wa Wizara Hiyo Mh. Issa Ussi. Na kushoto ya Balozi ni Afisa Uhusiano wa Wizara hiyo Nafisa Madai.

 Balozi Seif na Uongozi wa Wizara ya Maiundo mbinu na Mawasiliano wakikagua  kwa miguu na baadaye magari bara bara ya Mtoni hadi amani.

 Baadhi ya watendaji wa Wizara ya Miundombinu na Mawasiliano Zanzibar wakifuatilia hafla ya ufunguzi wa bara  ara ya Mtoni Amani hapo uwanja wa Gara gara Mtoni Kidatu.

Picha na Hassan Issa wa – OMPR – ZNZ.

Press Release:-

Makamu wa Pili wa Rais wa Zanzibar Balozi Seif Ali Iddi alisema  kwamba Serikali ya Mapinduzi ya Zanzibar imefanikiwa vyema  katika uimarishaji wa  mtandao wa Bara bara Mjini na Vijijini na kufikia kilomita elfu 1,235.52 Unguja na Pemba tokea kubadilisha mfumo wa ujenzi wa Bara bara hizo katika miaka ya 90.

Alisema mfumo huo wa ujenzi kwa upangaji mawe na kushindilia kwa mkono umebadilika na kuingia mfumo wa kisasa unaotumia kifusi na kumalizia kwa lami ya moto na baridi.

Balozi Seif alieleza hayo wakati wa hafla ya uzinduzi wa Bara bara ya Pili ya Amani hadi Mtoni { Mkapa Road } ikiwa ni mwanzoni mwa shamra shamra za maadhimisho ya sherehe za kutimia miaka 51 ya Mapinduzi matukufu ya Zanzibar ya Mwaka 1964 zilizoanza rasmi Tarehe 2 Januari 2015.

Alisema Serikali ilichukuwa jitihada za makusudi katika kuzijenga upya bara bara zake Mijini na Vijijini ambazo tayari zilikuwa zimeharibika vibaya licha ya kazi hiyo kukumbwa na vikwazo tofauti ikiwemo ufinyu wa upatikanaji wa fedha za ununuzi wa zana, vifaa pamoja na ulipaji fidia.

Balozi Seif alisema kukamilika kwa ujenzi wa bara bara ya Amani – Mtoni  ni miongoni mwa hatua muhimu za kuimarisha miundombinu itayowarahisishia wananchi usafiri kwa kuzingatia kuwa bara bara ni kiunganishi kikubwa kinachotumiwa katika kusafirisha huduma muhimu za Kiuchumi na Kijamii.

“ Hizi zote ni juhudi zinazochukuliwa na Chama cha Mapinduzi katika kutekeleza Ilani yake ya Uchaguzi kwa vitendo katika kuhakikisha Nchi ina bara bara bora na za kisasa, hii yote ni katika kuwaletea maendeleo wananchi wetu “. Alisema Balozi Seif.

Makamu wa Pili wa Rais wa Zanzibar aliwapongeza watendaji wa Wizara ya Miundombinu na Mawasiliano katika kusimamia ujenzi wa Bara bara mbali mbali hapa nchini ambapo wameweza kutekeleza vyema majukumu waliyopangiwa na Taifa.

Balozi Seif alieleza kwamba haiba na uzuri wa Bara bara  unategemea hali ya matunzo ya bara bara husika. Hivyo aliwaomba wananchi na watumiaji wote     kuzitunza bara bara wanazozitumia ili zidumu na kuendelea kutumika kwa kipindi kirefu.

Alitoa wito  kwa madereva wote wa vyombo vya moto kutumia bara bara kwa uangalifu zaidi pamoja na kufuata alama za bara barani zilizowekwa wakati wakiendesha vyombo vyao ili kuepuka ajali za mara kwa mara ambazo zinaweza kuepukika.

Aliwaomba madereva hao kuachana na mtindo wa kuegesha gari mbovu zinazodondosha mafuta na kuharibu bara bara sambamba na kuwa waangalifu kwa gari hasa zile zinazobeba makontena zinazotumia mipira ya magongo yanayopelekea uharibifu mkubwa wa bara bara.

Balozi Seif pia aliwakumbusha madereva kwenda mwendo mzuri kama alama za bara bara zinavyoainisha ya mwendo wa kilomita 40 kwa saa na kuepuka bara bara hiyo kufanywamakaburi ya watu wanaotembea kwa miguu na wale wanaotumia vyombo vodogo vya ringi mbili.

Mapema Katibu Mkuu wa Wizara ya Miundo mbinu na Mawasiliano Zanzibar Dr. Juma Malik Akil alisema ramani ya ujenzi wa bara bara ya Mtoni hadi Kiembe Samaki ilikuwepo tokea awamu ya kwanza.

Dr. Malik alisema hatua za ujenzi wa bara bara hiyo zilianza mapemba katika miaka ya 90 lakini zilikwama baada ya daraja lililojengwa kuunganisha bara bara hiyo ambalo tayari lilikuwa limeshamikika kuvunjika.

Alisema ujenzi wa bara bara ya Amani hadi Mtoni yenye urefu wa kilo mita 4 na upana wa mita nane kila njia mbili zilizokuwepo umekamilika kwa awamu zote mbili na utasaidia kuondoa kiu ya wakaazi wa maeneo hayo waliopata usumbufu wa usafiri kwa kipindi kirefu.

Alifahamisha kwamba  wahandisi wa ujenzi wa bara bara hiyo kutoka Idara ya ujenzi na Utunzaji Bara bara { UUB } iliyopata ufadhili wa  Serikali ya Jamuhuri ya Muungano wa Tanzania pamoja na Mfuko wa Bara bara Zanzibar kwa gharama ya zaidi ya Shilingi Bilioni Nne imetenga njia maalum ya watembeao kwa miguu.

Katibu mkuu huyo wa Wizara ya Miundombinu na Mawasiliano Zanzibar alieleza kwamba Serikali tayari imeshajenga Bara bara zenye urefu wa Kilomita 704 kwa Unguja na Kilomita 531 kwa Pemba.

Dr. Malik alifafanua kwamba hadi sasa tayari Mkoa wa Mjini Magharibi umeshawekewa miundombinu mizuri ya bara bara kwa zaidi ya Kilomita 206 kati ya hizo Manispaa ya Mji pekee ina kilomita 68, wakati bara bara kuu zina urefu wa kilomita 332, Vijijini Kilomita 544 na zile za mashambani zimefikia kilomita 270.2.

Akimkaribisha mgeni rasmi Makamu wa Pili wa Rais wa Zanzibar Balozi Seif Ali Iddi, Waziri wa Miundombinu na Mawasiliano Zanzibar Mh. Juma Duni Haji alisema licha ya bara bara ya Mtoni Amani kusaidia kupunguza msongamano wa Bara bara kuu inayoingia Mjini lakini matumizi yake yameongezeka na kuifanya kuwa na harakati zaidi.

Waziri Juma Duni alieleza kwamba hatua za kulinda usalama wa wananchi itaimarishwa kufuatia msongamano huo uliobeba magari makubwa hasa yale ya mchanga na mizigo.

Othman Khamis Ame

Ofisi ya Makamu wa Pili wa Rais wa Zanzibar

3/1/2015.

 

kampeni ya uchunguzi wa Saratani ya matiti

RAIS JAKAYA KIKWETE amezindua kampeni ya uchunguzi wa Saratani ya matiti na shingo ya kizazi kwa Wanawake wa mkoa wa TABORA

WATCH THESE VIDEOS

Waandishi watakiwa kufuata maadili

kampeni ya uchunguzi wa Saratani ya matiti

Oparesheni ya kukamata mazao ya misitu

Noti bandia mkoani Tanga

RAIS JAKAYA KIKWETE amezindua kampeni ya uchunguzi wa Saratani ya matiti na shingo ya kizazi kwa Wanawake wa mkoa wa TABORA na kuwataka wajitokeze kupima afya zao na kupatiwa matibabu.

Rais KIKWETE amesema ugonjwa huo sio wa aibu, na wale watakaogundulika kuwa na viashiria vya Saratani hiyo waanze kupatiwa tiba haraka ambapo Serikali ipo tayari kuhakikisha wale wote wenye matatizo hayo wanatibiwa.

Uzinduzi huo umefanyika katika kiwanja cha CHIPUKIZI cha Chuo kikuu cha AMUCTA-TABORA, ambapo Rais KIKWETE ametembelea mabanda yanayotumika kufanyia uchunguzi huo.

Rais KIKWETE atoa salamu za mwaka mpya 2015

Rais JAKAYA KIKWETE

Rais JAKAYA KIKWETE ametoa salamu za mwaka mpya wa 2015 kwa Watanzania na kuelezea kuridhishwa na mafanikio yaliyopatikana kwenye sekta mbalimbali mwaka 2014 ikiwemo hali ya usalama wa mipaka ya nchi, utekelezaji wa miradi mikubwa ya kimkakati hususani ile ya maji na miundombinu ya usafirishaji na uchukuzi.

Katika salamu zake, Dakta KIKWETE pia ameelezea dhamira ya serikali ya kuondoa ada katika elimu ya sekondari kuanzia mwaka 2016.

Rais KIKWETE amelimwagia pongezi Jeshi la Polisi kwa juhudi zake za kupambana uhalifu nchini ukiwemo ugaidi.

Amesema taarifa za polisi zinaonyesha kuwa mwaka 2014 vitendo vya uhalifu vimepungua ikilinganishwa na mwaka 2013 pamoja na kutambua mtandao wa viongozi na washirika wao wanaotuhumiwa kupanga na kufanya mashambulizi ya kigaidi.

Aidha Rais KIWETE amesema katika mwaka 2014 hali ya uchumi wa nchi imeendelea kuimarika ambapo makusanyo ya mapato ya serikali yameongezeka na kufikia Asilimia 90 ya lengo na kuongeza kuwa Ofisi ya Takwimu imekamilisha marekebisho ya takwimu za Pato la Taifa.

pia amesema amefarijika na kuendelea kupungua kwa matukio ya ajali za barabarani ikilinganishwa na mwaka 2013, mafanikio katika vita dhidi ya biashara na matumizi ya dawa za kulevya nchini ikiwemo kukamatwa kwa vigogo wa biashara hiyo huku akisema kuwa mwaka 2014 mapambano dhidi ya ujangili na biashara haramu ya bidhaa zinazotokana na wanyama pori yameimarishwa.

Masuala mengine ambayo Rais KIKWETE ameyazungumzia katika hotuba yake ni pamoja na jitihada za kuboresha hali ya usafiri ikiwemo kazi ya kujenga barabara za lami na kuimarisha barabara za udongo ili ziweze kupitika wakati wote, kuimarisha huduma ya usafiri wa Reli ya Kati na kukua kwa sekta usafiri wa anga.

Aidha Rais KIKWETE amesema serikali imeendelea kupiga hatua za kuridhisha katika kuboresha elimu nchini ikiwa ni pamoja na kupunguza tatizo la upungufu wa maabara, vitabu na walimu wa shule za msingi na sekondari.

Rais KIKWETE pia amesema wajibu wa viongozi wa Serikali za Mitaa Vitongoji na Vijiji waliochaguliwa katika uchaguzi uliofanyika Desemba 14 na Desemba 20 mwaka jana ni kufanya kazi waliyoiomba.

VIONGOZI WA CHADEMA IRINGA WAPELEKANA POLISI IRINGA

Diwani wa kata ya Mivinjeni Iringa kupitia CHADEMA Frank Nyalusi

HALI  ya  kisiasa  ndani ya  chama  cha Demokrasia na maendeleo (Chadema)  mkoa wa Iringa si shwari  baada ya mwenyekiti wake mkoa  wa Iringa Mustapher Msowela  kumfikisha polisi  mwenyekiti wa chama hicho wilaya ya Iringa mjini, Frank Nyalusi

Nyalusi  ambae  pia ni  diwani  wa kata ya Mvinjeni jimbo la Iringa mjini juzi alitiwa nguvuni na  jeshi la Polisi kabla ya kuachiwa kwa dhamana.

Nyalusi aliyeshitakiwa katika kituo cha Polisi cha kati cha mjini Iringa jana, anatuhumiwa kumtusi mwenyekiti wake huyo wa mkoa kupitia mitandao ya simu; matusi yanayoendelea kuchunguzwa na jeshi hilo.

Nyalusi amekamatwa kwa tuhuma hiyo ikiwa ni siku chache tu baada ya kudaiwa kutoa tuhuma za uongo kwa lengo la kujipatia umaarufu dhidi ya mfanyabiashara maarufu wa mjini Iringa, Salim Asas ambaye pia ni Kamanda wa Umoja wa Vijana wa Chama cha Mapinduzi (UVCCM) mkoa wa Iringa.

Katika mkutano wa hadhara uliofanywa na Chadema Desemba 21 kwenye uwanja wa Mwembetogwa mjini Iringa, Nyalusi ambaye pia ni diwani wa kata ya Mivinjeni alitoa tuhuma zinazowahusisha vijana watatu ambao hata hivyo hakuwataja majina kwamba walitumwa na Asas kwenda kumuua.

Asas kwa kupitia kwa wakili wake, Alfred Kingwe amekanusha tuhuma hizo alizoziita ni za kipuuzi ambazo haziwezi kubebeka hata kwa mzani mdogo wa kupimia madini.

Ili kumsafisha mteja wake, Kingwe alisema ndani ya siku 14 toka akabidhiwe hati ya madai (Demand Note), Nyalusi anatakiwa kuitisha mkutano katika eneo lile lile alilotolea tuhuma hizo na kuzikanusha vinginevyo atafikishwa mahakamani.

Akizungumza na wanahabari jana, Kamanda wa Polisi wa Mkoa wa Iringa, Ramadhani Mungi alisema;  “Kuhusu tukio la kumtukana mwenyekiti wake wa mkoa, Nyalusi alikamatwa jana mara baada ya Msowela kuwasilisha malalamiko yake polisi, akahojiwa na kuachiwa baada ya kukamilisha taratibu za dhamana.”

Alisema jeshi la Polisi linaendelea kuchunguza tukio hilo la kijinai na endapo litathibitika kuwa la kweli, Nyalusi ambaye pia ni Diwani wa Kata ya Mivinjeni mjini Iringa atafikishwa mahakamani.

Kuhusu tukio linalomuhusisha na Asas, Kamanda Mungi alisema jeshi la Polisi limefanya mahojiano ya awali na wahusika hao.

“Jambo hili lipo, tunachunguza; yapo maneno Nyalusi ameyatamka kwenye mkutano wao wa hadhara kwamba ametishiwa kuuawa, ametumiwa watu watatu kwenda kumuua wakiwa na visu. Kumtishia mtu ni kosa la jinai na kumtuma mtu kwenda kumdhuru mtu mwingine ni kosa la jinai, kwahiyo tunachunguza” alisema.

Alisema katika mazingira ya uwazi, Polisi inachunguza suala hilo ili kujua Nyalusi alitishiwa katika mazingira gani; alitishiwa na nani na kwanini hakwenda kutoa taarifa hiyo Polisi na kufungua kesi ili Polisi iwakamate wahusika na kulinda maisha yake.

“Lakini tunajaribu kuangalia kama hakutishiwa na ametamka vile katika mkutano wa hadhara, lengo lake lilikuwa ni nini na kama anajua madhara yake kwa jamii iliyosikia taarifa hiyo ni yepi,” alisema.

Alisema kama itabainika taarifa zilizotolewa na Nyalusi ni za uongo, sheria itachukua mkondo wake na kama itadhihiri ni za kweli sheria pia itachukua mkondo wake.

Wanaobeza huduma ya umeme vijijini watakiwa kupuuzwa

Waziri wa Nishati na Madini Profesa SOSPETER MUHONGO

Waziri wa Nishati na Madini Profesa SOSPETER MUHONGO amewataka wananchi Wilayani SERENGETI mkoani MARA, kuwapuuza watu wanaohujumu mradi wa Umeme vijijini unaotekelezwa katika maeneo mbalimbali ndani na nje ya mkoa huo.

Akizungumza na baadhi ya wananchi wa kijiji cha GANTAMOME wilayani humo, Profesa MUHONGO amesema baadhi ya watu wamekuwa wakiwahadaa wananchi kuwa utekelezaji wa mradi huo hautafanikiwa kama ilivyokusudiwa na Serikali jambo ambalo linalenga kuwanyima fursa wananchi wa vijijini upatikanaji wa nishati ya umeme .

Nalo shirika la Umeme nchini TANESCO limewatahadharisha wananchi kutowapa fedha watu wasio waaaminifu ili kugharamia mradi huo wa nishati ya umeme vijijini.

MH. LOWASSA AMTEMBELEA SUKWA SAID SUKWA,ZANZIBAR

Waziri Mkuu Mstaafu na Mbunge wa Jimbo la Monduli,Mh. Edward Lowassa (kulia) akisalimiana na Katibu mkuu wa Zamani wa Umoja wa Vijana wa CCM, Sukwa Said Sukwa alipomtembelea kwa ajili ya kumjulia hali, nyumbani kwake eneo la Mpendae, mjini Unguja jana. Mh Lowassa alikuwa Zanzibar kwa mapumziko ya kusherekea skukuu ya Krismasi.

Waziri Mkuu Mstaafu na Mbunge wa Jimbo la Monduli,Mh. Edward Lowassa (kulia) akiwa katika mazungumzo na Katibu mkuu wa Zamani wa Umoja wa Vijana wa CCM, Sukwa Said Sukwa alipomtembelea nyumbani kwake eneo la Mpendae, mjini Unguja jana. Mh. Lowassa alikuwa Zanzibar kwa mapumziko ya kusherekea sikukuu ya Krismasi. Kushoto ni Mke wa Sukwa, Fatma
Mussa.

Waziri Mkuu Mstaafu na Mbunge wa Jimbo la Monduli,Mh. Edward Lowassa akiwa katika picha ya pamoja na familia ya Katibu wa Zamani wa Umoja wa Vijana wa CCM, Sukwa Said Sukwa alipomtembelea nyumbani kwake eneo la Mpendae, mjini Unguja jana.

Balozi Seif awatakia kheri ya mwaka mpya wazee hapa Nchini

Makamu wa Pili wa Rais wa Zanzibar Balozi Seif Ali Iddi akisalimiana na Sheikh Mkuu wa Msikiti wa Asili wa Ijumaa Micheweni Mjini  Sheikh Haji Khatib Haji.

Balozi Seif akitoa Mkono wa Pole kwa Watoto na Wajukuu wa Muasisi wa Afro Shirazy Party Marehemu Bibi Ashura Abeid hapo Nyumbani kwa Tibirinzi Chake chake Pemba.

Balozi Seif akibadilishana mawazo na Mzee Khamis Mkadara Khamis wakati alipokwenda kumkagua na kumtakia kheir ya Mwaka Mpya wa 2015.

Mzee Bakari Khamis Kombo wa Kijiji cha  Micheweni akisalimiana na Makamu wa Pili wa Rais wa Zanzibar Balozi Seif Ali Iddi aliyefika kumjulia hali na kumtakia kheri ya mwaka mpya wa 2015.

 Balozi Seif akimsalimia mzee  Khamis Othman Kapona wa Kijiji cha Chekea Mtambwe alipokwenda kumtembelea na kujua hali yake pamoja na kumpa kheri ya mwaka mpya.

Makamu wa Pili wa Rais wa Zanzibar Balozi Seif Ali Iddi akimtakia kheri ya mwaka mpya wa 2015  Mwenyekiti Mstaafu wa CCM Jimbo la Micheweni Mzee Kombo Fundi Kombo wakati alipomtembelea na kujua hali yake.

Picha na Hassan Issa wa – OMPR – ZNZ.

Balozi Seif Ali Iddi ampa pole Kiongozi wa Madaktari wa Cuba Profesa Ulpiano

 Makamu wa Pili wa Rais wa Zanzibar Balozi Seif Ali Iddi akimpa pole Kiongozi wa Madaktari wa Cuba Profesa Ulpiano Nyumbani kwake Vuga Mjini Zanzibar baada ya kuvamiwa na majambazi jana usiku yeye na wenzake maeneo kati ya Kikwajuni na SUZA.

Makamu wa Pili wa Rais wa Zanzibar Balozi Seif akiagana na Mke wa Kiongozi wa Madaktari wa Cuba Dr. Ulpiano mara baada ya kuwapa pole kutokana na mtihani uliowapatya wa kuvamiwa na Majambazi.
Kati kati yao ni Dr. Barbara nyuma ya Balozi Seif ni Makamu Mkuu wa Chuo Kikuu cha Taifa Zanzibar {SUZA } Dr. Idrissa Rai.

Balozi Seif akibadilishana mawazo na Madarkati wa Cuba hapo nyumbani kwao Vuga alipokwenda kuwafariji na kuwapa pole baada ya kuvamiwa na Majambazi.
Picha na Hassan Issa wa – OMPR – ZNZ.

Press Release:-

Kamanda wa Polisi Mkoa Mjini Magharibi Msaidizi Kamishna wa Polisi { ACP } Mkadam Khamis Mkadam alisema Jeshi la Polisi Mkoa huo linawashikilia watu wawili miongoni mwa majambazi wanaotuhumiwa kuhusika na uvamizi wa Madaktari Bingwa wa Cuba katika maeneo kati ya Kikwajuni Wireles na Chuo Kikuu cha Taifa Zanzibar {SUZA } mapema jana usiku.

Alisema polisi ilianza uchunguzi mara moja baada ya kupata taarifa ya kuvamiwa kwa Madaktari hao walionyang’anywa mikoba,vitu pamoja na Fedha zao ambapo mmoja kati yao Profesa Ulpiano alijeruhiwa kwa panga kichwani.

Kamishna Msaidizi wa Polisi { ACP } Mkadam Khamis Mkadam alieleza hayo wakati Makamu wa Pili wa Rais wa Zanzibar Balozi Seif Ali Iddi alipofika nyumbani kwa Madaktari hao Vuga Mjini Zanzibar kuwafaribi baada ya kupatwa na mkasa huo.

Kamanda Mkadam alisema Mkoa wa Mjini umekuwa na matukio ya kuibuka kwa vitendo vinavyoashiria kuichezea amani baadhi ya wakati jambo ambalo jamii inahusika kwa kiasi kikubwa katika kushirikiana na Jeshi la Polisi kukabiliana na vitendo hivyo.

Alisema ulinzi ni jukumu la watu wote, hivyo miundo mbinu iliyopo hivi sasa Duniani ya mitandao ya mawasiliani katika uwekaji wa Kamera za CCTV inahitajika kutumika kwa lengo la kuwabaini watu wanaojihusisha na matendo maovu.

Kamanda huo wa Polisi Mkoa wa Mjini Magharibi alizishauri Taasisi za Umma, Binafsi na hata watu wa kawaida wakakijengea utamaduni wa kutumia mfumo huo mpya ili kuwa na maisha ya salama.

Akiwapa pole Madaktari hao Bingwa wa Cuba wanaotoa huduma katika Hospitali Kuu ya Mnazi Mmoja pamoja na kusomesha Chuo Kikuu cha Taifa Zanzibar { SUZA } Makamu wa Pili wa Rais wa Zanzibar Balozi Seif Ali Iddi alisema hilo ni tukio la ajabu na la kusikitisha katika visiwa vya Zanzibar.

Balozi Seif alisema vitendo hivyo viovu vinavyofanywa na baadhi ya wahuni vimekuwa vikileta sura mbaya kutokana na sifa ya Zanzibar yenye Utamaduni wa kistaarabu wa kupenda wageni tokea karne nyingi zilizopita.

Makamu wa Pili wa Rais wa Zanzibar aliwahakikishia Madaktari Bingwa hao wa Cuba kwamba Serikali ya Mapinduzi ya Zanzibar kupitia vyombo vyake vya ulinzi inaendelea na uchunguzi wa kina na wahusika wa vitendo hivyo watapopatikana mkondo wa sheria utafanya kazi zake dhidi ya wahalifu hao.

Balozi Seif aliwataka Madaktari hao kuendelea na majukumu yao kama kawaida na Serikali itakuwa makini katika kuwahakikishia usalama wao pamoja na wageni wengine wakati wao wote wawapo hapa Nchini.

Wakitoa shukrani zao kwa faraja hiyo pamoja na juhudi zilizochukuliwa na vyombo vya ulinzi katika kuwasaka wahalifu waliohusika na tukio hilo Madaktari hao wa Cuba waliahidi kuendelea kutoa huduma kama kawaida licha ya mkasa uliowakumba.

Madaktari hao walielezea matumaini yao kwamba Serikali pamoja na vyombo vyake vya ulinzi vitafanya juhudi za ziada katika kuona kwamba matukio kama hayo yanadhibitiwa kabisa.

Madaktari hao wanne wa Cuba ni Dr. Barbara, Dr. Daisy Batle, Dr.Katia wakiwa na Kiongozi wao Profesa Ulpiano walivamiwa ghafla na vijana walioshuka na mapanga kwenye Gari aina ya Noah wakati wakitokea Kikwajuni kuelekea nyumbani kwao Vuga.

Othman Khamis Ame

Ofisi ya Makamu wa Pili wa Rais wa Zanzibar

NAIBU WAZIRI MWIGULU NCHEMBA MGENI RASMI TAMASHA LA UPENDO WA MAMA DAR

Naibu Waziri wa Fedha, Mwigulu Nchemba akizungumza.

Na Mwandishi Wetu

NAIBU Waziri wa Fedha, Mwigulu Nchemba anatarajiwa kuongoza Tamasha Maalumu la 'Upendo wa Mama' linalotarajiwa kufanyika katika Kanisa la Rutheran Mabibo Extenal jijini Dar es Salaam na kushirikisha waimbaji wengi kutoka ndani na nje ya Tanzania.

Akizungumzia tamasha hilo leo jijini Dar es Salaam, Rais wa taasisi ya Upendo kwa Mama Foundation yenye makao makuu yake mkoani Arusha, Injinia Carlos Mkundi alisema Naibu Waziri Nchemba ndiye mgeni rasmi wa Tamasha hilo maalumu ambalo pamoja na mambo mengine linafanyika kutambua mchango mkubwa wa mama kuanzia katika ngazi ya familia na jamii nzima.

Injinia Mkundi alisema tamasha hilo litakalofanyika Januari Mosi, 2015 chini ya uratibu wa Taasisi ya Upendo kwa Mama Faundation, litashirikisha waimbaji wa injili akiwemo Faraja Ntaboba kutoka Congo, Stella Joel, Ado Novemba, Jane Misso, Edson Mwasabwite wote kutoka jijini Dar es Salaam. Na Rose Molel, Helen Kigazi wote kutoka mkoani Arusha.

Injinia Carlos Mkundi na mwimbaji wa muziki wa injili ambaye naye atatumbuiza katika tamasha hilo, aliwataja waimbaji wengine ambao watashiriki katika tamasha ni pamoja na Mbunge, Matha Mlatta, Kwaya ya Mamajusi kutoka Moshi, mwimbaji Tumaini Njole, Messi Chengula na waimbaji wengine wengi.

"...Washiriki kila mmoja anaweza kuja na mamayake anayempenda pamoja na zawadi yake maalum, ambayo atamkabidhi wakati itakapotangazwa...kutakuwa na waimbaji wa muziki wa injili kutoka nje na ndani ya nchi ili kuleta mvuto zaidi tunawaomba wananchi wajitokeze zaidi kuja kutambua mchango wa mama na kuonesha upendo kwa mama zao," alisema Injinia Mkundi.

Akifafanua zaidi alisema Tamasha la Upendo kwa Mama litakuwa la bure na litaanza majira ya saa saba mchana siku hiyo na kuendelea hadi jioni litakapofungwa.

Aisema siku hiyo washiriki wanaombwa kuja na zawadi maalumu ambayo kila mmoja atamkabidhi mamayake anayempenda katika familia zao.

Rais wa Taasisi ya Upendo kwa Mama Faundation, Injinia Caros aliongeza kuwa lengo lingine ni pamoja na kuwatia moyo akinamama na kuwaonesha upendo juu ya kazi kubwa wanayoifanya katika familia zao na jamii kwa ujumla.

Alisema baada ya uzinduzi wa tamasha hilo kanisani hapo yataandaliwa matamasha mengine makubwa na kufanyika katika Uwanja wa Taifa jijini Dar es Salaa pamoja na mengine katika mikoa mbalimbali.

Aidha aliongeza tamasha kama hilo pia lilifanyika mkoani Arusha Novemba 16, 2014 katika uwanja wa Sheikh Amri Abeib na kuwashirikisha akinamama zaidi ya 40,000.

Mlezi wa CCM Mkoa wa Magharibi Balozi Seif atembelea Tawi la CCM.

Mlezi wa CCM Mkoa wa Magharibi Balozi Seif akipandisha Bendera ya CCM Mbele ya Tawi la CCM Mombasa kwa Mchina kabla ya kuweka jiwe la msingi la Twi hilo.

 Balozi Seif  ambae pia ni Mjumbe wa Kamati Kuu ya Halmashauri Kuu ya Taifa ya CCM akiweka jiwe la msingi la Tawi la CCM Mombasa kwa Mchina.

 Mwenyekiti wa Kamati ya Ujenzi wa Tawi la CCM  Mombasa  kwa Mchina Nd. Ahmada Yahya Abdulwakil akitoa ufafanuzi wa ujenzi mbele ya Mlezi wa CCM Mkoa wa Magharibi Balozi Seif mara baada ya kuweka jiwe la Msingi la Tawi hilo.

 Wanachama wapya 79 wa CCM na Jumuiya zake wa Tawi la CCM Mombasa kwa Mchina wakila liapo mara baada ya kukabidhiwa kadi na Mlezi wa CCM Mkoa wa Magharibi Balozi Seif Ali Iddi.

Mlezi wa CCM Mkoa wa Maghribi Balozi Seif Ali Iddi akiwa katika Picha ya pamoja na uongozi mzima wa Tawi la CCM Mmobasa kwa Mchina, Wilaya ya Dimani na Mkoa wa Magharibi mara baada ya uwekaji wa jiwe la msingi la Tawi hilo.Picha na Hassan Issa wa – OMPR – ZNZ.

Press Release:-

Mjumbe wa Kamati Kuu ya Halmashauri Kuu ya Taifa ya CCM Balozi Seif Ali Iddi alisema wimbi la vijana wa vyama vya upinzani kuamua kuvihama vyama hivyo na kujiunga na CCM ni dalili za umadhubuti  wa chama hicho unaoonekana kuimarika kila wakati.

Alisema chama cha Mapinduzi chenye sera  na ilani imara inayokiwezesha kushinda kila baada ya miaka mitano tokea kuanza kwa mfumo wa vyama vingi vya siasa Tanzania ndio kimbilio la watu wote wenye busara ya kutaka kujiunga na ulingo wa siasa.

Balozi Seif Ali Iddi ambae pia ni Mlezi wa Mkoa wa Magharibi Kichama alisema hayo mara baada ya kuweka jiwe la msingi la ujenzi wa Tawi la Chama cha Mapinduzi Mombasa kwa Mchina Wilaya ya Dimani Mkoa wa Magharibi.

Alisema makundi ya wafuasi wa vyama vya upinzani wanaoamuwa wenyewe kuvihama vyama vyao na kujiunga na Chama cha Mapinduzi ni muelekeo wa ishara kwa CCM kuendelea kuongoza dola katika uchaguzi  Mkuu ujao wa mwaka 2015.

Hata hivyo Balozi Seif aliwatahadharisha Viongozi na Wanachama wa CCM wasikae na kubweteka na mawazo ya kushinda uchaguzi bila ya sera na mikakati ya kujipanga vyema kwa ajili ya ushindi huo.

Aliwaomba wana CCM popote pale walipo nchini Tanzania kuendelea kushikamana na kuacha majungu, fitna na makundi ili  ushindi uwe rahisi zaidi ya chaguzi zote zilizopita za mfumo wa vyama vingi hapa Nchini.

Balozi Seif aliupongeza Uongozi, wanachama na  wapenzi wa chama hicho waliojitolewa kwa nguvu zao na kuhakikisha kwamba ujenzi wa Tawi la Mombasa kwa Mchina unasimama imara.

Alisema licha ya kuungwa mkono na wapenzi na watu tofauti katika ujenzi wa Tawi hilo lakini nguvu za ukamilishaji wa tawi hilo zitaendelea kubakia mikononi mwa Viongozi pamoja na Wanachama wenyewe wa Tawi hilo.

Aliutaka uongozi wa Mkoa wa  Magharibi kuwa na tahadhari ya uvamizi wa makaazi unaofanywa na baadhi ya watu kwa lengo maalum la kuongeza nguvu za  kuimarisha vyama vya kisiasa katika kujiandaa kwa uchaguzi Mkuu ujao.

Balozi Seif akiwa pia ni Makamu wa Pili wa Rais wa Zanzibar   aliwakumbusha masheha na Wakuu wa Wilaya  nchini kuendelea kufuata sheria za nchi ipasavyo ili kila mwenye haki yake anapata fursa  bila ya vikwazo,ubaguzi wala itikadi za kisiasa.

Alisema tabia ya baadhi ya watu zaidi wana siasa kushindikiza masheha kutoa vibali  kwa wafuasi au vijana wao kwa kutaka kupatiwa vitambulisho vya Mzanzibari Mkaazi wakati muda wa ukaazi wa vijana hao haujatimia ni kuvunja sheria za nchi.

“ Suala hili la kutishwa masheha na kulaumiwa Wakuu wa Wilaya nililikemea nilipokuwa katika ziara yangu wiki hii Kisiwani Pemba. Na hapa nalirejea tena kwa kuwakumbusha masheha na wakuu hao wa Wilaya kufanya kazi zao kwa kujiamini “. Alisema Balozi Seif.

Aliwataka na kuwaasa vijana kujiepusha na ushawishi huo wa wana siasa wa kutaka kuwalazimisha kufanya mambo yaliyo kinyume na sheria na utaratibu wa Nchi.

Katika kuunga mkono ujenzi wa Tawi hilo la Mombasa Kwa mchina Mlezi huyo wa Mkoa wa Magharibi Kichama Balozi Seif aliahidi kukamilisha ukumbi wa Tawi hilo kwa kutoa mchango wa Jipsam, taa ,mafeni yote ukumbini hapo pamoja na kusaidia  Seti moja ya Jezi kwa Timu kati ya timu 16 zilizomo ndani ya Tawi hilo .

Mapema akitoa Taarifa fupi ya ujenzi wa Tawi hilo Mwenyekiti wa Ujenzi ambae pia ni Mjumbe wa Halmashauri Kuu ya Taifa ya CCM  Nd. Ahmada Yahya Abdulwakil  alisema ujenzi huo ulioanza rasmi Tarehe 28 Septemba 2013 umekuja kufuatia wanachama hao kukosa ofisi ya kufanyia kazi  zao za Kisiasa.

Nd. Ahmada alisema tawi hilo lenye ofisi zote zinazohitajika zikiwemo za jumuiya za chama litakuwa na huduma za kisasa zinazokwenda na wakati  pamoja na ukumbi wa Mikutano ambao utakodishwa kwa shughuli za kijamii ili kuliongezea mapato Tawi hilo.

Mwenyekiti huyo wa Kamati ya Ujenzi wa Tawi la CCM Mombasa kwa Mchina aliwashukuru viongozi na wapenzi wote wa chama hicho waliojitolea kuunga nguvu katika ujenzi wa Tawi hilo lenye hadhi ya chama chenyewe.

Katika hafla hiyo ya uwekaji wa jiwe la msingi la Tawi la CCM Mombasa Kwa Mchina Balozi Seif alikabidhi kadi kwa wanachama wapya  79 wa chama cha Mapinduzi pamoja na Jumuia zake wa Tawi hilo.

Ujenzi wa  Tawi la Chama cha Mapinduzi Mombasa kwa Mchina  hadi sasa umeshagharimu zaidi ya shilingi Milioni 45,100,000/- .

Othman Khamis Ame

Ofisi ya Makamu wa Pili wa Rais wa Zanzibar

27/12/2014.